كەيىنگى 14 جىلدا قازاقستاننىڭ پرەمەر-ليگاسىنداعى كلۋبتار فۋتبولشىلاردى ساتىپ الۋ نەمەسە جالعا الۋ ماقساتىندا 25,039 ملن ەۋرو (قازىرگى كۋرس بويىنشا 12,271 ملرد تەنگە) جۇمسادى. ەڭ كوپ شىعىندالعان – «استانا». 2010 جىلدان بەرى ولار 13,731 ملن-دى سارپ ەتتى. ماسەلەن, دانيانىڭ «كوپەنگاگەنىنەن» پيەروس سوتيريۋدى جانە سلوۆەنيانىڭ «دومجالەسىنەن» نەمانيا ماكسيموۆيچتى ءوز قاتارىنا قوسۋ ءۇشىن ەلوردالىق كلۋبتىڭ باسشىلارى 2 ملن ەۋرونى شەتەلدىكتەرگە شىتىرلاتىپ تۇرىپ ساناپ بەردى. نيدەرلاندتىڭ «از الكامارى» دورين روتاريۋ ءۇشىن 1,5 ملن سۇرادى. ال «استاناعا» بىرەسە كەلىپ, بىرەسە كەتكەن گانالىق فورۆارد پاتريك ءتۆۋماسيدىڭ بۇرىنعى كلۋبتارىنىڭ ەسەپشوتتارىنا ەلوردالىقتاردىڭ تاراپىنان 2,2 ملن اۋدارىلدى. ولاردان بولەك, لاسلو كلياينحايسلەر (100 مىڭ جالعا + 750 مىڭ ترانسفەر), مارين توماسوۆ (500 مىڭ), يان ۆوروگوۆسكي (400 مىڭ), نۇربول جۇماسقاليەۆ (400 مىڭ), ماكس ەبونگ (250 مىڭ), فوكسي كەتەۆواما (70+120), باحتيەر زاينۋتدينوۆ (46 مىڭ) جانە تاعى باسقا بارلىعى 23 اياقدوپ شەبەرلەرى ءۇشىن «استانانىڭ» بيۋدجەتىنەن 14 ملن ەۋرو ءبولىندى. بيىل قىستا ولار گۆينەيالىق ۆينگەر ۋسمان كامارانى 350 مىڭعا ساتىپ الدى.
قازاقستان فۋتبولىنىڭ فلاگمانى «قايراتتى» كۇشەيتۋدى ماقسات تۇتقان وليگارحتار اقشانى وڭدى-سولدى شاشتى. ولاردىڭ شىعىنى – 7,87 ملن ەۋرو. 2017 جىلى گەورگي جۋكوۆ پەن 2020 جىلى ياتسەك گۋرالسكي ءۇشىن ەكاتەرينبۋرگتىڭ «ۋرالى» مەن رازگرادتىڭ «لۋدوگورەتسى» 1 ملن-نان سۇرادى. ولاردىڭ سۇرانىسىن الماتىلىقتار تولىعىمەن قاناعاتتاندىردى. سونداي-اق ەركەبۇلان تۇڭعىشباەۆ (870 مىڭ), شتەرلي مامبا (700 مىڭ), ماكي بانياك (500 مىڭ), گافۋرجان سۇيماعامبەتوۆ (450 مىڭ), ەركەبۇلان سەيداحمەت (300 مىڭ), گۇلجىگىت الىقۇلوۆ (180 مىڭ) جانە ۆيكتور ۆاسين دە (100 مىڭ) «قايراتقا» ارزانعا تۇسكەن جوق.
كوپ شىعىندالعان كلۋبتاردىڭ ۇشتىگىن «اقتوبە» تۇيىندەپ تۇر. ولار وزبەكستاندىق مارات بيكماەۆ (500 مىڭ), بوسنيالىق داركو مالەتيچ (200 مىڭ), قاراعاندىنىڭ تۋماسى اسلان داراباەۆ (200 مىڭ), ليتۆالىق ارتۋراس جۋلپا (175 مىڭ) جانە باسقا دا ويىنشىلاردى ءوز قاتارىنا قوسۋعا 1,175 ملن ەۋرو جۇمسادى.
«ورداباسى» مەن «توبىل» دا قىمبات فۋتبولشىلاردى ساتىپ الۋعا قۇمار. شىمكەنتتىكتەردىڭ شىعىنى – 547 مىڭ ەۋرو. بوسنيالىق جارتىلاي قورعاۋشى ميرزاد مەحانوۆيچ ءۇشىن ولار 2018 جىلى 400 مىڭدى ەش ويلانباي تولەدى. قوستانايلىقتاردىڭ شىعىنى – 535 ەۋرو. 2010 جىلدان بەرى «توبىل» 10 اياقدوپ شەبەرىنە «قۇدا ءتۇستى. سولاردىڭ اراسىنداعى ەڭ قۇندىلارى – سەنين سەباي (كوت-د’يۆۋار, 100 مىڭ), البەرت گاباراەۆ (رەسەي, 80 مىڭ) جانە ەسسەن ەدەدەما (نيگەريا, 70 مىڭ).
«شاحتەر» 460 مىڭ ەۋروعا ءۇش ترانسفەر جاسادى. وسىدان 10 جىل بۇرىن ولار اۋستراليالىق ميحرەت توپچاگيچتى 400 مىڭعا ساتىپ الدى. 51 ماتچتا قارسىلاستار قاقپاسىن 16 مارتە ءدال كوزدەگەن جاسىل قۇرلىقتىڭ وكىلى قاراعاندىلىق كوماندانىڭ جاقسى ناتيجە كورسەتۋىنە ءبىراز ۇلەس قوستى. «ەرتىس» 381 مىڭ ەۋروعا شىعىندالدى. ەڭ قىمبات ترانسفەر – بوريۆوە فيليپوۆيچ. 2010 جىلى سەربيالىق شابۋىلشى 250 مىڭعا باعالاندى. بىراق بۇل اقشا جەلگە ۇشتى دەسە دە بولادى. ويتكەنى پاۆلودارلىق كلۋبتىڭ ساپىندا جارتى جىل عانا ويناعان فيليپوۆيچ 13 باسەكەنىڭ بىردە-بىرەۋىندە مەرگەندىك تانىتا المادى.
سونداي-اق توپ-10 كلۋبتىڭ قاتارىندا «جەتىسۋ», «اتىراۋ» جانە «وقجەتپەس» بار. بىراق ولاردىڭ جۇمساعان قارجىلارى جوعارىدا اتالعان كوماندالارمەن سالىستىرعاندا تۇككە دە تۇرمايدى. بۇل رەتتە تالدىقورعاندىقتار 155 مىڭدى مارتين توشەۆ ءۇشىن عانا بەردى. 29 جاستاعى بولگاريالىق شابۋىلشى «جەتىسۋدىڭ» جەيدەسىن كيگەن ءبىر جىلدا 29 مارتە جاسىل الاڭعا شىعىپ, 13 دوپتى قاقپاعا توعىتتى. اتىراۋلىقتار نەبارى 83 مىڭ (سەربيالىق يوۆان دجوكيچ – 47 مىڭ, بەلارۋستىك فيليپپ رۋديك – 36 مىڭ) جانە كوكشەتاۋلىقتار 25 مىڭ ەۋروعا عانا شىعىندالدى. بۇل سومانىڭ بارلىعىن «وقجەتپەس» جالعىز عانا ليتۆالىق قورعاۋشى گەورگاس فرەيدگەيماسقا جۇمسادى.
