وڭتۇستىك كورەيانىڭ مادەنيەت, سپورت جانە تۋريزم مينيسترلىگى شەتەلدەر اراسىنداعى مادەنيەتارالىق بايلانىستار مەن ءوزارا تۇسىنىستىكتى ىنتالاندىرۋ ماقساتىندا 2005 جىلدان باستاپ «مادەني سەرىكتەستىك باستاماسى (CPI)» دەپ اتالاتىن ۇزاقمەرزىمدى مادەني الماسۋ جوباسىن جۇزەگە اسىرىپ كەلەدى. ال وسى ەلدىڭ ۇلتتىق كىتاپحاناسىنىڭ «مادەني سەرىكتەستىك باستاماسى (CPI)» باعدارلاماسى اياسىندا «شەتەلدىك كىتاپحاناشىلارعا ءبىلىم بەرۋ جانە وقىتۋ باعدارلاماسى» 2006 جىلى قولعا الىنعان. بۇگىنگى تاڭدا باعدارلاماعا 23 ەلدەن 59 كىتاپحاناشى قاتىسقان.
قازاقستان ۇلتتىق كىتاپحاناسىنىڭ تسيفرلىق تەحنولوگيالار قىزمەتىنىڭ توپ جەتەكشىسى رەتىندە 2018 جىلى كورەيانىڭ كۆاندجۋ قالاسىنداعى ازيا مادەنيەت ورتالىعىندا «CIC Education and Training Program for Overseas Experts» (شەتەلدىك ماماندارعا ارنالعان مادەني اقپارات ۇيلەستىرۋشىلەرىن وقىتۋ جانە دايارلاۋ) باعدارلاماسىنا قاتىسقان ەدىك. باعدارلاما مادەنيەت جانە ونەر مەكەمەلەرىنىڭ ساراپشىلارىنا قاجەتتى قابىلەتتەردى دامىتۋعا كومەكتەسەتىن كوپتەگەن باعدارلاما مەن ءىس-شارانى ۇسىندى. اتاپ ايتقاندا, باعدارلاما بويىنشا تەوريالىق جانە پراكتيكالىق ءبىلىم الىپ, ازيا مادەنيەت ورتالىعىنا قاتىستى مادەنيەت جانە ونەر مەكەمەلەرىنىڭ قىزمەتىمەن تانىستىق, سونداي-اق چوننوم ۇلتتىق ۋنيۆەرسيتەتىنىڭ ءتىل ءبىلىمى ورتالىعى جانىنداعى ازيا مادەني ينستيتۋتى ءۇشىن كورەي ءتىلىن مەڭگەرۋگە جانە كورەي مادەنيەتىمەن تانىسۋعا مۇمكىندىك جاسالدى.
ءىسساپار بارىسىندا ازيا مادەني ورتالىعىنىڭ مۇراعاتتىق جوبالارى, كوللەكتسيالاردى جىكتەۋ جانە وزىق تەحنولوگيالاردى قولدانۋ, ماتەريالداردى ۇيىمداستىرۋ, سيرەك كەزدەسەتىن قۇجاتتاردى تسيفرلاندىرۋ جانە پرەزەرۆاتسيالاۋ سالاسىمەن تانىسىپ, كورەياداعى جەتەكشى كىتاپحانالار مەن مۇراجايلارعا, كۆاندجۋداعى مادەنيەت جانە ونەر مەكەمەلەرىنە ساپارلار رۋحاني بايىتا ءتۇستى. تاجىريبە الماسۋ بارىسىندا زەرتتەۋ جۇمىسىن جازىپ, قورعاۋدىڭ ءساتى دە ءتۇستى.
