«قازاقستانداعى بريتان كەڭەسى ۇسىنعان سۋرەت»
بريتان كەڭەسى – ۇلىبريتانيانىڭ مادەني بايلانىستار مەن ءبىلىم بەرۋ مۇمكىندىكتەرىن ۇسىناتىن حالىقارالىق ۇيىمى. ول قازاقستان ۇكىمەتىنىڭ ونەر, كرەاتيۆتى ەكونوميكا, ءبىلىم جانە اعىلشىن ءتىلى سالالارىنداعى ۇستانعان باعىتىنا سايكەس جەكەلەگەن ادامدارعا جانە مەكەمەلەرگە شىعارماشىلىق يدەيالاردى زەرتتەۋگە جانە ىسكە اسىرۋعا, جوعارى ساپالى ءبىلىم الۋ مەن الەمدىك دەڭگەيدە بىلىكتىلىككە يە بولۋ جولىندا ۇلىبريتانيامەن بايلانىس قۇرۋعا مۇمكىندىك بەرەدى.
بريتان كەڭەسىنىڭ جاھاندىق سەرىكتەستىكتەردى دامىتۋ باعدارلاماسى (Going Global Partnerships programme) الەم بويىنشا ۋنيۆەرسيتەتتەرگە, كوللەدجدەرگە جانە وزگە دە ءبىلىم بەرۋ مەكەمەلەرىنە قۋاتتى, ءادىل, ينكليۋزيۆتى جوعارى ءبىلىم بەرۋدە حالىقارالىق بايلانىستى كۇشەيتە وتىرىپ, عىلىم, تەحنيكا, كاسىپتىك ءبىلىم مەن وقىتۋ باعىتىندا بىرلەسىپ جۇمىس ىستەۋگە قولداۋ كورسەتەدى. 2021 جىلدان باستاپ قازاقستاندا اتالعان باعدارلامانىڭ ءبىر باعىتى بولىپ سانالاتىن ۇلىبريتانيا مەن قازاقستان ۋنيۆەرسيتەتتەرى اراسىنداعى ترانسۇلتتىق ءبىلىم بەرۋدى (TNE) دامىتۋعا باعىتتالعان InterLinks (ينتەرلينكس) شاعىن گرانتتار جوباسى ىسكە اسىرىلىپ كەلەدى. بۇل فاكۋلتەتارالىق باعدارلاما جەرگىلىكتى ۋنيۆەرسيتەتتەرگە ەكىجاقتى بايلانىستاردى كۇشەيتە وتىرىپ, ۇلىبريتانياداعى ارىپتەستەرىمەن تىعىز بايلانىس ورناتۋعا مۇمكىندىك بەرەدى. جوبا قوس ديپلوم, بىرلەسكەن عىلىمي ىنتىماقتاستىق, قاشىقتىقتان وقىتۋ مەن وقىتۋدا تسيفرلىق تەحنولوگيالاردى پايدالانۋ, ستۋدەنتتەر مەن قىزمەتكەرلەردىڭ ۇتقىرلىعىن ارتتىرۋ سياقتى سەرىكتەستىككە نەگىزدەلگەن.
سونىمەن قاتار InterLinks جوباسى كاسىپكەرلىك داعدىلارى مەن كرەاتيۆتى يندۋستريالاردى دامىتۋعا باعىتتالعان جانە بەس جىل بويى ءساتتى جۇزەگە اسىرىلىپ كەلە جاتقان Creative Spark (كرەاتيۆتى باستاۋ) باعدارلاماسىمەن دە بايلانىستى. بۇل باعدارلاما ۇلىبريتانيا مەن 7 ەلدىڭ 110 ۋنيۆەرسيتەتى مەن شىعارماشىلىق ينستيتۋتى اراسىنداعى سەرىكتەستىكتى دامىتۋعا باعىتتالعان. قازاقستانمەن 9 سەرىكتەستىك قۇرىلدى. ولاردىن 5-ەۋى InterLinks جوباسى اياسىندا ۇلىبريتانيا ۋنيۆەرسيتەتتەرىمەن ىنتىماقتاستىعىن جالعاستىرۋدا.
