پارسى شىعاناعىندا قىتاي ەلىنىڭ وكىلدەرى 33 رەت جەڭىس تۇعىرىنا كوتەرىلدى. تارقاتىپ ايتساق, ولار 23 التىن, 8 كۇمىس جانە 2 قولانى ولجالاپ, جالپى ەسەپتە جەكە-دارا كوش باستادى. ەكىنشى ورىندى اقش قۇراماسى ولجالادى. ولار 23 جۇلدەگە (9 التىن+6 كۇمىس+8 قولا) قول جەتكىزدى. ۇزدىك ۇشتىكتى اۋستراليا تۇيىندەدى. جاسىل قۇرلىقتىڭ وكىلدەرى 24 مەدالدى (7+12+5) موينىندا جارقىراتتى. سونداي-اق توپ-10-دىقتىڭ قاتارىندا نيدەرلاند (5+4+0), ۇلىبريتانيا (4+5+9), يتاليا (3+10+6), كانادا (2+3+6), وڭتۇستىك كورەيا (2+1+2) جانە جاڭا زەلانديا مەن شۆەتسيا (2+1+1) قۇرامالارى بار. بۇل جارىستا 23 مەملەكەتتىڭ ءانۇرانى شىرقالىپ, 34 ەلدىڭ تۋى كوكتە جەلبىرەدى.
ءبىر-ءبىر التىننان ولجالاعان قازاقستان مەن حورۆاتيانىڭ سپورتشىلارى جالپىەسەپتە 22-23-ورىنداردى ءوزارا ءبولىستى. بالقان تۇبەگىنەن كەلگەن كوماندانىڭ ابىرويىن اسىرعان ۆاتەرپولشى جىگىتتەر بولسا, قازاق ەلىنىڭ ءانۇرانىن شىرقاتقان – نارگيز بولاتوۆا مەن ەدۋارد كيم. ولاردىڭ ەكەۋى دە – بولاشاعىنان زور ءۇمىت كۇتتىرەتىن جاس ورەندەر. نارگيزدىڭ جاسى – 20-دا, ەدۋارد – نەبارى 18-دە. ارتىستىك ءجۇزۋدىڭ تەحنيكالىق باعدارلاماسى بويىنشا ارالاس جۇپتار سايىسىندا ونەر كورسەتكەن وتانداستارىمىز قاتاردىڭ استاناسىندا نەبىر مىقتىلاردى ارتقا تاستاپ, باس جۇلدەنى يەلەندى. بۇل – قازاقستاننىڭ سۋ سپورتى تاريحىنداعى الەم چەمپيوناتىنىڭ تۇڭعىش التىنى. بولاتوۆا مەن كيمگە دەيىن بىردە-ءبىر جەرلەسىمىز بۇل بەلەستى باعىندىرا الماعان ەدى.
جارىس اياقتالعاننان سوڭ باق وكىلدەرىنە بەرگەن سۇحباتىندا نارگيز بەن ەدۋارد: «تورتكۇل دۇنيەنىڭ تەڭدەسسىزدەرى جينالعان جارىستا جەڭىس تۇعىرىنا كوتەرىلۋ, ارينە, وڭاي شارۋا ەمەس. ءبىز ەرەن ەڭبەك پەن جانكەشتى جاتتىعۋ ارقىلى وراسان زور تابىسقا قول جەتكىزدىك. بۇل رەتتە باپكەرلەردىڭ دە وسى جەڭىسكە قوسقان ۇلەسى سۇبەلى. شىنى كەرەك, ءبىز دوحادا التىن الامىز دەپ ەش ويلاعان جوقپىز. بىراق جەڭىس تۇعىرىنا كوتەرىلۋدى ارمانداعانىمىز راس. كەۋدە تۇپكىرىندە ءبىر ءۇمىت بولدى. سول اسقاق ارمان مەن ۇكىلى ءۇمىت كوز ارباعان بيىكتەرگە جەتەلەدى. اقىرى بىزگە جەر-جاھاننىڭ مىقتىلارى جينالعان جارىستا قازاقستاننىڭ ءانۇرانىن شىرقاتۋ باقىتى بۇيىردى. بىراق بۇل تابىسقا توقمەيىلسىپ, قول قۋسىرىپ, بەيجاي وتىراتىن جايىمىز جوق. الدا ءالى دە كوپتەگەن ءدۇبىرلى دودا بار. ەندى جاتپاي-تۇرماي سوعان دايارلانامىز. كەيىنگى كەزدەرى تەحنيكالىق ارالاس جۇپتار سايىسى وليمپيادانىڭ باعدارلاماسىنا ەنەتىنى جايىندا اڭگىمەلەر ءجيى ايتىلىپ ءجۇر. بۇل بەكەر ەمەس شىعار. «جەل سوقپاسا, ءشوپتىڭ باسى قيمىلدامايتىنى» بەلگىلى عوي. 2028 جىلى لوس-اندجەلەستە الاۋى تۇتاناتىن جازعى ويىندارعا دەيىن وسى ماسەلە وڭ شەشىمىن تاپسا, تاماشا بولار ەدى. بۇل – وسى سپورت ءتۇرىن سەرىك ەتكەن بارشا ۇل-قىزداردىڭ ارمانى. ەگەر ءبارى ءبىز ويلاعانداي بولسا, وندا جاھاندىق دودادا دا دارالانۋ ءۇشىن ەش ايانىپ قالمايتىنىمىز انىق», دەپ اقتارىلا سويلەدى.
