دارىندى جاستار شەتەل اسىپ جاتىر

جوعارىدا ايتىلعان ءسوزىمىز دالەلدى بولۋ ءۇشىن بىرنەشە مىسال كەلتىرەيىك. «اقسۋدا» جاسىنداي جارقىلداعان 18 جاستاعى جارتىلاي قورعاۋشى ءىلياس ءابىل پورتۋگاليانىڭ «جيل ۆيسەنتە» كلۋبىمەن كەلىسىمشارتقا وتىردى. ازىر­گە ول جاستار اراسىنداعى جارىستا ونەر كورسەتەدى. ەگەر الداعى ماتچتاردا پاۆلودار فۋتبول مەكتەبىنىڭ تۇلەگى ءوزىن جاقسى قىرىنان كورسەتسە, وندا پري­مەيرا-ليگادا «پورتۋ», «بەنفيكا», «سپورتينگ», «براگا» سەكىلدى اتاقتى كومان­دالارعا قارسى وينايتىنى انىق.

قازاقستان بىرىنشىلىگىنىڭ ەكىنشى لي­گا­سىندا عانا ويناعان دىنمۇحا­مەد سايىن­عا تۇرىكتەردىڭ كوزى ءتۇستى. الماتىنىڭ «اكادەميا 05» كلۋبىنىڭ 18 جاستاعى جار­تىلاي قورعاۋشىسى «سامسۋنسپوردىڭ» جاستار قۇراماسى ساپىندا الاڭعا شىعىپ تا ۇلگەردى. بەلارۋس چەمپيوناتىندا «ەنەرگەتيك بگۋ» كلۋبى ساپىندا ءابينۇر نۇرىمبەت ورەلى ونەرىمەن كوزگە ءتۇستى. 12 ماتچتا ەكى مارتە نىسانانى ءدال كوزدە­گەن تارازدىڭ تاستۇلەگى التى رەت وڭتايلى پاس بەردى. سودان كەيىن ءابينۇر بىردەن حورۆاتيانىڭ «لوكوموتيۆىنەن» شاقىرتۋ الدى. ول دا 18 جاستا, امپلۋاسى – جارتىلاي قورعاۋشى.

جوعارىدا ەسىمدەرى اتالعان فۋتبولشىلارمەن تۇيدەي جاستى اتىراۋلىق قاقپاشى دۋلات تالاسباەۆ «QJ League» جاستار ليگاسىندا وتە جاقسى وينادى. سەگىز كەزدەسۋدە 41 سەيۆ جاساپ, بىردەن كورەرمەندەردىڭ كوزايىمىنا اينالدى. بىلتىر جىل سوڭىندا ول دانيا بىرىن­شىلىگىنىڭ ەكىنشى ديۆيزيونىندا كۇش سىناسىپ جۇرگەن «حەگەگە» اۋىستى.

19 جاستاعى «جەتىسۋدىڭ» جارتىلاي قورعاۋشىسى داۆيد ەسىمبەكوۆكە نوۆوروسسيسكىنىڭ «چەرنومورەتس» كلۋبى «قۇدا ءتۇستى». قازىرگى كەزدە قارا تەڭىزدىڭ جاعالاۋىندا جاساقتالعان كوماندانىڭ جاعدايى ءماز ەمەس. ولار رەسەيدىڭ ءبىرىنشى ليگاسىندا ەڭ سوڭعى ورىندى قاناعات تۇ­تىپ تۇر. بالكىم, داۆيد سەكىلدى دارىن يەسى «چەرنومورەتستىڭ» ويىنىنا جاڭا لەپ پەن تىڭ سەرپىن اكەلەدى دەگەن ءۇمىت بار.

كەزىندە يسلام چەسنوكوۆ پەن ۆلا­ديسلاۆ ۆاسيلەۆ سىندى تانىمال فۋتبولشىلار شەبەرلىكتەرىن شىڭداعان, بۇل كۇندەرى دەنيس ميتروفانوۆ ەركىن ويقاستاپ جۇرگەن بەلارۋستىڭ «يسلوچ» كلۋبىنا 19 جاستاعى «قايراتتىڭ» قىرانى ميراس كوبەەۆ اۋىستى. مامان­داردىڭ ايتۋىنشا, ول – امبەباپ ويىنشى. قانداي پوزيتسياعا قويسا دا, وزىنە جۇكتەلگەن مىندەتتى ابىرويمەن اتقارۋعا كوبەەۆتىڭ قارىم-قابىلەتى جەتەدى. سوندىقتان دا بۇل جىگىت ءۇشىن «يسلوچ» كەزەكتى باسپالداق­تىڭ ءبىرى دەپ ەسەپتەيمىز. ءدال وسى باعىتى­نان جاڭىلماسا, ميراس كەلەشەكتە قارت قۇرلىقتىڭ توپ كوماندالارىنىڭ ءبىرىنىڭ جەيدەسىن كيەتىنىنە كۇمانى­مىز جوق.

ءدال سول بەلارۋسكە دانيل انكۋدي­نوۆ تا اتتاندى. قاراعاندىدا تۋىپ-وسكەن 20 جاستاعى جىگىتتىڭ تاڭداۋى موگيلەۆتىڭ «دنەپرىنە» ءتۇستى. جالپى, دانيل بۇعان دەيىن دە ءبىراز شەتەلدىك كوماندالار­دىڭ نامىسىن قورعادى. اتاپ ايتساق, ماسكەۋدىڭ «رودينا-2», مولدوۆانىڭ «شەريف», ارمەنيانىڭ «ۆان» جانە ليتۆانىڭ «دجيۋگاسىندا» وينادى. انكۋدينوۆتىڭ ەڭ ۇزدىك كورسەت­كىشى – 2022 جىلعى مولدوۆا چەمپيونى جانە ەل كۋبوگى يەگەرى.

سونداي-اق قازىرگى كەزدە قازاقستان­نىڭ تاعى بىرقاتار دارىندى اياقدوپ شەبەرى شەتەلدىڭ ءتۇرلى كلۋبتارىندا سى­ناقتان ءوتىپ جاتىر. بىراق ولارمەن ءالى كەلىسىمشارت جاسالعان جوق. سول سەبەپتى دە بۇل فۋتبولشىلار جايىندا اڭگىمە ايتۋعا ءالى ەرتە. دەسەك تە ال­دا­عى ۋاقىتتا جەرلەستەرىمىز تانىمال كوماندالار­دىڭ قاتارىنا قوسىلىپ جات­سا, وندا جاعىم­دى جاڭالىقتارمەن بولى­سەمىز. وسىلاي­شا, الىس-جاقىن شەت مەم­لەكەتتەردە شەبەرلىكتەرىن شىڭداپ جۇر­گەن وتانداس­تارىمىزدىڭ قاتارى كوبەيىپ كەلەدى. ەندى ءبىز ولاردى انگليانىڭ پرە­مەر-ليگاسى, يسپانيانىڭ لا ليگاسى, يتا­ليانىڭ ا سەرياسى, گەرمانيا­نىڭ بۋن­دەسليگاسى, فرانتسيانىڭ 1 ليگاسى سەكىلدى توپ ديۆيزيونداردان كورۋدى ار­مان­دايمىز!