فوتو: khabar.kz
كولىك كەپتەلەگى اقتوبە قالاسىنىڭ «راۋان» شاعىن اۋدانىنان باستالىپ, 226 شاقىرىم جەردەگى قارابۇتاق اۋىلىنا دەيىن سوزىلىپ كەتكەن. اسىرەسە قارابۇتاق ەلدى مەكەنىنىڭ جانىندا 15 شاقىرىم كەپتەلەكتەن ترانزيتتىك كولىكتەر نە ءارى, نە بەرى شىعا الماي قالعان. وتكەن تاۋلىكتە وسى جەردەگى كەپتەلىستەگى جۇرگىزۋشىلەر اراسىندا جانجال تۇتانىپ, ارتى توبەلەسكە ۇلاستى. بۇلاردىڭ كوپشىلىگى – رەسەي, وزبەكستان, تاجىكستان, قىرعىزستان, بەلارۋستىڭ ارالىعىنا تاۋار تاسيتىندار. رەسپۋبليكالىق ماڭىزى بار تاسجولدىڭ بويىندا نە اس ىشەتىن ورىن, نە اياق سۋىتاتىن ءجىبى ءتۇزۋ كەمپينگتىڭ جوقتىعى, بەكەتتەردە جانار-جاعارمايدىڭ بولماۋى جۇرتتىڭ جۇيكەسىن توزدىردى. رەسپۋبليكالىق ماڭىزى بار تاسجول وتە تار, بىرنەشە كولىك قاتار ءجۇرىپ وتە المايدى. ءجولۇستى بوران تاۋ-تاۋ بولىپ ءۇيىپ تاستاعان قار. بۇل كۇندەرى جول تازالاپ جۇرگەن تەحنيكا كورىنبەدى. وسىلايشا, تابيعاتتىڭ توسىن مىنەزى جولدى كۇتىپ ۇستاۋعا جاۋاپتى «قازاۆتوجول» مەكەمەسىنە دە ءادىل باعا بەردى.
300 شاقىرىمعا سوزىلعان كولىك كەپتەلەگىنە بايلانىستى اقتوبە وبلىسى اكىمدىگى بىلاي دەپ تۇسىنىك بەردى: «اۋا رايىنىڭ قولايسىزدىعىنا بايلانىستى اقتوبە قالاسىنان قارابۇتاق اۋىلىنا دەيىنگى جول ۋچاسكەسىندە ترانزيتتىك اۋىر جۇك كەپتەلەگى بايقالدى. الايدا جۇك كولىكتەرى اتالعان ۋچاسكەدە 10 كۇننەن اسا قاڭتارىلىپ تۇر دەگەن شىندىققا جاناسپايدى. اقتوبە – قارابۇتاق باعىتى بويىنشا كولىك قوزعالىسىنا شەكتەۋ جوق, جول اشىق. الايدا اۋا رايىنىڭ قولايسىزدىعىنا جانە كولىكتەردىڭ كەپتەلىسىنە بايلانىستى قوزعالىس باياۋ ءجۇرىپ جاتىر. اقتوبە وبلىسىندا 4-12 اقپان ارالىعىندا توتەنشە جاعداي كەزىندە جولدىڭ اشىلۋىن كۇتىپ تۇرعان بارلىق اۋىر جۇك كولىگى كەپتەلەك ايماقتارىنان ءساتتى ءوتتى», دەپ حابارلايدى. مۇنىمەن ءبىر مەزەتتە «قازاۆتوجول» فيليالىنىڭ باسشىسى ايبول داناعۇلوۆ اقپاننىڭ 15-ىندە قارابۇتاق اۋىلىنان حرومتاۋعا دەيىنگى ارالىقتا تۇرىپ قالعان 208 جۇك كولىگى كولونناسى قوزعالا باستاپ, ءبىر ساعاتتىڭ ىشىندە حرومتاۋ – قارابۇتاق – حرومتاۋ باعىتىنان 249 كولىك ءجۇرىپ كەتتى», دەپ مالىمدەدى.
اقتوبە وبلىسى
