سۋرەتتەر پەدياتريا جانە بالالار حيرۋرگياسى عىلىمي ورتالىعىنىڭ رۇقساتىمەن جاريالاندى.
وكىنىشكە قاراي, اتا-اناسى, ۇيدەگى ەرەسەك ادامدار قاۋىپتى حيميالىق, ىستىق نەمەسە تۇرمىستىق زاتتاردى دۇرىس ساقتاماۋدىڭ سالدارىنان كىشكەنتاي بالالاردىڭ تاماعى, اسقازانى كۇيىپ قالاتىن وقيعالار از ەمەس. وسىنىڭ كەسىرىنەن بالالاردىڭ 70-80%-دا وڭەش تىرتىعى پايدا بولىپ, تارىلادى. وڭەش تىرتىعى تارىلعان بالالارعا العاشقى كەزدە گاستروستوما سالىنىپ, جىپپەن, ارنايى بۋج ارقىلى ۇزاق ۋاقىت سۇمبىلەيدى. بىراق 20-30% جاعدايدا وڭەش بويى تۇگەل تىرتىقتانعاندىقتان, سۇمبىلەۋ ءادىسىن قولدانۋ قيىن. وسىنىڭ سالدارىنان كەيبىر بالالار مۇگەدەكتىككە دۋشار بولسا, كەيدە كوز جۇماتىن كەزدەرى دە بولادى.
ال جىل سايىن پەدياتريا جانە بالالار حيرۋرگياسى عىلىمي ورتالىعىنا ەلىمىزدىڭ ءار وڭىرىنەن وڭەشىنە زاقىم كەلگەن 100-دەن اسا بالا كەلىپ تۇسەدى. سول سياقتى جۋىردا پەدياتريا جانە بالالار حيرۋرگياسى عىلىمي ورتالىعىنا قىزىلوردا وبلىسىنان «وڭەشتىڭ كۇيىكتەن كەيىنگى تىرتىقتى تارىلۋى» دياگنوزىمەن 3 جاسار قىز بالا شۇعىل جەتكىزىلگەن ەدى. ەسى كىرمەگەن ءسابي «چيستىي كازان» دەگەن سۇيىقتىقتى ءىشىپ قويعان. كۇيىكتەن بالانىڭ وڭەش ساڭىلاۋى تولىعىمەن تىرتىقتانىپ قالعاندىقتان, باستاپقىدا ول ءىشتىڭ الدىڭعى قابىرعاسىنان شىعارىلعان اسقازانداعى ارنايى تۇتىك ارقىلى تاماقتاندىرىلعان. سوندىقتان كلينيكادا وڭەشتى تولىعىمەن توق ىشەكپەن الماستىرۋ وپەراتسياسىن جاساۋعا تۋرا كەلدى. جىلىنا ورتا ەسەپپەن ءدال وسىنداي 6-7 وپەراتسيا ءارتۇرلى ءادىستى قولدانا وتىرىپ جاسالادى.
بۇل وپەراتسيانىڭ بىرەگەيلىگى – ماماندار اس وتپەيتىن وڭەشتى توق ىشەكپەن الماستىردى. وپەراتسيا 6 ساعاتقا سوزىلىپ, توق ىشەكتىڭ ءبىر بولىگى كەۋدە قۋىسى ارقىلى جۇرگىزىلىپ, مويىنداعى وڭەشتىڭ جۇتقىنشاق بولىگىمەن جالعاستىرىلدى. مۇنداي وپەراتسيالار زەرگەرلىك دالدىك پەن ۇلكەن ماشىقتى تالاپ ەتەتىندىكتەن, وپەراتسيانى ءۇش بىردەي بىلىكتى حيرۋرگ – حيرۋرگيا ءبولىمىنىڭ مەڭگەرۋشىسى ءمولدىر قالاباەۆا, نۇرجان افلاتونوۆ پەن نىشانبەك شىلانباەۆ جاسادى.
قازىرگى تاڭدا مادينا ەسىمدى كىشكەنتاي پاتسيەنتتىڭ دەنساۋلىعى دۇرىستالدى, دارىگەرلەردىڭ جوسپارلى باقىلاۋىندا تۇر. وڭەشتىڭ قىزمەتىن ەندى توق ىشەكتىڭ ءبىر بولشەگى اتقارا الاتىندىقتان, وزدىگىنەن تاماقتانا الادى.
جالپى, جىل سايىن پەدياتريا جانە بالالار حيرۋرگياسى عىلىمي ورتالىعىندا ەلىمىزدىڭ ءار وڭىرىنەن كەلگەن, اس قورىتۋ جولدارىندا ءتۋابىتتى مەن جانە جۇرە كەلە پايدا بولعان اۋرۋلارى بار 400-دەن اسا بالاعا كۇردەلى وپەراتسيا جاسالادى. ماماندار تۇرمىستىق حيميالىق زاتتاردىڭ دۇرىس ساقتالماۋىنان, ەسى ءالى كىرمەگەن بالالار ءىشىپ قويىپ, جوعارىداعىداي اۋىر دياگنوزدارعا دۋشار بولىپ جاتقانىن ايتادى.
الماتى
