قازاقستان ءسىم ءباسپاسوز قىزمەتى حابارلاعانداي, كەزدەسۋ اتوم ەنەرگياسى جونىندەگى حالىقارالىق اگەنتتىگى (اەحا) باسقارۋشىلار كەڭەسىنىڭ ناۋرىز ايىنداعى سەسسياسىنىڭ الدىندا ءوتتى.
دوستاس ەلدەر توبىنىڭ نەگىزگى مىندەتى – وڭىرلىك توپتارعا كىرمەيتىن جانە تيىسىنشە اگەنتتىكتىڭ باسشىلىق ورگاندارىنا سايلاۋ قۇقىعىنان ايىرىلعان اەحا-عا مۇشە مەملەكەتتەردى ءتيىستى وڭىرلىك توپتارعا كىرگىزۋ. توپتىڭ مانداتى 2023 جىلعى قىركۇيەكتە قازاقستاننىڭ باستاماسىمەن ۇسىنىلعان جانە باسىم كوپشىلىك داۋىسپەن قابىلدانعان اەحا باس كونفەرەنتسياسىنىڭ قارارىمەن بەكىتىلدى.
ءىس-شاراعا اقش, رف, قحر, كانادا, ۇلىبريتانيا, ەۋروپالىق وداق ەلدەرى, اۋستراليا, تۇركيا, جاپونيا, وڭتۇستىك كورەيا, كۋۆەيت, ازەربايجان, وڭتۇستىك افريكا جانە باسقا دا مۇشە مەملەكەتتەردىڭ ديپلوماتيالىق ميسسيالارىنىڭ باسشىلارى قاتىستى. قاتىسۋشىلار قازاقستان, يزرايل, نەپال, باحرەين, ورتالىق ازيا جانە ازيا – تىنىق مۇحيتى ءوڭىرىنىڭ ەلدەرىن قوسا العاندا 17 مۇشە مەملەكەتتى ءتيىستى وڭىرلىك توپتارعا ءادىل جانە جىلدام كىرگىزۋدىڭ ىقتيمال كريتەريلەرى مەن قاعيداتتارىن تالقىلادى.
ءوز سوزىندە قازاقستاننىڭ تۇراقتى وكىلى مۇحتار تىلەۋبەردى مۇشە مەملەكەتتەردىڭ وڭىرلىك توپتارداعى مۇشەلىگىن ىلگەرىلەتۋمەن اينالىساتىن 8 وڭىرلىك توپتىڭ ارقايسىسىندا بەيتاراپ ەلدەردىڭ اراسىنان «فاسيليتاتورلاردى» تاعايىنداۋ تۋرالى ۇسىنىس جاسادى. بۇل ۇسىنىس دوستاس ەلدەر توبىنىڭ اراسىندا كەڭ قولداۋ تاپتى.
ديپلوماتيالىق ميسسيالاردىڭ باسشىلارى ءوز سوزىندە قازاقستان مەن سلوۆەنياعا اەحا-دا ەگەمەندىك تەڭدىكتى قالپىنا كەلتىرۋ ماسەلەسىن بەلسەندى ىلگەرىلەتكەنى ءۇشىن العىس ايتتى. قازاقستاننىڭ اتوم ەنەرگياسىن بەيبىت ماقساتتا پايدالانۋ سالاسىنداعى بەلسەندى قىزمەتى, ونىڭ ىشىندە اۋستراليامەن بىرلەسە وتىرىپ, بيىل 20–24 مامىردا اەحا-نىڭ يادرولىق قاۋىپسىزدىك جونىندەگى حالىقارالىق كونفەرەنتسياسىنا (ICONS-2024) توراعالىق ەتۋ بويىنشا ميسسياسى ەرەكشە اتالىپ ءوتتى.
