پرەزيدەنت مەملەكەتتىڭ ءارتاراپتى دامۋى ءۇشىن ماڭىزدى ماسەلەلەردى كوتەرىپ, ۇكىمەت پەن ايماق باسشىلارىنىڭ, ءتيىستى مينيسترلىكتەردىڭ الدىنا جاڭا مىندەتتەر قويدى. ق.توقاەۆ ەكونوميكاعا جەتكىلىكتى قاراجات سالىنباۋى قيىندىققا سوقتىرۋى مۇمكىن ەكەنىن, سول سەبەپتى ۇكىمەتتىڭ جاڭا ينۆەستيتسيالىق كەزەڭدى باستاۋ قاجەتتىگىن ايتتى. بۇل تۇرعىدا جاڭادان قۇرىلعان ينۆەستيتسيالىق شتابتارعا جۇكتەلەتىن مىندەت پەن سەنىم جۇگى اۋىر. وڭىرلەردەگى اكىمدەردىڭ قىزمەتىنە باعانىڭ ينۆەستيتسيا تارتۋىنا قاراپ بەرىلەتىنى دە كوڭىلگە قونىمدى, ايتپەسە قولدا بار اقشاعا سەنىپ, بار قاراجات كولەمىنە قاراي قيمىلدايتىن اكىمدەر جوق ەمەس. سونداي-اق مەكەمە باسشىلارىنان شەتەلگە جاساعان ءىسساپارلارىنىڭ قورىتىندىسى سۇرالاتىنى – ماعىناسىز ءجۇرىس-تۇرىستى شەكتەپ, ناتيجەگە جۇمىستانۋدى قاداعالاۋعا جاسالعان قادام. بۇعان دەيىن الىس-جاقىن شەتەلدەرگە قانشاما ءىسساپار بولدى, بىراق ناتيجەسى بەلگىسىز.
اقتاۋ قالاسىنداعى «اقتاۋ تەڭىز پورتى» ارنايى ەكونوميكالىق ايماعىندا وڭىرگە ينۆەستيتسيا سالۋ ماقساتىندا كەلىپ, كاسىپورىندارىن اشقان بىرقاتار شەتەلدىك كومپانيا بار. الداعى ۋاقىتتا بۇل باعىتتاعى جۇمىستار جالعاسىن تاۋىپ, ينۆەستورلار كەلۋ قارقىنى ارتا تۇسەدى. سەبەبى تەڭىز جاعاسىندا ورنالاسقان, تۋريستىك تارتىمدىلىعى جوعارى, وزىندىك وندىرىستىك الەۋەتى بار ماڭعىستاۋعا شەتەلدىك ينۆەستورلاردىڭ قىزىعۋشىلىعى قاشاندا بار.
ايماقتىڭ ينۆەستيتسيالىق الەۋەتى جوعارى ەكەنىن ونىڭ ستراتەگيالىق ورنالاسۋى جانە قولايلى بيزنەس ورتاسى رەتىندە ايقىندالۋى كورسەتەدى. ءوڭىردىڭ تابىسى ينۆەستيتسيالىق قىزمەتتىڭ تيىمدىلىگىمەن تىكەلەي بايلانىستى. ويتكەنى ينۆەستيتسيالار – جالپى ايماقتىق ونىمگە اسەر ەتەتىن ماڭىزدى فاكتور. ءوڭىردىڭ ستراتەگيالىق جوسپارىنا سايكەس, بۇل باعىتتاعى بىرقاتار جوبا وندىرىستىك قۋاتتىلىقتى ۇلعايتۋعا, جالپى ەكونوميكانىڭ بىرقاتار سالانى دامىتۋعا ىقپال ەتۋمەن قاتار, وبلىستىڭ الەۋمەتتىك-ەكونوميكالىق دامۋىنا مۋلتيپليكاتيۆتىك ىقپال ەتەدى.
ايگۇل ەستۋرليەۆا,
ش.ەسەنوۆ اتىنداعى كاسپي تەحنولوگيالار جانە ينجينيرينگ ۋنيۆەرسيتەتىنىڭ پروفەسسورى
