«Amanat» پارتياسىنىڭ اتقارۋشى حاتشىسى داۋلەت كارىبەك قىتاي كوممۋنيستىك پارتياسىنىڭ ورتالىق كوميتەتى جانىنداعى پارتيا مەكتەبىنىڭ ءبىرىنشى پرورەكتورى سە چۋنتاومەن كەزدەسىپ, پارتياارالىق ديالوگتى دامىتۋ, ەكونوميكالىق جانە مادەني-گۋمانيتارلىق سالالارداعى ەكىجاقتى ارىپتەستىكتى كۇشەيتۋ ماسەلەلەرىن تالقىلادى. تاراپتار پارلامەنتارالىق جانە پارتياارالىق دەڭگەيلەردە ىنتىماقتاستىقتى نىعايتۋعا ۋاعدالاستى.
باسقوسۋدا داۋلەت كارىبەك بۇگىندە ەكى ەلدىڭ مەملەكەتارالىق قاتىناسى ءتيىمدى دامىپ كەلە جاتقانىن اتاپ ءوتتى. جاقىندا پرەزيدەنت قاسىم-جومارت توقاەۆ ء«بىر بەلدەۋ, ءبىر جول» حالىقارالىق ىنتىماقتاستىعىنىڭ III فورۋمىنا قاتىستى. ال وتكەن ايدا ءماجىلىس cپيكەرى, «Amanat» پارتياسىنىڭ توراعاسى ەرلان قوشانوۆ بۇكىلقىتايلىق حالىق وكىلدەرى جينالىسى تۇراقتى كوميتەتى توراعاسىنىڭ ورىنباسارى حاو مينتسزينمەن كەزدەستى. سونداي-اق اتقارۋشى حاتشى پارتيانىڭ قازىرگى ساياسي كۇن ءتارتىبى, قاسىم-جومارت توقاەۆتىڭ اۋقىمدى رەفورمالارىن جۇزەگە اسىرۋ جانە پارتيانى جاڭعىرتۋ باعىتىندا جۇرگىزىلىپ جاتقان جۇمىس تۋرالى اقپاراتپەن ءبولىستى.
قكپ وك جانىنداعى پارتيا مەكتەبىنىڭ ءبىرىنشى پرورەكتورى سە چۋنتاو قوس مەملەكەت اراسىنداعى قارىم-قاتىناستىڭ تاريحي جانە مادەني-گۋمانيتارلىق اسپەكتىسىنە توقتالدى. ول قىتاي كومپارتياسى مەملەكەتتەر اراسىنداعى تاتۋكورشىلىك قاتىناستى ودان ءارى نىعايتۋ ماقساتىندا «Amanat» پارتياسىمەن ىنتىماقتاستىقتى كۇشەيتۋگە نيەتتى ەكەنىن جەتكىزدى. سونىمەن قاتار ءىس-شاراعا قاتىسۋشىلار پارتيالىق وقىتۋ مەن پارتيا كادرلارىن دايارلاۋدى دامىتۋ سالاسىنداعى ءوزارا ءىس-قيمىلدى تالقىلادى.
كەزدەسۋ سوڭىندا تاراپتار پارتياارالىق ديالوگتى نىعايتۋعا ۋاعدالاسىپ, ەكىجاقتى جانە حالىقارالىق ماڭىزدى ماسەلەلەر بويىنشا پىكىر الماستى. «Amanat» پارتياسىنىڭ اتقارۋشى حاتشىسى جانە قكپ وك جانىنداعى پارتيا مەكتەبىنىڭ ءبىرىنشى پرورەكتورى وسىنداي كەزدەسۋلەردى تۇراقتى تۇردە وتكىزۋ قاجەت ەكەنىن العا تارتتى.