ازيانىڭ مادەني ورتالىعى – بۇل حالىقارالىق ونەر ۇيىمى, سونىمەن بىرگە وتكەن, قازىرگى جانە بولاشاقتىڭ مادەنيەتى مەن ونەرىن يننوۆاتسيالىق يدەيالار مەن نانىمدارمەن بىرىكتىرۋ ارقىلى قۇرىلعان بولاشاقتىڭ جاڭا ونىمدەرىن شىعاراتىن مادەني الماسۋ ۇيىمى. ول ازيادان باستاپ, زەرتتەۋ (Research) – شىعارماشىلىق (Creation) – ءوندىرىس (Production) كەزەڭدەرىندە الەمنىڭ تۇكپىر-تۇكپىرىنەن قاتىسۋشىلاردىڭ شەكارالارىن جويۋعا, ەركىن بىرىگۋىنە جانە وي الماسۋىنا ىقپال ەتەتىن ورتاق پلاتفورما ءرولىن اتقارادى. جينالعان زەرتتەۋلەر مەن رەسۋرستار ارقىلى الىنعان ناتيجەلەر بويىنشا ازيانىڭ مادەني ورتالىعى, ءارتۇرلى جانە ديناميكالىق باعدارلامالار (كورمەلەر, قويىلىمدار, ترەنينگتەر, فەستيۆالدار جانە باسقا دا ءىس-شارالار) ۇيىمداستىرادى.
باعدارلاما اياسىندا وتكەن جىلى سەۋل قالاسىنداعى كورەي ۇلتتىق كىتاپحاناسىندا قازاقستان, فيليپپين جانە ۆەتنام ەلدەرىنەن كەلگەن كىتاپحاناشىلار تاعىلىمدامادان ءوتتى. قازاقستان ۇلتتىق كىتاپحاناسىنىڭ اتىنان كورەيانىڭ ۇلتتىق كىتاپحاناسى وتكىزەتىن مادەني سەرىكتەستىك باستاماسىنىڭ قۇرامداس بولىگى «2023 Education and Training Program for Overseas Librarians» باعدارلاماسىنا قاتىسىپ, گرانتقا يە بولدىق. بۇل باعدارلاما كورەيانىڭ ۇلتتىق كىتاپحاناسى مەن شەتەل كىتاپحانالارى اراسىنداعى حالىقارالىق تۇسىنىستىككە ىقپال ەتۋدى, كىتاپحانا تاجىريبەسىن, وزىق تەحنولوگيالاردى الۋعا مۇمكىندىك بەرۋدى كوزدەيدى, سونداي-اق كاسىبي كىتاپحاناشىلارعا ارنالعان باعدارلاما ۇسىندى, كورەي كىتاپحانالارىنىڭ قىزمەتىن پايىمداۋعا ارنالعان ءدارىس ءوتتى. بۇعان قوسا كورەيانىڭ ۇلتتىق كىتاپحاناسىندا كوشپەلى تاعىلىمدامادان وتتىك, جەكە زەرتتەۋلەر مەن پرەزەنتاتسيالار جاسالىپ, باياندامالار مەن ماقالالار جازىلدى, كىتاپحانالارعا ەكسكۋرسيالار ۇيىمداستىرىلدى, كورەي ءتىلى كۋرسىندا وقىپ, كورەي مادەنيەتىمەن تانىسىپ, مادەني مۇرا وبەكتىلەرىنە جانە دالالىق ەكسكۋرسيالارعا قاتىستىق.
«شەتەلدىك ماماندارعا ارنالعان مادەني اقپارات ۇيلەستىرۋشىلەرىن وقىتۋ جانە دايارلاۋ» باعدارلاماسىنىڭ ماقساتى – كورەي مەملەكەتىمەن باسقا ەلدەر اراسىنداعى مادەني بايلانىستاردى نىعايتۋ, شەتەلدىك كىتاپحانالاردا كورەياعا قاتىستى اقپاراتتىق قىزمەتتەردى ۇسىنا الاتىن كىتاپحاناشىلاردى دايارلاۋ. باعدارلاما اياسىندا ءۇش كىتاپحانادان بارعان ماماندار عىلىمي اقپاراتتىق جانە كىتاپحانا ءىسى سالاسىندا جەكە زەرتتەۋلەر جۇرگىزدى. كورەي كىتاپحانالارى مەن مادەنيەتىنە قاتىستى قۇندى اقپاراتتىڭ ەكى مەملەكەتتىڭ ۇلتتىق كىتاپحانالارى اراسىنداعى كاسىبي بايلانىستى دامىتۋعا جانە ولاردىڭ بۇدان ءارى وركەندەۋىنە ىقپال ەتەرى ءسوزسىز.
