كوللاجدى جاساعان – قونىسباي شەجىمباي, «EQ»
اكتسيا اياسىندا ۋنيۆەرسيتەتتىڭ ستۋدەنتتەر ۇيىندە جارىق ءوشىرىلدى. ءسويتىپ, اتالعان جوعارى وقۋ ورنى تابيعي رەسۋرستارعا جاناشىرلىقپەن قارايتىن جاھاندىق باستامانى قولدايتىنىن كورسەتتى.
«مەملەكەت باسشىسى دۇنيەجۇزىلىك كليماتتىق سامميتتە سويلەگەن سوزىندە ءبىزدىڭ ەلىمىز بولاشاق ۇرپاق ءۇشىن قورشاعان ورتانى ساقتاۋعا باعىتتالعان ناقتى شارالار قابىلداۋ جونىندەگى بۇۇ-نىڭ ۇندەۋىن قولدايتىنىن اتاپ ءوتتى. قازاقستان ايماقتا ءبىرىنشى بولىپ پاريج كەلىسىمىن راتيفيكاتسيالاپ, 2060 جىلعا دەيىن كومىرتەگى بەيتاراپتىعى ستراتەگياسىن قابىلداعانى بەلگىلى. ءبىز وسى ماڭىزدى باستامانى قولداپ, عىلىمي جانە ءبىلىم بەرۋ جوبالارىن جۇزەگە اسىرىپ كەلەمىز. عالىمدارىمىز قورشاعان ورتانى قورعاۋعا باعىتتالعان زەرتتەۋلەر جۇرگىزىپ وتىر. وقۋ بارىسىندا دا ستۋدەنتتەردى تابيعات پەن تابيعي رەسۋرستارعا جاۋاپكەرشىلىكپەن قاراۋعا باۋليمىز», دەدى ۋنيۆەرسيتەت رەكتورى ەرلان سىدىقوۆ.
باستاماعا ستۋدەنتتەر ۇيىندە تۇراتىن ءبىلىم الۋشىلار بەلسەندى قاتىستى. ولار بولمەلەرىندەگى جارىق پەن ەلەكتر قۇرالىن 1 مينۋتقا ءسوندىردى. ۋنيۆەرسيتەتتەگى مەحانيكا-ماتەماتيكا فاكۋلتەتىنىڭ 1-كۋرس ستۋدەنتى ۇلپان تۇرسىنبەك ەنەرگيانى ءتيىمدى جۇمساۋ جانە ۇنەمدەۋ وتە قاجەت ەكەنىن جەتكىزدى.
«قازىر كۇندەلىكتى تۇرمىستا ەنەرگيا تۇتىنۋدىڭ جاپپاي وسىمىنە بايلانىستى ەنەرگيانى ۇنەمدەۋ ماسەلەسى العاشقى قاتاردان ورىن الىپ وتىر. ارينە, وعان ءوزىمىز سەبەپكەرمىز. اسىرەسە بۇل ماسەلە ءىرى قالادا انىق بايقالادى. بۇگىن ءبىز ەلەكتر قۋاتىن ۇنەمدەۋگە باعىتتالعان الەمدىك اكتسياعا قاتىسىپ وتىرمىز. مەنىڭشە, بۇل – جاڭا وزگەرىستەرگە جول اشاتىن ۇلكەن بەتبۇرىس. ەگەر وسى باستامانىڭ ارقاسىندا 100 ادامنىڭ 10-ى وزىنە وي ءتۇيىپ, ەلەكتر ەنەرگياسىن دۇرىس قولدانۋ تۋرالى تۇسىنىك قالىپتاستىرسا, بۇل ەلىمىزدىڭ ەكونوميكاسىنا دا, حالىقتىڭ ءال-اۋقاتىنا دا وراسان ىقپالىن تيگىزەرى ءسوزسىز», دەدى ول.
