2024 جىلعى 7 اقپاندا تۇركىستان وبلىسىنىڭ اكىمدىگى وتكىزگەن كونكۋرستىڭ قورىتىندىسى بويىنشا «ورتالىق ازيا» حالىقارالىق ونەركاسىپتىك كووپەراتسيا ورتالىعى قۇرىلىسىنىڭ نەگىزگى ينۆەستورى «TCL Gr.» جشس بولدى. يندۋستريالىق ايماقتى باسقارۋعا بەرۋ ءۇشىن ينۆەستوردىڭ جانە تۇركىستان وبلىسى اكىمدىگىنىڭ قاتىسۋىمەن زاڭدى تۇلعا قۇرۋ راسىمدەرى باستالدى.
وتىرىستا قازاقستان مەن وزبەكستان شەكاراسىندا حاب سالۋ جونىندەگى جوبانى ىسكە اسىرۋ ماسەلەلەرىندە بەلسەندى ىلگەرىلەۋ بايقالدى. ماسەلەن, 2024 جىلعى 15 اقپاندا سىرداريا وبلىسىندا تاراپتار «ورتالىق ازيا» حالىقارالىق ونەركاسىپتىك كووپەراتسيا ورتالىعىن قۇرۋدى جەدەلدەتۋ جايىن, دامۋ جوسپارلارىن, ينفراقۇرىلىمدى جانە حابتى تولتىرۋدى تالقىلادى. ينۆەستور تۇركىستان وبلىسىنىڭ اكىمدىگىمەن بىرلەسىپ ونەركاسىپ كووپەراتسياسى ورتالىعىن دامىتۋ تۇجىرىمداماسىن ازىرلەدى. نىساننىڭ قۇرىلىسىن بيىل باستاۋ جوسپارلانىپ وتىر. حشىو شەكارا ماڭىنداعى اۋماقتا قازاقستان تاراپىنان «اتامەكەن» جانە وزبەكستان تاراپىنان «گۇلستان» حالىقارالىق وتكىزۋ بەكەتتەرى اۋدانىندا سالىنادى.
سونداي-اق «TCL Gr.» وزبەكستاندىق «Global Textile» كومپانياسىمەن ىنتىماقتاستىق تۋرالى مەموراندۋم جاساستى. بۇل – دايىن توقىما ونىمدەرىن وندىرۋگە باعىتتالعان حشىو-نىڭ العاشقى ينۆەستيتسيالىق جوباسى. كەزدەسۋ قورىتىندىسى بويىنشا قازاقستان مەن وزبەكستاننىڭ كورشىلەس وبلىستارى اكىمدەرىنىڭ ورىنباسارلارى ونەركاسىپ كووپەراتسياسى ورتالىعىن جەدەل قۇرۋ جونىندەگى جول كارتاسىنا قول قويدى.
كاسپي تورابىنىڭ قۇرىلىسىنا ەرەكشە نازار اۋدارىلدى. اتاپ ايتقاندا, «سارجا» كوپفۋنكتسيونالدى تەڭىز تەرمينالى سالىنىپ جاتقان قۇرىق پورتىندا تەڭىز ءتۇبىن تەرەڭدەتۋ جۇمىستارىن جۇرگىزۋ كەزىندە تۋىنداعان پروبلەمالارعا نازار اۋدارىلدى. بۇل ءىس-شارالار كاسپي تەڭىزى دەڭگەيىنىڭ تومەندەۋىنە بايلانىستى جۇرگىزىلىپ جاتىر, سونداي-اق ىشكى اكۆاتوريادا ءجۇزۋ قاۋىپسىزدىگىن قامتاماسىز ەتۋ جانە جاڭا ايلاقتار سالۋ ءۇشىن قاجەت. جۇمىستار ساۋدا ماقساتىندا تەڭىزدە ءجۇزۋدىڭ ەكونوميكالىق تيىمدىلىگىنە, قازاقستاننىڭ ەكسپورتتىق-يمپورتتىق جانە ترانزيتتىك الەۋەتىنە تىكەلەي اسەر ەتەدى.
كەڭەسكە قاتىسۋشىلار تەرەڭدەتۋ جۇمىستارىن تەزىرەك باستاۋ ءۇشىن بارلىق قاجەتتى ءراسىمدى جەدەلدەتۋگە كەلىستى.
سونىمەن قاتار جەدەل شتاب وتىرىسىندا باسقا شەكارا ماڭى حابتارىنىڭ, اتاپ ايتقاندا, «ەۋرازيا» ترانسشەكارالىق ساۋدا ورتالىعى, «الاتاۋ» يندۋستريالىق, ساۋدا-لوگيستيكالىق ورتالىعى, قورعاس تورابى جانە «كولجات» قۇرعاق پورتى قۇرىلىسىنىڭ بارىسى تىڭدالدى.
