اۋدارماشى – قات كاسىپ. ال جاقسى اۋدارماشىنىڭ قادىرى, ءتىپتى, بولەكشە. ءبىز ءۇشىن ءداستۇرلى سانالاتىن ورىسشادان قازاقشاعا اۋداراتىنداردىڭ قاتارى دا سيرەكسىپ بارادى. ال بۇرىننان دا از كەزدەسەتىن قازاقشادان ورىسشاعا اۋداراتىنداردىڭ قانى, ءتىپتى, جەرگە تامباي تۇر دەۋدىڭ دە ارتىعى جوق. سول قانى جەرگە تامباي تۇرعانداردىڭ ورتاسىنان عوسمان تولەعۇل ويىپ ورىن الاتىن. ونىڭ اۋدارمالارىنىڭ سانىنىڭ ءوزى قايران قالدىرادى: عوسمان تولەعۇل قازاقشادان ورىسشاعا 43 كىتاپ, ورىسشادان قازاقشاعا 22 كىتاپ اۋدارعان... ول كىتاپتاردىڭ كولەمى ءارتۇرلى عوي دەگەندە دە, بۇل – الاپات ەڭبەك! سول اۋدارمالاردىڭ اراسىندا كوركەم ادەبيەت تۋىندىلارى دا از بولمايتىن. ا.نۇرقاتوۆ, د.دوسجان, ن.كەلىمبەتوۆ, م.ماعاۋين, ق.سالعارا, م.سارسەكە, تاعى باسقا تۇلعالاردىڭ حالىق ءۇشىن اسا قاجەتتى تۋىندىلارىن توگىلتە سويلەتكەن قالامگەر مىنا ءبىزدىڭ دە بىرەر كىتابىمىزدى ءورىستىلدى وقىرماننىڭ ورتاق يگىلىگىنە اينالدىرعان ەدى.
ول ءومىر بويى شىعارماشىلىق ۇجىمداردا, مەملەكەتتىك مەكەمەلەردە جۇمىس ىستەگەن, اۋداندىق, وبلىستىق گازەتتەر رەداكتسيالارىندا جۋرناليست, وبلىس اكىمىنىڭ ءباسپاسوز حاتشىسى, وبلىستىق ءتىل باسقارماسىنىڭ باسشىسى, مينيسترلىكتىڭ ءبولىم باسشىسى, وبلىستىق ارداگەرلەر ۇيىمىنىڭ توراعاسى سياقتى قىزمەتتەردى بىرىنەن كەيىن ءبىرىن اۋىستىرعان. سول لاۋازىمداردىڭ بارىندە دە عوسەكەڭنىڭ قالامگەرلىگىنە قوسا قايراتكەرلىگى دە كەلىستى كورىنىپ وتىردى. عوسمان تولەعۇلدىڭ تۋعان ءتىلدىڭ تولعاقتى ماسەلەلەرىن جەرىنە جەتكىزىپ ايتىپ تا, جازىپ تا كەلگەنىن ارقا جۇرتى جاقسى بىلەدى, ونىڭ بۇل سالاداعى جۇمىسىن قادىرلەيدى.
وسىدان ءتورت جىل بۇرىن «Egemen Qazaqstan» گازەتىندە «ورەن جۇيرىك» دەگەن ماقالا جاريالانعان. عوسمان تولەعۇلدىڭ 70 جىلدىق مەرەيتويىنا ورايلاس جارىق كورگەن وسى ەڭبەكتە تارجىمە سىندى اسا قيىن ىسكە بار ءومىرىن ارناعان, تۋعان ادەبيەتىمىزدىڭ اۋدارما قورجىنىنا مول ولجا سالعان ازاماتتىڭ جانكەشتى ەڭبەگىنە جان-جاقتى باعا بەرىلگەن. قايتەرسىڭ, مىنە, بۇگىن سول تۇلپار تالانتتىڭ شابىسى توقتاپتى, بار ءومىرىن ءتىلدى كەستەلەۋگە, قاستەرلەۋگە ارناعان قايراتكەردىڭ قۋاتتى قالامى قولدان سۋسىپ ءتۇسىپتى. امال جوق, ەندىگى ءسوزدى «ورەن جۇيرىك ەدى...» دەپ سويلەۋگە ءماجبۇر بولىپ وتىرمىز.
باقۇل بول, قيماس جولداس, قىمباتتى عوسەكە. ەڭبەگىڭدى ەلىڭ ۇمىتپايدى.
ساۋىتبەك ابدراحمانوۆ,
الىبەك اسقاروۆ