بارلىق ۇلتتىق كىتاپحانا سياقتى كورەيانىڭ ۇلتتىق كىتاپحاناسىنىڭ دا ماقساتى – ازاماتتارىنا قىزىعۋشىلىق تانىتقاندارعا قىزمەت كورسەتۋ. 1945 جىلى قۇرىلعان ۇلتتىق كىتاپحانا – كورەيا رەسپۋبليكاسىنىڭ زياتكەرلىك جانە اقپاراتتىق رەسۋرستارىنىڭ قۇندى قويماسى. مۇندا وتاندىق باسىلىمدار مەن تسيفرلىق ماتەريالداردىڭ كەڭ جيناعى شوعىرلانعان. سونىمەن قاتار ازاماتتاردىڭ ءارتۇرلى قاجەتتىلىگىنە بەيىمدەلۋ جانە كىتاپحانا ماتەريالدارىنا تەگىن, وڭاي جانە اشىق قولجەتىمدى قامتاماسىز ەتۋ ءۇشىن وزىق تەحنولوگيالار ەنگىزىلگەن.
2020 جىلى قازاقستان ۇلتتىق كىتاپحاناسىندا كورەيا ۇلتتىق كىتاپحاناسىنىڭ باستاماسىمەن جانە الماتى قالاسىنداعى كورەيا رەسپۋبليكاسى باس كونسۋلدىعىنىڭ قولداۋىمەن «كورەياعا تەرەزە – Window on Korea» اتتى كىتاپ بۇرىشى اشىلدى. مۇنداعى وقۋ زالىندا كورەي تىلىندەگى ەڭ ۇزدىك زاماناۋي ادەبيەتتەر, سونداي-اق كورەيانىڭ ۇلتتىق قولدانبالى ونەرىنىڭ ۇلگىلەرى ۇسىنىلعان. كىتاپ بۇرىشىنداعى اقپاراتتىق تەرمينالدان وقىرماندار كورەي ۇلتتىق كىتاپحاناسىنىڭ قىزمەتى تۋرالى بەينە-ەكسكۋرسياعا قاتىسىپ, ۇلتتىق كىتاپحانا قورىنداعى كورەي تىلىندەگى ادەبيەتتەرى, كورەيا ەكونوميكاسىنىڭ دامۋى, تاريحى مەن مادەنيەتى تۋرالى بىرقاتار بەينەبايانمەن تانىسا الادى.
قازاقستان ۇلتتىق كىتاپحاناسىنىڭ قورىنا كەلىپ تۇسكەن باسىلىمداردىڭ كورەي تىلىنەن قازاق تىلىنە بيبليوگرافيالىق جازبالارىنىڭ اۋدارمالارى جاسالىپ, عىلىمي بيبليوگرافيالىق جازبالارى ۇلتتىق كىتاپحانانىڭ ەلەكتروندىق كاتالوگتەرىنە ەنگىزىلىپ, حالىقارالىق كىتاپ الماسۋ جۇمىستارى ۇدايى جۇرگىزىلەدى. «كورەياعا تەرەزە – Window on Korea» كىتاپ بۇرىشىندا قازاق جانە كورەي تىلدەرىندە باسىلىمدارعا شولۋ جاسالىپ, كورەي ەلىنەن كەلگەن تۋريستەرگە ۇلتتىق كىتاپحانانىڭ ىشىندە ەكسكۋرسيا ۇيىمداستىرىلادى. بۇل باعدارلاماعا ۇلتتىق كىتاپحانا اتىنان ماماننىڭ قاتىسۋىنىڭ وزىندىك سىرى بار. ماسەلەن, كورەي حالقى ءۇشىن ۇلتتىق كىتاپحانانىڭ سيرەك قورىنداعى ەسكى قىتاي (ۆەنيان جازۋى) تىلىندەگى كورەي كىتاپتارىنىڭ ورنى ەرەكشە. ول كىتاپتاردىڭ ىشىندە, اسىرەسە 146 تومنان تۇراتىن «مۋنحون بيگو» قولجازباسىنىڭ رۋحاني قۇندىلىعى جوعارى باعالانادى.
