قوعامدى بالالارعا قارسى اۋىر قىلمىستار مەن زورلاۋ ماسەلەسى ەرەكشە الاڭداتىپ وتىرعانىن بىلەمىز. سوندىقتان پرەزيدەنت مۇنداي قىلمىستار ءۇشىن جازانى قاتاڭداتىپ, زورلىقشىنى بارىنشا وقشاۋ ۇستاۋدى تاپسىردى. ەندى جاڭا زاڭ بويىنشا پەدوفيلدەر تۇرمەدەن ەشقاشان شىعا المايدى. سونداي-اق وتەلمەگەن جازا مەرزىمى قىسقارتىلمايدى نەمەسە جازانىڭ جۇمساقتاۋ تۇرىمەن اۋىستىرىلمايدى. پەدوفيلدەر راقىمشىلىق الا المايدى. وعان قوسا, ەندى بالالارعا قارسى جاسالعان اياۋسىز, اۋىر قىلمىستار بويىنشا بىتىمگەرشىلىك قاراستىرىلمايدى.
كەلەسى اسا وزەكتى ماسەلەنىڭ ءبىرى – تۇرمىستىق زورلىق-زومبىلىق. ستاتيستيكاعا جۇگىنسەك, كوبىنە ايەلدەر مەن بالالار زورلىق-زومبىلىققا ءجيى ۇشىرايدى. ەلىمىزدە جىل سايىن تۇرمىستىق زورلىق-زومبىلىق سالدارىنان جۇزدەگەن ازامات كوز جۇمادى. بۇل ماسەلە دە پرەزيدەنتتىڭ باقىلاۋىندا تۇر.
ۇرىپ-سوعۋ مەن دەنساۋلىعىنا جەڭىل تۇردە زيان كەلتىرۋ قىلمىس ءتۇرى اكىمشىلىكتەن قىلمىستىق كودەكسكە اۋىستىرىلدى. ۇرىپ-سوعۋ فاكتىلەرى بويىنشا, ءتىپتى جەڭىل ءتۇرى بولسا دا قىلمىسكەر قىلمىستىق كودەكسپەن جازالانادى. سونداي-اق ازاپتاۋ بويىنشا جاڭا باپ قولدانىسقا ەنىپ, 3 جىلعا دەيىن باس بوستاندىعىنان ايىرۋ جازاسى قاراستىرىلعان.
«Amanat» پارتياسى ايەلدەر مەن بالالاردىڭ قاۋىپسىزدىگىنە كەپىلدىكتى كۇشەيتە تۇسەتىن تۇزەتۋدى قىسقا مەرزىمدە ەنگىزۋ قاجەتتىگىن اركەز قولدادى. فراكتسيا دەپۋتاتتارى سەسسيانىڭ العاشقى كۇنىنەن باستاپ وسى ماسەلەنى بالا قۇقىقتارى جونىندەگى ۋاكىل دينارا زاكيەۆامەن جۇيەلى پىسىقتاپ, ۇكىمەتتىك ەمەس ۇيىمدار وكىلدەرىنىڭ قاتىسۋىمەن ءماجىلىس فراكتسياسىنىڭ وتىرىستارىندا جان-جاقتى قاراستىردى.
الەمنىڭ وسى تەكتەس زاڭنامالارىن سالىستىرىپ قارايتىن بولساق, قازاقستان قابىلداپ وتىرعان بۇل زاڭ – حالىقارالىق تاجىريبەدە, تمد ەلدەرى ىشىندەگى ەڭ قاتاڭدارىنىڭ ءبىرى. زاڭ جوباسىن كەشەندى, جۇيەلى, ءتيىمدى ءارى تولىققاندى پىسىقتالعان زاڭ دەپ ايتۋعا تولىق نەگىز بار. زاڭ جوباسىن قابىلداۋ ارقىلى ءبىز ايەلدەر قۇقىعى مەن بالالار قاۋىپسىزدىگىن قامتاماسىز ەتۋ ماسەلەلەرى بويىنشا زاڭنامانى قاتاڭداتۋدى كوزدەيتىن تۇزەتۋلەر ەنگىزۋ تسيكلىن اياقتايمىز.
ەلنۇر بەيسەنباەۆ,
ءماجىلىس دەپۋتاتى
