تاراپتار جاڭا ءوندىرىس نىساندارىن ىسكە قوسۋدى, تاۋارلاردى, جۇمىستار مەن قىزمەتتەردى ساتىپ الۋداعى جەرگىلىكتى قامتۋ ۇلەسىن ۇلعايتۋدى, مۇناي-گاز سالاسى مەن مۇناي حيمياسىن دامىتۋدىڭ وزەكتى ماسەلەلەرىن, سونداي-اق قازاقستاندا الەۋمەتتىك جوبالاردى ىسكە اسىرۋ بارىسىن تالقىلادى.
پرەمەر-مينيستر مەملەكەت باسشىسى قاسىم-جومارت توقاەۆتىڭ تاپسىرماسىمەن رەسپۋبليكادا اۋقىمدى ەكونوميكالىق رەفورمالار جۇرگىزىلىپ جاتقانىن ايتتى. ولار ىشكى جالپى ءونىمنىڭ جىل سايىن 6%-عا جانە ودان دا جوعارى ءوسىمىن قامتاماسىز ەتۋگە ءتيىس.
«ۇكىمەت ينۆەستورلارعا ينۆەستيتسيالىق جوبالاردى دامىتۋ ءۇشىن بارىنشا قولايلى جاعدايلار جاسايدى جانە قاجەتتى قولداۋ كورسەتەدى. ءوز كەزەگىندە ءبىز سەرىكتەستەرىمىزدەن جەرگىلىكتى الەۋەتتى بارىنشا پايدالانۋدى, تەحنولوگيالار ترانسفەرتىن, شيكىزاتتى تەرەڭ وڭدەۋدى كوزدەيتىن بىرلەسكەن جوسپارلاردى ۋاقتىلى ىسكە اسىرۋ بويىنشا بەلسەندى ءىس-قيمىلداردى كۇتەمىز», دەدى ولجاس بەكتەنوۆ.
پرەمەر-مينيستر تەڭىز كەن ورنىندا ساعالىق قىسىمدى باسقارۋ جانە بولاشاق كەڭەيتۋ جوبالارىنىڭ سايكەسىنشە 2025 جىلدىڭ ءبىرىنشى جارتىجىلدىعىندا جانە 2024 جىلدىڭ ءبىرىنشى جارتىجىلدىعىندا اياقتالۋىن قامتاماسىز ەتۋ كەرەكتىگىن ايتتى.
سونىمەن قاتار پرەمەر-مينيستر ۇكىمەت قاراشىعاناق كەن ورنىن يگەرۋگە ۇلكەن ءمان بەرىپ وتىرعانىن اتاپ ءوتتى. بۇل رەتتە مۇناي مەن كوندەنسات ءوندىرۋدى جىلىنا ەڭ كەمى 11 ملن توننا دەڭگەيىندە ۇستاپ تۇرۋ – نەگىزگى باسىمدىق.
«قاراشىعاناقتا قۋاتى جىلىنا 4 ملرد تەكشە مەتردى قۇرايتىن گاز وڭدەۋ زاۋىتىن سالۋ جوباسىن ىسكە اسىرۋ تۋرالى تۇجىرىمدامالىق شەشىم كەن ورنىنىڭ بولاشاق دامۋى ءۇشىن ماڭىزدى ەكەنىن اتاپ وتكىم كەلەدى», دەدى ولجاس بەكتەنوۆ.
سونىمەن قاتار پرەمەر-مينيستر ەكونوميكالىق ساياساتتىڭ باسىمدىقتارىنىڭ ءبىرى جەرگىلىكتى قامتۋدى دامىتۋ ەكەنىنە نازار اۋداردى.
«وپەراتورلاردىڭ قاجەتتىلىكتەرى ءۇشىن ءونىم شىعارۋعا مۇددەلى جەرگىلىكتى وندىرۋشىلەرمەن تىعىز قارىم-قاتىناس قاجەت. بۇل رەتتە ەگەر ەلدە قاجەتتى تاۋارلار نەمەسە جابدىقتار وندىرىلمەسە, وندا ءبىز وسى وندىرىستەردى الداعى 2-3 جىلدا قازاقستان اۋماعىندا لوكاليزاتسيالاۋ جونىندەگى ناقتى جوسپارلاردى كورگىمىز كەلەدى. سوندىقتان وسى باعىتتاعى جۇمىستى قايتا قاراۋدى وتىنەمىن», دەدى ۇكىمەت باسشىسى.
ءوز كەزەگىندە دەرەك ماگنەسس «شەۆرون» كومپانياسىنىڭ قازاقستانمەن بارلىق مۇددەلى باعىت بويىنشا ىنتىماقتاستىقتى نىعايتۋعا ءازىر ەكەنىن راستادى.
ء«بىز بىرگە جۇمىس ىستەپ, اراداعى سەرىكتەستىكتى دامىتۋعا مۇددەلىمىز. «شەۆرون» قازاقستاننىڭ ەكونوميكاسىن دامىتۋ ءۇشىن جۇمسالىپ جاتقان كۇش-جىگەردى قولدايدى. بۇگىندە ينۆەستيتسيالار مەن جاڭا جوبالار ءۇشىن جاقسى جاعدايلار جاسالىپ جاتىر. ءوزارا سەرىكتەستىككە نەگىزدەلگەن بولاشاقتاعى دامۋ مۇمكىندىكتەرىن كورىپ وتىرمىز», دەدى ول.
