بيىلعى 1 اقپانداعى دەرەككە سۇيەنسەك, مەملەكەتتىك الەۋمەتتىك ساقتاندىرۋ قورىنان (ماسق) جۇمىسىنان ايىرىلۋىنا بايلانىستى الەۋمەتتىك تولەم الۋشىلاردىڭ سانى 79,1 مىڭ ادامعا جەتتى. بۇل رەتتە بيىل 25 مىڭ ادامعا اتالعان تولەم العاش رەت تاعايىندالدى. تولەمدەردىڭ جالپى سوماسى 5,7 ملرد تەڭگەنى قۇرادى.
قولدانىستاعى زاڭناماعا سايكەس جۇمىستان بوساتىلعان جۇمىسكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە كەيىنگى 24 ايداعى تابىسىنا بايلانىستى 1 ايدان 6 ايعا دەيىن جۇمىسىنان ايىرىلۋى بويىنشا الەۋمەتتىك تولەمدەر الادى. تولەم جوعالعان كىرىستىڭ 45%-ىنا دەيىنگى مولشەردە ماسق قاراجاتى ەسەبىنەن بەرىلەدى. تولەم تاعايىنداۋ ءۇشىن جۇمىستان بوساتىلعان جۇمىسكەرگە eGov.kz پورتالىندا ءوتىنىمدى جىبەرۋ قاجەت. ولارعا ءبىر كۇن ىشىندە تۇرعىلىقتى جەرىندەگى مانساپ ورتالىعى بوس جۇمىس ورىندارىن ۇسىنادى. ەگەر جۇمىس تابىلماسا, ءۇش جۇمىس كۇنى ىشىندە قاشىقتان جۇمىسسىز مارتەبەسى بەرىلەدى. بۇل قىزمەتتى ونلاين رەجىمىندە ەلەكتروندىق ەڭبەك بيرجاسى (enbek.kz) ارقىلى دا الۋعا بولادى.
ماسق قاراجاتى ەسەبىنەن جۇمىسىنان ايىرىلعان جاعدايدا تولەنەتىن الەۋمەتتىك تولەم جۇمىستان شىعۋ سەبەپتەرىنە قاراماستان جۇزەگە اسىرىلادى جانە بۇل جۇمىسسىز ادامدى جۇمىس ىزدەگەن كەزەڭدە قولداۋعا ارنالعان.
مەملەكەت باسشىسىنىڭ 2022 جىلدىڭ 1 قىركۇيەگىندەگى جولداۋىندا ايتىلعان تاپسىرماسىن ىسكە اسىرۋ ماقساتىندا بىلتىردان باستاپ جوعالعان تابىستى الماستىرۋ كوەففيتسيەنتى 40%-دان 45%-عا دەيىن ۇلعايتىلدى. بۇل رەتتە تولەم تاعايىنداۋدىڭ اعىمداعى ءتارتىبى ساقتالدى جانە جۇمىسىنان ايىرىلعان جانە جۇمىسسىز مارتەبەسىن العان الەۋمەتتىك ساقتاندىرۋ جۇيەسىنە قاتىسۋشىلارعا عانا قولدانىلادى.
بۇدان بۇرىن حابارلانعانداي, ەڭبەك جانە حالىقتى الەۋمەتتىك قورعاۋ مينيسترلىگى ەلەكتروندىق ەڭبەك بيرجاسى ارقىلى حالىقتى جۇمىسپەن قامتۋ ورتالىقتارىنىڭ قاشىقتان قىزمەت كورسەتۋ فۋنكتسيونالىن ىسكە قوستى. بۇل جۇمىسسىزداردى تىركەۋ جانە ازاماتتاردىڭ جۇمىسپەن قامتۋدى قولداۋ بويىنشا مەملەكەتتىك قىزمەتتەردى, ونىڭ ىشىندە جۇمىسىنان ايىرىلۋ بويىنشا الەۋمەتتىك تولەمدەردى الۋ راسىمدەرىن جەڭىلدەتۋگە مۇمكىندىك بەردى. ەندى بارلىعىن تەك ينتەرنەت, كومپيۋتەر جانە ەلەكتروندىق تسيفرلىق قولتاڭبا ارقىلى عانا جاساۋعا بولادى.