كورەي ۇلتتىق كىتاپحاناسىنىڭ بيبليوگرافيالىق ستاندارتتار ورتالىعى – ISBN, ISSN جانە ISNI ۇلتتىق اگەنتتىگى. وسى ەلدىڭ مادەنيەت, سپورت جانە تۋريزم مينيسترلىگى قوعامدىق كىتاپحانالاردا تسيفرلىق رەسۋرستار ورتالىقتارىن قۇرۋ جوباسىنا قاتىسا وتىرىپ, ۇلتتىق كىتاپحاناسىنا 2003 جىلدىڭ جەلتوقسانىندا RFID جۇيەسىن ەنگىزدى.
الەمنىڭ ءىرى كىتاپحانالارىنىڭ ءبىرى سانالاتىن كورەي ۇلتتىق كىتاپحاناسى اۋماعىمەن دە, باي كىتاپ قورىمەن دە ەرەكشە اسەرگە بولەيدى. تاجىريبەدەن ءوتۋ بارىسىندا كىتاپحانانىڭ زاماناۋي تارتىمدى ينفروقۇرىلىمى, ونىڭ باي قورى, جاڭاشىلدىققا تولى قىزمەتى, وقىرمانعا قىزمەت كورسەتۋ باعىتىنداعى جاڭا تەحنولوگيالار, تسيفرلىق تەحنولوگيالار, كورمە ەكسپوزيتسيالارىمەن تانىسىپ, كوپتەگەن ماڭىزدى جانە كاسىبي سالاداعى داعدىعا كوز جەتكىزدىك. شەتەلدىك كىتاپحانالارمەن ىنتىماقتاستىق قۇرۋ ەلىمىزدىڭ ۇلتتىق كىتاپحاناسى مەن وتاندىق كىتاپحانالاردى الەمگە تانىتۋعا, ءوز رەسۋرستارىن ەلدەن تىس جەرلەردە قولجەتىمدى ەتۋگە جاقسى مۇمكىندىك تۋعىزادى. سونىمەن قاتار حالىقارالىق دەڭگەيدە تاجىريبە الماسۋ ءارتۇرلى ەلدىڭ حالقى ءۇشىن الەمدىك مادەني مۇرانىڭ جاۋھارلارىمەن تانىسىپ, ادەبيەتتەرمەن الماسۋعا مۇمكىندىك بەرەدى.
ۇلتتىق كىتاپحانالاردىڭ تاجىريبە الماسۋى وتاندىق كىتاپحانالارعا سەرپىلىس بەرىپ, وزىق تەحنولوگيالاردى ءتيىمدى پايدالانۋعا سەپتىگىن تيگىزەدى. حالىقارالىق تاعىلىمدامالار كاسىبي كىتاپحاناشى ءۇشىن اسا قاجەت. ال ءبىزدىڭ كورگەن-بىلگەنىمىز قىزمەتتە قولدانۋعا ماڭىزدى.
گۇلميرا سماعۇلوۆا,
ۇلتتىق كىتاپحانانىڭ تسيفرلىق تەحنولوگيالار قىزمەتىنىڭ توپ جەتەكشىسى