ءۇش جىل ىشىندە InterLinks 22 سەرىكتەستىككە قولداۋ كورسەتىپ, شامامەن 220 000 فۋنت ستەرلينگ مولشەرىندەگى قاراجاتىن گرانت رەتىندە ءبولدى. بىرقاتار سەرىكتەستىكتىڭ ءوزارا جۇمىسىنا توقتالا كەتسەك, لوندون ۋنيۆەرسيتەتىنىڭ شىعىستانۋ جانە افريكاتانۋ مەكتەبى ءال-فارابي اتىنداعى قازاق ۇلتتىق ۋنيۆەرسيتەتىمەن جانە ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىمەن ىنتىماقتاسا وتىرىپ, ۇلىبريتانيانىڭ وزىق تاجىريبەسى نەگىزىندە دوكتورانتتار مەن عىلىمي قىزمەتكەرلەرگە ارنالعان زەرتتەۋ ادىستەمەسى كۋرسىن ازىرلەدى جانە قاناتقاقتى تۇردە وتكىزدى. گلازگو ۋنيۆەرسيتەتى ق.ساتباەۆ ۋنيۆەرسيتەتىمەن ينجەنەرلىك ماگيستر دارەجەسىن وقىتۋدى قاراستىرىپ جاتسا, قازاق ۇلتتىق قىزدار پەداگوگيكالىق ۋنيۆەرسيتەتى ساسسەكس ۋنيۆەرسيتەتىمەن جوعارى ءبىلىم بەرۋ مەكتەبىنىڭ ۇلگىسىن جەتىلدىرۋ جانە جاڭا جوعارى ءبىلىم بەرۋ كۋرستارىن بىرلەسىپ جوبالاۋ نەمەسە بىرلەسكەن دوكتورانتۋرا باعدارلامالارىن ىسكە اسىرۋ مۇمكىندىكتەرىن قاراستىرىپ كەلەدى. الايدا InterLinks جوباسى اياسىنداعى سەرىكتەستىك تەك ۇلتتىق ۋنيۆەرسيتەتتەرمەن ىنتىماقتاسۋمەن شەكتەلمەگەن. مىسالى, قاراعاندى يندۋستريالىق ۋنيۆەرسيتەتى پورتسمۋت ۋنيۆەرسيتەتىنىڭ كومەگىمەن بىرلەسكەن عىلىمي جوبالاردىڭ ستراتەگياسىن جانە قىزمەتكەرلەر مەن ستۋدەنتتەر الماسۋ مەحانيزمدەرىن قايتا قاراستىردى. قازىرگى ۋاقىتتا ولستەر ۋنيۆەرسيتەتى (سولتۇستىك يرلانديا) ا.بايتۇرسىن ۇلى اتىنداعى قوستاناي وڭىرلىك ۋنيۆەرسيتەتىمەن اعىلشىن تىلىندە بىرلەسكەن ماگيستر باعدارلاماسىن وقىتۋعا ۋاعدالاستى.
وسىلايشا, InterLinks جوباسى ەكى ەل ۋنيۆەرسيتەتتەرىنىڭ اراسىندا بۇرىن-سوڭدى بولماعان سەرىكتەستىك مۇمكىندىكتەرىن تۋدىرىپ وتىر. 2023 جىلعى InterLinks جوباسىنىڭ ىسكە اسۋىن باعالاۋ ەسەبىنە قاتىسقان بريتاندىق رەسپوندەنتتەردىڭ بىرقاتارى InterLinks-كە دەيىن ولار قازاقستاندى قاراستىرماعانىن ايتسا, ال قازاقستاندىق قاتىسۋشىلار بۇل جوبا وسىعان دەيىن ۇلىبريتانيامەن سەرىكتەستىك ورناتۋداعى ساتسىزدىكتەردى جويىپ, ءوزارا ىنتىماقتاستىققا جول اشقانىن بىلدىرگەن.
