تۋريزم جانە سپورت ءمينيسترى ەرمەك مارجىقپاەۆ وتكەن جىلدىڭ ناتيجەلەرى مەن بيىل اتقارىلاتىن شارۋالار جوسپارى تۋرالى ايتىپ بەردى. ول ەلدە سپورتپەن شۇعىلداناتىندار قاتارى تۇراقتى تۇردە ءوسىپ جاتقانىن اتاپ ءوتتى. 2023 جىلى ولاردىڭ سانى 510 مىڭ ادامعا كوبەيگەن. الايدا سالادا نازار اۋدارارلىق ماسەلەلەر دە بار. سالانى دامىتۋ ءۇشىن جاڭا كوزقاراس كەرەك. اسىرەسە بۇقارالىق سپورتتى دارىپتەۋگە قاتىستى. وڭىرلەر بيۋدجەتتەن بولەتىن قاراجات كولەمىنىڭ جەتكىلىكسىز ەكەنى ايتىلدى.
«حالىقارالىق تاجىريبەگە ساي بۇقارالىق سپورتتى دامىتۋ ءۇشىن مەكتەپتەردەن باستاپ, ەگدە جاستاعىلارعا دەيىن ارنايى سپورتتىق ليگالاردى جانداندىرۋ كەرەك. وزىق ەلدەردىڭ تاجىريبەسى بالالار اراسىنداعى بۇقارالىق سپورت بولاشاق چەمپيونداردىڭ نەگىزى ەكەنىن كورسەتەدى. بىزدە ازىرگە بىرىڭعاي جۇيە جوق. دەمەك بۇقارالىق سپورتتى دامىتۋدىڭ العاشقى كەزەڭىنەن-اق اقساپ تۇرمىز», دەپ اتاپ ءوتتى تامارا دۇيسەنوۆا.
وسى ورايدا مينيسترلىك پەن وبلىس اكىمدەرىنە بارلىق كەزەڭدەگى سپورتتىق ليگالاردى ماقساتتى تۇردە دامىتۋ جۇمىستارىن قولعا الۋ تاپسىرىلدى. بۇل ىسكە سالالىق مينيسترلىكتەر, مەكتەپتەر, كوللەدجدەر, جوعارى وقۋ ورىندارى, مەديتسينالىق ورتالىقتار مەن ەڭبەك ۇجىمدارى اتسالىسۋى شارت.
ۆيتسە-پرەمەر بالالار مەن جاسوسپىرىمدەر سپورت مەكتەپتەرىن قارجىلاندىرۋ تۋراسىندا دا ءسوز قوزعادى. بۇل باعىتتا جالپى ءبىلىم بەرۋ وشاقتارى سەكىلدى جان باسىنا شاققانداعى نورماتيۆتەردى ەنگىزۋ جاعىن قاراستىرۋ قاجەتتىگى ايتىلدى. ودان بولەك 18 جاسقا دەيىنگى بالالارعا ارنالعان سپورتتىق ۇيىرمەلەرگە «ۆاۋچەرلەر» ۇسىنۋ جۇيەسىن رەتكە كەلتىرۋ ماقساتى تۇر. قاراستىرىلعان قاراجاتتى ءتيىمدى جۇمساۋ ءۇشىن ء«بىر بالا – ءبىر ۆاۋچەر» قاعيداتىن قولدانۋ كوزدەلگەن.
جوعارى جەتىستىكتەر سپورتىن قارجىلاندىرۋ مودەلى دە قايتا قاراستىرۋدى قاجەت ەتەدى.
