فوتو: اشىق دەرەككوز
قازىرگى ۋاقىتتا ايشولپان الماتىداعى سۇلەيمەن دەميرەل اتىنداعى ۋنيۆەرسيتەتتە قازاق ءتىلى مەن ادەبيەت پانىنەن مۇعالىم ماماندىعى بويىنشا 4-كۋرستا وقيدى. ول ۋنيۆەرسيتەتتى تامامداعان سوڭ ماماندىق بويىنشا جۇمىس ىستەگىسى كەلەتىنىن ايتتى. «ۇلان اۋدانىندا (شىعىس قازاقستان وبلىسى) بوزانباي جاقتا مەكتەپ اشايىن دەپ جاتىرمىن. ول ورتا مەكتەپ – ءبىلىم مەن سالت-ءداستۇردى قاتار ۇيرەتەتىن ۇلتتىق مەكتەپ بولادى», دەيدى بۇركىتشى قىز.
سونداي-اق ايشولپان ءبىر قىزدى قۇسبەگىلىككە باۋلىپ جاتقانىن اتاپ, «قازىرگى ۋاقىتتا شاكىرتىم بار, ۇلان اۋدانىندا ايزەرە دەگەن قىزدى دايىنداپ جاتىرمىن», دەدى.
13 جاسىندا قازاقتى جاھانعا تانىتقان ايشولپان نۇرعايىپقىزى «تاڭشولپان» باعدارلاماسىنا بەرگەن سۇحبات بارىسىندا 6 جاسىنان باستاپ اتقا ءمىنىپ ۇيرەنگەنىن, 8 جاسىنان بەرى قۇسبەگىلىكپەن اينالىسقانىن تىلگە تيەك ەتتى. «اۋىلدا ءوستىم, تاۋ-تاستاردا جۇردىك. كوپ جاتتىعۋ كەرەك, ارينە. بۇركىتشى بولىپ شىققان كەزدە, ارينە, اتا-انامنان رۇقسات سۇرادىم. اتا-انام قولداۋ كورسەتتى», دەيدى ول.
ايشولپاننىڭ اتا-اناسى دا جۋىردا موڭعوليادان قازاقستانعا كوشىپ كەلگەنى ءمالىم. «2018 جىلى قازاقستانعا العاش رەت كەلىپ, كوردىم. كەيىن وسى جاقتا ءبىلىم الا باستاعاننان كەيىن قازاقستانعا ءىنىم مەن ءسىڭىلىم, اتا-انام دا كەلسە عوي دەپ ارماندادىم. قازىر اتا-انام وسكەمەن قالاسىنا كوشىپ كەلدى. ءىنىم مەن ءسىڭىلىم دە كەلىپ, وقۋلارىن جالعاستىرىپ جاتىر», دەيدى ايگىلى بۇركىتشى.
