وسى جىلدىڭ 1 قاڭتارىنداعى جاعداي بويىنشا 135 مىڭعا جۋىق ازامات ءوز قاراجاتىن بىرجولعى زەينەتاقى تولەمدەرىنەن (بۇدان ءارى – بجت) «وتباسى بانك» اق دەپوزيتتەرىنە اۋداردى جانە وسى ۋاقىتقا دەيىن يپوتەكالىق تۇرعىن ءۇي قارىزدارىن رەسىمدەگەن جوق.
«وتباسى بانك» اق اقپاراتى بويىنشا تۇرعىن ءۇي زاەمىن الۋ ءۇشىن قاجەتتى باستاپقى جارنانى جيناقتاۋدىڭ ورتاشا مەرزىمى التى جىلدى قۇرايدى. وسىعان بايلانىستى, مينيسترلىك ازاماتتاردىڭ تۇرعىن ءۇي جاعدايلارىن جاقسارتۋ ماقساتىندا «وتباسى بانك» اق دەپوزيتتەرىندە بجت قاراجاتىن جيناقتاۋ مەرزىمىن 3 جىلدان 8 جىلعا دەيىن ۇلعايتۋدى ۇسىنادى. سونىمەن قاتار ەرلى-زايىپتىلارعا «وتباسى بانكى» اق دەپوزيتتەرىن ءبىر-بىرىنە بجت قاراجاتىمەن تولىقتىرۋعا مۇمكىندىك بەرۋ ۇسىنىلادى.
سونداي-اق «وتباسى بانك» اق-مەن تۇرعىن ءۇي قۇرىلىسى جيناعى تۋرالى شارت بۇزىلعان كەزدە بجت-مەن تولىقتىرىلعان سوما الۋشىنىڭ ارنايى شوتىنا قايتارىلادى. ول 20 جۇمىس كۇنى ىشىندە وسى قاراجاتتى تۇرعىن ءۇي جاعدايىن جاقسارتۋعا پايدالانا الادى نەمەسە بىرجولعى زەينەتاقى تولەمدەرىن پايدالانۋ قاعيدالارىنا سايكەس ەمدەلۋ ماقساتىندا قولدانۋعا قۇقىلى.
تۇرعىن ءۇي جاعدايلارىن جاقسارتۋ ءۇشىن بىرجولعى زەينەتاقى تولەمدەرىن پايدالانۋدىڭ قولدانىستاعى ەرەجەلەرىنە جوسپارلانعان تۇزەتۋلەر نقا اشىق دەرەكتەر پورتالىندا تالقىلانىپ جاتىر. بارلىق ەسكەرتۋ مەن ۇسىنىس قابىلدانعاننان كەيىن بۇيرىق جوباسى مۇددەلى مەملەكەتتىك ورگاندارعا كەلىسۋگە جىبەرىلەدى. كەلىسۋ ۇدەرىسى شامامەن ەكى ايعا سوزىلادى.
ايتا كەتەيىك, بىرجولعى زەينەتاقى تولەمدەرىنە ارنالعان ارنايى شوت – تۇرعىن ءۇي جاعدايلارىن جاقسارتۋ جانە (نەمەسە) ەمدەلۋگە اقى تولەۋ ماقساتىندا بجزق-دان بىرجولعى زەينەتاقى تولەمدەرىن ەسەپتەۋ ءۇشىن الۋشى اشاتىن اعىمداعى بانكتىك شوت.
بجزق-داعى قاراجاتتىڭ ارتىلعان سوماسىن شەشىپ الۋ مۇمكىندىگى 2021 جىلدىڭ قاڭتارىنان باستاپ بەرىلدى. ازاماتتار جەتكىلىكتى شەكتەن اسقان سومانى ءۇش ماقساتقا جۇمساي الادى – تۇرعىن ءۇي جاعدايىن جاقسارتۋ, ەمدەۋ اقىسىن تولەۋ جانە ينۆەستيتسيالىق كومپانيالاردىڭ باسقارۋىنا بەرۋ. بىراق سول جىلدىڭ جەلتوقسانىندا جەتكىلىكتىلىك شەگى جوعارىلاپ كەتىپ, كوپ ادام بۇل مۇمكىندىكتى پايدالانۋدان قاعىلدى. ودان كەيىن شەكتەن اساتىن سومانى «وتباسى بانكتەگى» دەپوزيتكە اۋدارۋعا رۇقسات ەتىلدى.
2021 جىلدان بەرى زەينەتاقى قورىنان الىنعان 3,3 ترلن تەڭگە تۇرعىن ءۇي ساتىپ الۋعا جۇمسالعان. جالپى, 1,4 ملن ءوتىنىم بەرىلگەن.
