تۇماۋدىڭ تاراۋى وبلىس ايماقتارىندا بىردەي ەمەس, ەڭ كوپ تاراعان جەرى – پەتروپاۆل قالاسى. مۇندا بارلىق تىركەلگەن ناۋقاستىڭ 55 پايىزى شوعىرلانعان. بۇل – 11 300 ادام وسى كۇنى تۇماۋراتىپ ءجۇر دەگەن ءسوز. ولاردىڭ تاراتۋىمەن ينفەكتسيا كوبەيە تۇسەتىنى دە ءسوزسىز. ال قالانىڭ ىرگەسىندەگى قىزىلجار اۋدانىندا تۇماۋراتقانداردىڭ سانى – 1 400-دەي.
«جامان ىندەتتەن كەيىن كوپتەگەن ادام تۇماۋدى ەلەمەيتىن بولىپ بارادى. مۇنداي جايباسارلىققا جول بەرۋگە بولمايدى. جۇقپالى اۋرۋلاردىڭ ماۋسىمدىق كوبەيۋىنە سايكەس مەملەكەتتىك باس سانيتارلىق دارىگەر 2024 جىلدىڭ 8 اقپانىندا «اۋالىق-تامشىلىق جولمەن بەرىلەتىن ينفەكتسيالىق جۇقپالى اۋرۋلاردىڭ الدىن الۋ شارالارىن كۇشەيتۋ تۋرالى» قاۋلى قابىلدادى. وندا مەديتسينالىق مەكەمەلەردە بارلىق پەرسونال مەن پاتسيەنت ماسكا تاعىپ جۇرۋگە مىندەتتى ەكەنى ايتىلعان. سونداي-اق ولاردا انتيسەپتيكتەردىڭ بولۋى دا مىندەتتەلدى. ال حالىق كوپ جينالاتىن اۋەجاي, تەمىرجول مەن اۆتوۆوكزالداردا, بازارلار مەن ساۋدا-ساۋىق ورتالىقتارىندا, دۇكەندەردە, تەاترلار مەن كينوتەاترلاردا جانە قوعامدىق كولىكتەردە ماسكا تاعىپ ءجۇرۋ ۇسىنىلعان. اۋرۋعا ۇشىراعان ادامدار ۇيىنەن شىقپاۋى كەرەك. دارىگەردى ۇيگە شاقىرعان ءجون. اۋىرىپ قالعان بالالاردى مەكتەپ پەن بالاباقشاعا جىبەرمەۋ كەرەك», دەدى ءا.جۇماتاەۆ.
ناۋقاستاردىڭ كوبىرەك تىركەلۋى قاڭتار ايىنىڭ ورتاسىنان باستالىپ, الدىمەن 44 ادام H3N2 تۇماۋىمەن تىركەلگەن. سونىڭ 36 پايىزى – 14 جاسقا دەيىنگى بالالار. ال وتكەن جىلدىڭ سايكەس مەرزىمىندە ءدال وسىنداي ناۋقاستىڭ 18 عانا تىركەلگەن ەدى.
ءا.جۇماتاەۆ وبلىستاعى قىزىلشا دەرتىنىڭ احۋالى تۋرالى دا ايتىپ بەردى. بىلتىر بۇل كەزدە مۇنداي دەرتكە شالدىققاندار مۇلدە تىركەلمەگەن بولسا, بۇگىنگى تاڭدا 155 ناۋقاس تىركەلىپتى. بۇل دەرتتىڭ دە ەڭ كوبى, ياعني 71 پايىزى پەتروپاۆلدا تىركەلگەن. پەتروپاۆلدان كەيىن اققايىڭ, ەسىل اۋداندارىنان قىزىلشا كوپ شىعىپ وتىر.
ناۋقاستاردىڭ 52%-ى – 14 جاسقا دەيىنگى بالالار. قالعانى – ءارتۇرلى جاستاعىلاردىڭ ۇلەسىندە. سونىڭ ىشىندە 40 پەن 49 جاس ارالىعىنداعى 13 ادام قىزىلشامەن ناۋقاستانعان.
اۋرۋدى تاراتاتىن نەگىزگى 14 وشاق انىقتالىپ وتىر. ونىڭ ىشىندە م.قوزىباەۆ اتىنداعى سولتۇستىك قازاقستان ۋنيۆەرسيتەتى, ج.قيزاتوۆ اتىنداعى جوعارعى اۋىلشارۋاشىلىعى كوللەدجى, بىرنەشە مەكتەپ بار. اۋرۋدىڭ الدىن الۋ شاراسى رەتىندە ۆاكتسينالاۋ تانىلعان. بۇگىنگى تاڭدا 19 688 ادام ۆاكتسينا العان.
سولتۇستىك قازاقستان وبلىسى
