فوتو: primeminister.kz
ولجاس بەكتەنوۆ ەلىمىزدە 60 جىلدان بەرى تجم قىزمەتتەرى مەن كوممۋنالدىق كاسىپورىنداردى ارنايى تەحنيكامەن قامتاماسىز ەتىپ كەلە جاتقان ءىرى كومپانيالاردىڭ ءبىرى – «ورالاگرورەمماش» اق-عا باردى. وتكەن جىلى مۇندا 120-دان استام ارنايى تەحنيكا جانە 115 تىركەمە شىعارىلدى. بۇل رەتتە كاسىپورىننىڭ وندىرىستىك جۇكتەمەسى 20%-دان اسپايدى.
پرەمەر-مينيستر شىعارىلاتىن ءونىم ۇلگىلەرىمەن تانىستى. وندىرىلەتىن ورتكە قارسى تەحنيكانى تەكسەرۋ كەزىندە ۇكىمەت باسشىسى كوپ قاباتتى تۇرعىن ۇيلەر دەڭگەيىندە قۇتقارۋ جۇمىستارىن جۇرگىزۋ ءۇشىن ءورت ءسوندىرۋ ساتىلارىن ءوندىرۋ قاجەتتىگىن اتاپ ءوتتى.
بىرقاتار سالالىق مينيسترلىكتەرگە وتاندىق كومپانيالارمەن ءوزارا ءىس-قيمىلدى ارتتىرۋ مۇمكىندىگىن قاراستىرۋ تاپسىرىلدى. ءوز كەزەگىندە كاسىپورىندار ءوندىرىس جەلىسىن جاڭارتۋ جانە كەڭەيتۋ پروتسەسىن جالعاستىرۋى كەرەك. ماشينا جاساۋدى دامىتۋ ءاردايىم ءىرى بولشەكتەردى قۇراستىرۋدان باستالىپ, ودان ءارى شاعىن قۇرامداس بولشەكتەردى ءوز بەتىنشە شىعارۋعا كوشەتىنى اتاپ ءوتىلدى.
«مەملەكەت وڭدەۋ سەكتورىن دامىتۋعا باستى نازار اۋدارادى. كاسىپورىندا بارلىعى تولىق قۋاتىندا جۇمىس ىستەۋى كەرەك. ءبىز قازىر وتاندىق ءوندىرۋشىنى قولداۋ باعدارلاماسىن ازىرلەپ جاتىرمىز. ساتىپ الۋدا لوكاليزاتسياسى جوعارى كاسىپوراندارعا باسىمدىق بەرۋ كەرەك», دەدى ولجاس بەكتەنوۆ.
اتىس جانە زەڭبىرەك قارۋ-جاراعىن وندىرۋگە ماماندانعان بىرەگەي كاسىپورىن – «باتىس قازاقستان ماشينا جاساۋ كومپانياسى» اق-دا پرەمەر-مينيستر ولجاس بەكتەنوۆ شىعارىلاتىن جوعارى ساپالى قورعانىس ونىمدەرىنە الەمدىك نارىقتا سۇرانىس جوعارى ەكەنىنە باسا نازار اۋداردى. سونداي-اق ول كومپانيا جۇكتەمەسىنىڭ 60% دەڭگەيىندە ەكەنىن ەسكەرە وتىرىپ, ارالاس وندىرىستەردى قۇرۋ قاجەتتىگىن اتاپ ءوتتى.
ءارى قاراي پرەمەر-مينيستر قاڭىلتىر, پوليەتيلەن جانە پوليپروپيلەن قۇبىرلارىن, حالىق تۇتىناتىن پلاستماسسادان جاسالعان تاۋارلاردى وندىرەتىن كاسىپورىن – «ورال ساۋدا-ونەركاسىپ كومپانياسى» جشس-نىڭ جۇمىسىمەن تانىستى. زاۋىتتىڭ جىلدىق قۋاتى 37,5 مىڭ توننا پوليەتيلەن بۇيىمىن شىعارۋعا جەتكىلىكتى بولا تۇرا, بىلتىر جۇكتەمە 20%-دى قۇراعان. شىعارىلاتىن ءونىم جاڭارتۋدى جانە جاڭعىرتۋدى قاجەت ەتەتىن گازبەن, سۋمەن جابدىقتاۋ, تەلەكوممۋنيكاتسيا جۇيەلەرىنە ارنالعانىن اتاپ وتكەن ءجون.
وعان قوسا وڭىردە ۇكىمەت باسشىسى قۋاتى جىلىنا 5 ملن پوليپروپيلەن قاپشىعىن (بيگبەگتەر) شىعاراتىن «Packaging Systems» كاسىپورنىنا باردى. جوبا وتكەن جىلدىڭ كۇزىندە ايماققا شەتەلدىك كومپانيالاردى ورنالاستىرۋ اياسىندا پايدالانۋعا بەرىلدى. وندىرىلەتىن بيگبەگتەر قازىرگى ۋاقىتتا قازاقستاندا پايدالانىلادى, سونداي-اق ەاەو جانە ەو ەلدەرىنە ەكسپورتتالادى.
«ينۆەستيتسيا تارتۋ ءۇشىن بارىنشا كۇش سالۋىمىز كەرەك. وتاندىق نەمەسە شەتەلدىك ينۆەستورلار بولسىن – ولار ءبىزدىڭ ەكونوميكامىز ءۇشىن ماڭىزدى. سوندىقتان ءبىز ينۆەستورلار ءۇشىن قولايلى جاعداي جاساۋىمىز كەرەك», دەدى و. بەكتەنوۆ.
ونەركاسىپ نىساندارىن ارالاۋ قورىتىندىسى بويىنشا ۇكىمەت باسشىسى ونەركاسىپتىڭ قارقىندى ءوسۋىن جانە ەكونوميكانى يندۋستريالاندىرۋدى قامتاماسىز ەتۋ ءۇشىن قارجىلىق جانە قارجىلىق ەمەس قولداۋ شارالارى بويىنشا كاسىپكەرلىك سۋبەكتىلەرىنە قولداۋ كورسەتۋ شارالارىن كۇشەيتۋدى تاپسىردى.
