فوتو: ن.بايبۋلين
م.اشىمباەۆ مۇسىلمان اقساقالدار كەڭەسىنىڭ باس حاتشىسىنا ۇيىم جۇمىس ىستەپ كەلە جاتقان 10 جىلدىڭ ىشىندە حالىقارالىق ارەنادا بەيبىتشىلىك, بىرلىك جانە ءدىني تولەرانتتىلىق يدەيالارىن دارىپتەۋگە ۇلكەن ۇلەس قوسقانىن اتاپ ءوتتى.
كەزدەسۋ كەزىندە كەڭەستىڭ ماقساتتارى الەمدىك جانە ءداستۇرلى دىندەر ليدەرلەرى سەزىنىڭ قاعيدالارىمەن ۇندەسەتىنى ايتىلدى. ماۋلەن اشىمباەۆ مۇسىلمان اقساقالدار كەڭەسىنىڭ ورتالىق ازياداعى وكىلدىگىنىڭ استانادا اشىلۋى سونىڭ جارقىن كورىنىسى سانالاتىنىن تىلگە تيەك ەتىپ, بۇل وقيعا قازاقستان ءۇشىن ەرەكشە ماڭىزعا يە ەكەنىن اتاپ ءوتتى.
سونىمەن قاتار الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ توراعاسى ماۋلەن اشىمباەۆ سەزدى دامىتۋ تۇجىرىمداماسىنا سايكەس الداعى ۋاقىتتا حاتشىلىق تاراپىنان اتقارىلاتىن جۇمىستاردى ايتتى. مۇسىلمان اقساقالدار كەڭەسىمەن بايلانىستى ودان ءارى نىعايتۋعا, سونداي-اق, داۋ-جانجالداردى بەيبىت جولمەن شەشۋ جانە وزەكتى سىن-قاتەرلەردى ەڭسەرۋ ءۇشىن رۋحاني ديپلوماتيانىڭ الەۋەتىن دامىتۋعا مۇددەلى ەكەنىن جەتكىزدى.
«پرەزيدەنت قاسىم-جومارت توقاەۆ حالىقارالىق قاۋىپسىزدىكتىڭ جاڭا جۇيەسىن قۇرۋ ءۇشىن بەيبىتشىلىككە شاقىراتىن تىڭ جاھاندىق قوزعالىس قاجەت ەكەنىن ۇنەمى ايتىپ كەلەدى. قازىرگى تاڭدا مۇسىلمان اقساقالدار كەڭەسى بارلىق دىندەردىڭ ديالوگىن نىعايتۋ جولىنداعى جۇمىستى بەلسەندى جۇرگىزىپ وتىر. ءبىز كەڭەس پەن الەمدىك جانە ءداستۇرلى دىندەر ليدەرلەرى سەزىنىڭ جاھاندىق وزەكتى ماسەلەلەردى شەشۋ ىسىندە ءدىن ليدەرلەرىنىڭ الەۋەتىن پايدالانۋ جونىندەگى ىنتىماقتاستىعىن قۇپتايمىز. بىرلەسكەن كۇش-جىگەردىڭ ارقاسىندا كونفەسسياارالىق جانە وركەنيەتارالىق ديالوگتى نىعايتۋعا ىقپال ەتەمىز دەپ سەنەمىز», دەدى سەنات توراعاسى.
مۇحاممەد ابدەلسالام قازاقستاننىڭ توزىمدىلىك پەن كەلىسىم سياقتى قۇندىلىقتاردى دارىپتەۋ باعىتىندا اتقارىپ كەلە جاتقان جۇمىسىن جوعارى باعالادى. سونداي-اق ول الەمدىك جانە ءداستۇرلى دىندەر ليدەرلەرىنىڭ سەزى اياسىندا كەڭەسپەن بەلسەندى ءىس-قيمىل قالىپتاسقانى ءۇشىن ريزاشىلىعىن ءبىلدىرىپ, ءوزارا ىنتىماقتاستىقتى ودان ءارى نىعايتۋعا دايىن ەكەنىن جەتكىزدى.