«ۇلتتىق قۇراما كوماندالارىنا رەزەرۆ دايىندايتىن سپورتتىق ۇيىمدارىمىز قازىر وليمپيادالىق ەمەس سپورت تۇرلەرىنە باعىت العانىن مويىنداۋىمىز كەرەك. بىزدە جازعى وليمپيادالىق ويىندار تىزىمىنە ەنگەن 45 ءتۇرلى سپورتقا باسىمدىق بەرىلگەن. ولاردىڭ قاتارىن ازايتىپ, قالعانىن دامىتۋعا ءمان بەرۋمىز كەرەك. بۇل تۇستا تاڭداۋ عىلىمي تۇرعىدا نەگىزدەلىپ, ەلىمىزدىڭ ەرەكشەلىگىن ەسكەرۋى قاجەت», دەپ اتاپ ءوتتى ۆيتسە-پرەمەر.
سونداي-اق تامارا دۇيسەنوۆا سالاداعى كاسىبي كادرلار جەتىسپەۋشىلىگىنە دە ءمان بەردى.
«سپورتتىق دارىگەر مەن پسيحولوگتەر, ديەتولوگ, نۋتريتسيولوگ, سپورتتىق زاڭگەر سەكىلدى ماماندار جوقتىڭ قاسى. دەنەشىنىقتىرۋ جانە سپورت سالاسىنداعى كادر جەتىسپەۋشىلىگى ماسەلەسىن شەشۋ ءۇشىن قاجەتتىلىگى تۇرعىسىنان ساراپتاما جاساپ, قاجەت بولعان جاعدايدا ولاردى دايىنداۋعا مەملەكەتتىك تاپسىرىستى كوبەيتۋ كەرەك», دەدى تامارا دۇيسەنوۆا.
ۆيتسە-پرەمەر پىكىرىنشە, وقۋ ورىندارى دايىنداعان كادر سانى ەمەس, ءبىلىم بەرۋ مەكەمەسىن اياقتاعان سوڭ ماماندىعى بويىنشا قانشاسى جۇمىس ىستەيتىنى تۋرالى مالىمەتتىڭ ماڭىزى ارتىپ كەلەدى. سونداي-اق ءبىلىم ورداسىنان تۇلەپ, سپورتتىق مانسابىن جالعاستىرۋعا نيەتتىلەردى ىنتالاندىرۋ ماسەلەسى دە ماڭىزعا يە. ول كادرلىق قۇرامنىڭ ساپاسىن جاقسارتۋ ءۇشىن قاجەت. سەبەبى قۇزىرەتتىلىك, ءىس-تاجىريبە مەن مەڭگەرىلگەن ءبىلىم قوسىلسا, مامان باپكەرلىك جۇمىستى باعالاپ قانا قويماي, سپورتشىلاردى دايىنداۋدىڭ جەكە ادىستەمەسىن ازىرلەپ, ولاردى جاتتىقتىرۋ جوسپارىن ساپالى قۇرا الادى.
«اككرەديتتەلگەن رەسپۋبليكالىق جانە ايماقتىق سپورت فەدەراتسيالارى تورەشىلەردى دايىنداۋعا ءتيىس. سونداي-اق حالىقارالىق ارەنادا قازاقستاندىق تورەشىلەر كورپۋسى وكىلدىكتەرىن كوبەيتۋ ارقىلى سپورت تۇرلەرى بويىنشا حالىقارالىق فەدەراتسيالارمەن بايلانىس ورناتۋ جۇمىسىن كۇشەيتۋ كەرەك», – دەدى تامارا دۇيسەنوۆا.
بيىل پاريجدە تورتجىلدىقتىڭ باستى دوداسى وليمپيادا جانە پاراليمپيادا ويىندارى وتەدى. ۆيتسە-پرەمەر كەيىنگى جىلدارداعى ناتيجەلەرگە ءمان بەرىپ, ۇلتتىق قۇراما كوماندالارىنىڭ سپورتشىلارىنا ساپالى دايىندالۋ ءۇشىن مەملەكەت تاراپىنان قاجەتتى جاعداي جاسالعانىن, سوندىقتان جانكۇيەرلەر ۇزدىك ناتيجە كۇتەتىنىن تىلگە تيەك ەتتى.