كەز كەلگەن ەل ءۇشىن شەتەلدىك ۋنيۆەرسيتەتتەردىڭ كامپۋستارىن اشۋ ءبىلىم سالاسىنىڭ بەدەلىن ارتتىرىپ, وسى سالادا اتقارىلىپ جاتقان جۇمىستاردىڭ ناتيجەسىن كورسەتەدى. الايدا ترانسۇلتتىق ءبىلىم بەرۋ ستراتەگياسى اياسىندا ۇلىبريتانيا ۋنيۆەرسيتەتتەرىنىڭ كوپشىلىگى از كاپيتالدى قاجەت ەتەتىن, تاۋەكەلى تومەن باعىتتاردى ىزدەيدى. وسى ستراتەگيالاردى ۇستانا وتىرىپ, ورناتىلعان ەكىجاقتى سەرىكتەستىكتىڭ بىردەن-ءبىر مىسالى رەتىندە 2023 جىلى ا.جۇبانوۆ اتىنداعى اقتوبە وڭىرلىك ۋنيۆەرسيتەتىندە حەريوت-ۋاتت ۋنيۆەرسيتەتىنىڭ قوس ديپلومدىق ءۇش باعدارلاماسىنىڭ ىسكە قوسىلۋىن ايتۋعا بولادى. حەريوت-ۋاتت ۋنيۆەرسيتەتى 2021 جىلدان بەرى InterLinks جوباسىنىڭ سەرىكتەسى رەتىندە قازاقستاندىق ۋنيۆەرسيتەتتەرمەن ارىپتەستىك ورناتۋدى كوزدەگەن بولاتىن. ناتيجەسىندە, ايماقتىق ۋنيۆەرسيتەتپەن تابىستى ىنتىماقتاستىق ورناتىلىپ, 300 ستۋدەنتكە قازاقستان ۇكىمەتىنىڭ گرانتتىق قولداۋى قامتاماسىز ەتىلدى. وسىلايشا, اتالعان ۋنيۆەرسيتەتتىڭ ستۋدەنتتەرى الەمگە ايگىلى بريتاندىق ۋنيۆەرسيتەت جۇيەسى بويىنشا ءبىلىم الىپ, قوس ديپلوم الۋ مۇمكىندىگىنە يە بولدى.
بۇل بريتان كەڭەسىنىڭ InterLinks شاعىن جوباسى قازاقستان ۇكىمەتىنىڭ قولداۋى ارقاسىندا اۋقىمدى ۇلتتىق جوباعا اينالىپ, ەكى ەل اراسىندا ماڭىزدى ءبىلىم بەرۋ باعدارلامالارىن ىسكە اسىرۋعا نەگىز بولعانىن كورسەتەدى.
وسى ورايدا بيىل 29 اقپان مەن 1 ناۋرىز ارالىعىندا بريتان كەڭەسى ينتەرناتسيالاۋ جانە حالىقارالىق سەرىكتەستىكتەردىڭ ساپاسىن قامتاماسىز ەتۋ تاسىلدەرىنە ارنالعان فورۋم وتكىزەدى. فورۋم بارىسىندا پلەنارلىق سەسسيالار ۇيىمداستىرىلادى جانە ۇلىبريتانيانىڭ ساپانى قامتاماسىز ەتۋ اگەنتتىگى (Quality Assurance Agency) ترەنينگ ۇيىمداستىراتىن بولادى. سونىمەن قاتار بريتان كەڭەسى 7 ەلدە, سونىڭ ىشىندە قازاقستاندا دا جۇرگىزىلگەن ترانسۇلتتىق ءبىلىم بەرۋ بويىنشا ايماقتىق زەرتتەۋلەرىن ۇسىنادى. بۇل زەرتتەۋ قازاقستانداعى ترانسۇلتتىق ءبىلىم ساياساتىن ەگجەي-تەگجەيلى تالداۋدىڭ جانە ونى 2024 جىلى ودان ءارى جەتىلدىرۋدىڭ باستاماسى سانالادى.
نادەجدا ترۋبوۆا,
قازاقستانداعى بريتان كەڭەسى ءبىلىم باعدارلامالارىنىڭ جەتەكشىسى
