– اسپەت, كىتاپ تۋرالى يدەياڭىز قالاي پايدا بولدى؟
– مەن ءبىر ەرەكشە سەزىم قۇشاعىندا بولدىم, تالاي جىلدار بويى شىڭداعان ءبىلىمىم دە بار. سوندىقتان بۇل كىتاپتى جازباۋىم مۇمكىن ەمەس ەدى. مەن تابىستى شەبەر اتاندىم, ال ZEN مەكتەبى ءمىنسىز بەدەلگە يە بولدى. شاكىرتتەرىم تەك كاسىبي داعدىلار تۋرالى عانا ەمەس, وزدەرىن قىزىقتىراتىن باسقا دا سۇراقتاردى قويدى. ال مەنىڭ ولارعا ايتارىم بار ەدى ءارى ولارمەن بولىسەتىنىم دە كوپ بولدى. بۇل – ءبىر كەسە شاي ۇستىندەگى اڭگىمە ەمەس, ءساتتى جۇمىس ىستەيتىن ناعىز ءومىر فيلوسوفياسى. كىتاپ مەنىڭ ءومىر-ساياحاتىمنىڭ قيسىندى جالعاسى ىسپەتتى. «ماسساج شەبەرى – ZEN مەكتەبى» – وسىنىڭ بارىنە قالاي قول جەتكىزگەنىم تۋرالى كىتاپ.
– بۇل كىتاپ كىمدەرگە ارنالعان؟
– كوبىنەسە ايەلدەر اۋديتورياسىنا. سونىڭ ىشىندە, مەن سياقتى قىزدارعا دا. قولايلى جاعدايدا تۋىنداماسا دا, بۇل ولاردىڭ ومىردەن وزدەرىنە كەرەكتىسىن الۋلارىنا كەدەرگى جاسامايدى. جىلدار بويى ويلانۋعا ۋاقىت كەتىرمەي, يدەيا پايدا بولعان كەزدە ءبارىن دەرەۋ قولعا الاتىن جاندار ءۇشىن. جەتىستىككە جەتكىسى كەلەتىن, بىراق ءالى دە قانداي ءىس-ارەكەت جاساۋ قاجەت ەكەندىگىن بىلمەيتىندەرگە.
– ونى نەگە اناڭىزعا ارنادىڭىز؟
– مەن ءوزىمدى self-made ايەلمىن دەپ ەسەپتەيمىن. دەگەنمەن جانىمداعى جاناشىر ادامدار بولماسا, بۇگىنگى جەتىستىگىمە ەشقاشان جەتە الماس ەدىم. ءار ادام ءبىزدىڭ دامۋىمىزعا ءوز ۇلەسىن قوساتىنى انىق. انامنىڭ ماعان كوپتەگەن مۇمكىندىكتىڭ قولجەتىمدى ەكەندىگىن كورسەتە بىلگەندىگى – مەن ءۇشىن ولشەۋسىز باقىت. انام – ءوز ومىرىمدەگى باستى تۇلعا, ەڭ جاقىن جان.
اكەممەن اجىراسىپ, ءۇش بالاسىن جالعىز ءوزى باعۋعا ءماجبۇر بولعان كەزدە دە ول ءوزىن ءبىر ساتكە دە جوعالتقان جوق. مەنىڭ ومىرىمدە دە انام وشپەس ءىز قالدىردى, قاتتى اسەر ەتتى. جانە قالدىرعان ءىزى, ول ومىردە جوق بولسا دا, جالعاسىپ جاتىر.
مەنىڭ كىتابىم تەك اناما عانا ەمەس, اعام مەن اپكەمە دە ارنالعان. ولاردىڭ مەنى قولداۋى مەن ماعان دەگەن سۇيىسپەنشىلىگى تاعدىرىمنىڭ كەز كەلگەن جولىندا كومەكتەسەتىنى ءسوزسىز.