وتكەنگە زەر سالساق, سۋ سپورتىنان الەم چەمپيوناتى 1973 جىلدان بەرى ۇزدىكسىز ۇيىمداستىرىلىپ كەلەدى. سول كەزدەن بەرى 25 جارىستىڭ جالاۋى جەلبىرەدى. بىراق جارتى عاسىردان اسا ۋاقىت ارالىعىندا قازاقستاننىڭ ورەندەرىنە جالعىز قولا مەدال بۇيىرعان ەدى. سونىڭ وزىنە بىلتىر عانا قول جەتكىزە الدىق. اتالعان جۇلدەنىڭ يەگەرى – الماتى قالاسىندا ورنالاسقان قاركەن احمەتوۆ اتىنداعى سپورتتاعى دارىندى بالالارعا ارنالعان مەكتەپ-ينتەرنات-كوللەدجدىڭ وقۋشىسى ەدۋارد كيم. بىلىكتى مامان ەرنار ىبىرايىموۆ جەتەكشىلىك ەتەتىن قازاق سپورتىنىڭ قارا شاڭىراعىنىڭ تۇلەگى جاپونيانىڭ فۋكۋوكا قالاسىندا ارتىستىك ءجۇزۋدىڭ تەحنيكالىق باعدارلاماسىنىڭ جەكەلەگەن سايىسىندا قولا مەدالدى موينىندا جارقىراتتى. سونداي-اق كۇنى كەشە عانا پارسى شىعاناعىندا كيممەن بىرگە جۇپتاسىپ ونەر كورسەتىپ, التىننان القا تاققان قازاق قىزى نارگيز بولاتوۆا بىلتىر ءدال سول كوللەدجدى تامامداعان.
ال وعان دەيىن ناتيجەلەرگە كەلەتىن بولساق, 2015 جىلى دميتري ءبالانديننىڭ جەڭىس تۇعىرىنا كوتەرىلۋگە زور مۇمكىندىگى بولدى. تاتارستاننىڭ قازان قالاسىندا جالاۋى جەلبىرەگەن جارىستىڭ 100 مەترگە براسس ادىسىمەن ءجۇزۋ سايىسىندا ول باستى قارسىلاستارىنان ءسال عانا قالىپ قويىپ, ءتورتىنشى ورىندى قاناعات تۇتتى. ەسەسىنە كەلەسى جىلى وتانداسىمىز ريو وليمپياداسىندا ايدى اسپانعا ءبىر-اق شىعارىپ, التىن تۇعىردان قول بۇلعادى. ەل ماقتانىشىنا اينالعان بالاندين 2015 جىلى قازاندا التىنشى ورىن السا, 2019 جىلى كۆاندجۋدا ەكى رەت جەتىنشى ساتىعا تۇراقتادى. سونداي-اق 2017 جىلى بۋداپەشتەگى باسەكەدە قازاقستاننىڭ تاعى ءبىر ءجۇزۋشىسى ۆيتالي حۋدياكوۆ ۇزدىك جەتى سپورتشىنىڭ قاتارىنان كورىندى. مىنە, سۋ سپورتىنداعى ەڭ ۇزدىك ناتيجەلەرىمىز – وسى.
