كورمەنىڭ اۆتورى مامەت يمانباەۆ شىعارماشىلىعىندا حالىق سۋرەتشىسى ءابىلحان قاستەەۆتىڭ ورنى ەرەكشە. ول ابەكەڭنىڭ بالالىق شاعىن زەرتتەپ, كوپتەگەن كارتينالار جازعان. ءتىپتى زەرتتەۋلەرىن وزەك ەتىپ, «ارمانىنا اسىققان ءابىلحان», ء«ابىلحان قاستەەۆتىڭ بالالىق شاعى بەينەلەۋ ونەرىندە» اتتى كىتاپتار جازدى. سونىمەن قاتار موزايكالىق تاستارمەن, مايلى بوياۋمەن «قاستەەۆ پورترەتتەرى» اتتى جانە سۋرەتشى تۋرالى ەل اۋزىنداعى اڭگىمەلەر جەلىسىمەن «تۋعان جەر تورىندە» دەپ اتالاتىن تۋىندىلارىن جازدى.
جالپى, پورترەتتىك جانردا كوپ ەڭبەكتەنەتىن سۋرەتشىنىڭ «داۋلەت بي تانا ۇلى», «شويناق باتىر» سىندى تاريحي ادامداردى كەسكىندەۋمەن قاتار قۋانىش سۇلتانوۆ, ابەن داۋرەنبەكوۆ, تۇرسىن ابدىرەشوۆ, بايتۇرسىن ومىربەكوۆ, ەرمەك كەلەمسەيىت, نيكولاي گولوۆاتسكي, جاقىپ زامانبەكوۆ سياقتى تانىمال تۇلعالاردىڭ پورترەتتەرىن سومدادى.
«ونىڭ تۋىندىلارىنىڭ نەگىزگى تاقىرىپتارى – قازاق حالقىنىڭ تاريحى. ونىڭ ارمانى تۋعان ەلىنىڭ, حالقىنىڭ سان قىرلى ءارى عاجايىپ تاريحىن كارتينا ارقىلى جەتكىزۋ ەدى. اتا-بابادان قالعان مول رۋحاني قازىنانى كەلەر ۇرپاققا قاستەرلەپ قالدىرۋدى ويلادى. ول ەجەلگى تاريحىمىزدى تەرەڭنەن زەردەلەپ, سودان سوڭ عانا كارتينا جازۋ جۇمىسىنا كىرىسەتىن. كارتينالارى تاريحتىڭ تەرەڭىنە بويلاپ, رۋحقا تاعزىم ەتۋدىڭ جارقىن مىسالى», دەيدى بەلگىلى جۋرناليست مىرزاعالي نۇرسەيىت.
مامەت يمانباەۆتىڭ ءارتۇرلى جانردا جاسالعان 20-دان اسا تۋىندىسى كورمەدە ءبىر اي بويى كورەرمەن نازارىنا ۇسىنىلدى. قىلقالام شەبەرىنىڭ تۋىندىلارىن ونەرسۇيەر جۇرت جوعارى باعالادى. سۋرەتكەر قورشاعان ورتانىڭ قاتپارلى تۇستارىن تەرەڭ بايقايتىن, بەينەلەۋ شەبەرلەرى ولكە شەجىرەسى, ءوڭىر پەيزاجى, اۋىل كورىنىسى جانە تاريحي تۇلعالاردى تاقىرىپ رەتىندە تاڭداعان. اۆتوردىڭ شىعارماشىلىعى كومپوزيتسيالىق جانە كولوريتتىك شەشىمدەرىمەن ەرەكشەلەنەدى.
جەتىسۋ وبلىسى
