فوتو: gov.kz
ولجاس بەكتەنوۆتىڭ دەرەگىنشە بيىل كوكتەمدە سۋ تاسقىنى قاۋپى جوعارى. سونىڭ ىشىندە 217 ەلدى مەكەندى سۋ باسۋ ىقتيمالدىعى جوعارى. تاسقىننىڭ بولۋىنا كوكتەمگى جاڭبىر مەن قار سۋىنىڭ اسەرىن ەسكەرگەن ۇكىمەت باسشىسى اۋىل ىشىندەگى قاردى تازالاۋعا جەتكىلىكتى قارجى بولمەگەن وڭىرلەردى سىنعا الدى.
«مىسالى, پاۆلودار وبلىسىندا قار شىعارۋعا بولىنگەن 4,5 ملرد تەڭگەنىڭ 900 ملن تەڭگەسى عانا اۋىلدىق جەرلەرگە كوزدەلگەن. قاراعاندى وبلىسىندا 5,4 ملرد تەڭگەنىڭ 700 ملن تەڭگەسى اۋىلدارعا ارنالعان. اقتوبە وبلىسىندا – نەبارى 100 ملن تەڭگە. ءوڭىر اكىمدەرى قاردى, اسىرەسە اۋىلدىق جەرلەردە ۋاقتىلى شىعارۋ ءۇشىن شارالار قابىلداۋى قاجەت. ايتا كەتۋ كەرەك, ەلدى مەكەندەردىڭ كوشەلەرىن سۋ باسىپ قالۋ جانە بىرقاتار وڭىردە جولداردى شايىپ كەتۋ فاكتىلەرى قازىردىڭ وزىندە تىركەلىپ وتىر», دەدى ولجاس بەكتەنوۆ.
ول توتەنشە جاعدايلار مينيسترلىگىنە كوكتەمگى تاسقىنعا دايىندىق بارىسىن پىسىقتايتىن جۇمىستاردىڭ فورماتىن اۋىستىرۋدى ۇسىندى. سونىمەن قاتار پرەمەر-مينيستر قار سۋى قۇرساۋىندا قالۋ قاۋپى جوعارى اۋىلداردى باقىلاۋدى كۇشەيتۋدى تاپسىردى.
«جولداردىڭ سۋ باسىپ قالۋىنا بايلانىستى اقمولا وبلىسىندا ياگودنوە, قوستاناي وبلىسىندا ەكىدىڭ, اقتوبە وبلىسىنداعى ويماۋىت, جارىق, وتەك جانە قۇمتوعاي اۋىلدارىمەن جىل سايىن قاتىناس ءۇزىلىپ قالادى. اكىمدىكتەر بۇل پروبلەمالاردى بىلە تۇرا, ەشقانداي شارا قابىلدامايدى. ءبىراز شارۋا اكىمدىكتەردىڭ ناقتى جۇمىسىنا بايلانىستى. سونداي-اق ارىقتاردى, جاۋىن-شاشىن كارىزدەرىن ۋاقتىلى تازارتۋ, ۋاقىتشا بوگەتتەر سالۋ جانە ەلدى مەكەندەردە توپىراق ۇيىندىلەرىمەن بەكىتۋ جۇمىستارىن قامتاماسىز ەتۋلەرى قاجەت», دەدى ۇكىمەت باسشىسى.
ولجاس بەكتەنوۆ سۋ تاسقىنىنىڭ الدىن الۋ جۇمىستارىن جانداندىرۋ مەن باقىلاۋدى ورىنباسارى رومان سكليارعا جۇكتەدى.