– كىتاپتا ءسىز جەتىستىككە جەتۋدىڭ 9 قادامىن سيپاتتاپسىز. قالاي ويلايسىز, ولار جۇرتتىڭ بارلىعىنا قاتىستى ما, الدە تەك ءسىزدىڭ ستۋدەنتتەرىڭىز ءۇشىن پايدالى ما؟
– بارلىعىنا, ارينە! ءيا, مەن مىسالداردى ءوز ءومىرىمنىڭ كونتەكستىندە سيپاتتايمىن. ماسساجدىڭ كوپتەگەن باعىتى بار. دەگەنمەن كىتاپتاعى قادامدار – تولىعىمەن امبەباپ. ونى وقىڭىز جانە وسى تاجىريبەنى كەز كەلگەن باسقا دا مۇمكىندىكتە قولدانىڭىز. ول 5+ دەڭگەيىندە جۇمىس ىستەيدى. مەن وعان سەنىمدىمىن.
– بۇل كىتاپ ءسىزدىڭ وزىڭىزگە قالاي اسەر ەتتى؟
– كىتاپ وتە پايدالى بولىپ شىقتى. ەگەر ءسىز ونى مۇقيات وقىپ شىعىپ, ءوز ءومىرىڭىزدىڭ كونتەكستىندە قولداناتىن بولساڭىز, ول سىزگە جاعىمدى اسەر ەتەتىنىنە سەنىمدىمىن. مۇنىڭ ءوزى پسيحوتەراپيا سەانسى سياقتى. سودان كەيىن: «بۇل مۇمكىن بولدى ما؟» دەگەن ىشكى سۇراق تۋىندايدى. سوندىقتان ول ماعان وتە ىستىق. جەڭىل وقىلادى, بىراق ۇمىتىلماس اسەر قالدىرادى. مەن ونى جان-جاقتى جانە ويشا قايتا-قايتا تالقىلاپ ءجۇرمىن.
كەي كەزدە نە جايىندا جازارىمدى بىلمەي تۇرعاندا دا مەندە ءوزىمدى تىزگىندەپ تەجەۋ, ءۇزىلىس جاساۋ نەمەسە توقتاۋ بولعان جوق. مەن ويىمدى لەزدە جيناقتاي ءبىلدىم. ول مەنى لوگيكالىق تۇردە جالعاستىردى, مەن ونى ءوز جان-جۇرەگىمنەن تولىقتاي شىعاردىم دەۋگە بولادى.
– جوسپارىڭىزدا ەكىنشى كىتاپ جازۋ بار ما؟
– كىتاپ – ءوز جۇلدىزشاسى بار جۇمباق. ول – Instagram-داعى جازبا ەمەس. ونى تەك ايتارىڭ بار كەزدە جازا الاسىڭ. ازىرشە ناقتى جوسپارىم جوق. بىراق مەنىڭ ءومىرىم ماعان ءتۇرلى توسىنسىي مەن كىلت بۇرىلىس اكەلمەي قويمايتىنىنا سەنىمدىمىن. بالكىم, 5-10 جىلدان كەيىن مەن دە ايەلدەرمەن وزىندىك دانالىعىمدى بولىسەرمىن. بالكىم, بولىسپەسپىن. مەن ەشقانداي بولجام جاسامايمىن, بىراق قازىر مەنىڭ ەكىنشى كىتاپ جازۋ جايلى ويىم جوق.
– وقىرماندارىڭىزعا قانداي كەڭەس بەرەر ەدىڭىز؟
– كىتابىمدى ساتىپ الىڭىز جانە وقىڭىز! شىنىمدى ايتسام, مەن جاساعان ەڭبەگىمدى ماقتان تۇتامىن. كىتابىم كوپتەگەن قىزعا ومىردەگى ءوز جولىن تۇسىنۋگە جانە ايقىن ماقساتىن تابۋعا كومەكتەسەدى. ەگەر ءسىز نە قالايتىنىڭىزدى بىلسەڭىز, بىراق وعان قالاي قول جەتكىزۋ كەرەكتىگىن بىلمەسەڭىز, وندا بۇل كىتاپ سىزگە ارمانىڭىزعا جەتۋ جولىندا مىندەتتى تۇردە جاردەمدەسەدى.
«مەن ءسىزدىڭ دزەندى شاپ بەرىپ ۇستاپ الۋىڭىزدى تىلەيمىن!»
اڭگىمەلەسكەن –
كارىباي مۇسىرمان,
«Egemen Qazaqstan»
