مەملەكەت باسشىسىنا بىلتىر كونستيتۋتسيالىق سوتقا بەس مىڭنان استام ءوتىنىش, ونىڭ 99 پايىزى ازاماتتاردان كەلىپ تۇسكەنى جونىندە باياندالدى. ەلۆيرا ازيموۆانىڭ ايتۋىنشا, ازاماتتار ءوز وتىنىشتەرىندە سوت اكتىلەرىنە, لاۋازىمدى تۇلعالار مەن سۋديالاردىڭ ءىس-ارەكەتتەرىنىڭ زاڭدىلىعىنا, قىلمىستىق جازانىڭ تۇرلەرى مەن شارتتارىنا, قىلمىستىق قۋدالاۋ كەزىندە ادام قۇقىقتارىنىڭ ساقتالۋىنا, ەڭبەك جانە اكىمشىلىك-قۇقىقتىق قاتىناستاردا قۇقىقتىڭ قورعالۋىنا قاتىستى ماسەلەلەردى كوتەرگەن.
كونستيتۋتسيالىق سوتتارى بار مەملەكەتتەردىڭ بارىنە ءتان نەگىزگى ۇستانىم – ازاماتتاردىڭ كونستيتۋتسيالىق سوت تورەلىگىنە جۇگىنۋىن شەكتەمەۋ جانە قارجىلىق كەدەرگىلەردى الىپ تاستاۋ. وسىعان وراي مەملەكەت باسشىسى بىلتىر جەلتوقسان ايىندا كونستيتۋتسيالىق سوتقا جۇگىنگەن كەزدە تولەيتىن مەملەكەتتىك باج سالىعىن نولدىك مولشەرلەمەگە دەيىن تومەندەتۋدى قاراستىراتىن زاڭعا قول قويدى.
سونىمەن قاتار قاسىم-جومارت توقاەۆقا كونستيتۋتسيالىق ءىس جۇرگىزۋ اياسىندا ازاماتتارعا كەپىلدى زاڭ كومەگىن بەرۋ شارتتارى, سونداي-اق قۇقىقتىق مونيتورينگ پەن زاڭ شىعارۋ قىزمەتى شەڭبەرىندە كونستيتۋتسيالىق سوت قابىلداعان شەشىمدەردى جانە سوت پراكتيكاسىنىڭ شولۋىن ەسكەرۋ تۋرالى ۇسىنىستار قازىرگى ۋاقىتتا پارلامەنت ءماجىلىسىنىڭ قاراۋىندا جاتقانى باياندالدى.
مەملەكەت باسشىسىنا بەرىلگەن مالىمەتكە سايكەس بىلتىر 558 قۇقىق نورماسى تەكسەرىلىپ, ناتيجەسىندە 29 نورماتيۆتىك-قۇقىقتىق اكتىگە وزگەرىستەر ەنگىزۋ جونىندە كەڭەس بەرىلدى. كونستيتۋتسيالىق سوت قىلمىستىق-پروتسەسسۋالدىق, سالىق كودەكستەرىنىڭ جانە بىرقاتار زاڭنىڭ جەكەلەگەن نورمالارىن قايتا قاراۋ جونىندە ۇسىنىستارىن بەردى. بۇگىندە ۇكىمەت پەن ۋاكىلەتتى ورگاندار اتالعان ۇسىنىمداردىڭ 16 پايىزدان استامىن ورىندادى.
پرەزيدەنت كونستيتۋتسيالىق سوتتىڭ 2023 جىلى اتقارعان جۇمىستارىنىڭ قورىتىندىسىن باعالاي وتىرىپ, اتالعان ورگاننىڭ قۇرىلۋى جانە ونىڭ قىزمەتى قازاقستان رەسپۋبليكاسى كونستيتۋتسياسىنىڭ مۇلتىكسىز ساقتالۋىن قامتاماسىز ەتۋگە, ادام مەن ازاماتتاردىڭ قۇقىقتارىن, بوستاندىعىن قورعاۋعا قاتىستى قوعام مەن مەملەكەتتىڭ سۇرانىسىنا ساي كەلەتىنىن ايتتى.
