ءدىن سالاسىنداعى ساراپشى مامان رەتىندە مەن مەملەكەت باسشىسىنىڭ بۇل وي-پىكىرلەرىنىڭ اسا ماڭىزدى ەكەنىن ايتار ەدىم. ويتكەنى قوعامداعى دەسترۋكتيۆتى ءدىني يدەيالاردىڭ تارالۋ سەبەپتەرىن تەرەڭنەن زەرتتەپ كورسەك, ول جەردە دە حالىقتىڭ الەۋمەتتىك جاعدايى مەن جۇمىسسىزدىق ماسەلەسى جاتقانىن كورەمىز. بۇل – ارنايى جان-جاقتى تالداۋدى قاجەت ەتەتىن تاقىرىپ. اسىرەسە الەۋمەتتىك-ەكونوميكالىق ورتانىڭ ىقپالى كوپ.
ادامدار ەكونوميكالىق قيىندىقتارعا, جۇمىسسىزدىققا نەمەسە رەسۋرستاردىڭ ادىلەتسىز تۇردە تەڭسىزدىكپەن بولىنۋىنە تاپ بولعاندا قوعامدىق نارازىلىق پەن ءتۇڭىلۋ پايدا بولادى. وسىنداي كەزدە ادامدار قالىپتاسقان جاعدايدان شىعار جول رەتىندە دەسترۋكتيۆتى يدەيانى قابىلداۋعا بەيىم بولا تۇسەدى.
سوندىقتان الەۋمەتتىك قورعاۋدى جاقسارتۋ جانە جۇمىسسىزدىقتىڭ قىسقارۋىنا جاعداي جاساۋ – وسى سالاداعى پروبلەمانىڭ ازايۋىنا جول اشاتىن الدا تۇرعان مىندەتتەر. بۇلار الەۋمەتتىك تۇراقتىلىقتىڭ نىعايۋىنا سەبەپ بولىپ قانا قويماي, قوعامدا جاعىمسىز ۇردىستەردىڭ تارالۋىنىڭ دا الدىن الادى. پرەزيدەنتىمىز وسىنىڭ ءبارىن وي ەلەگىنەن وتكىزىپ ايتىپ وتىرعانى تالاسسىز. بۇكىل قوعام ءبىر جەڭنەن قول, ءبىر جاعادان باس شىعارىپ, جالپىعا ورتاق جاعداي جاساۋعا تالپىنىپ, حالىق ساناسىن ۋلاعان دەسترۋكتيۆتى ۇردىستەردەن باس تارتسا, قۇبا-قۇپ. حالقىمىز وسى اسپەكتىلەرگە كوڭىل اۋدارىپ, تۇراقتى, ساۋاتتى ءارى تولەرانتتى ورتانى دامىتۋ ءۇشىن جۇمىس ىستەۋى كەرەك. بۇل اسىرەسە جاستار اراسىندا دەسترۋكتيۆتى اعىمداردىڭ ارەكەت ەتۋىنە توقتاۋ سالادى.
گۇلناز رازدىقوۆا,
ءدىنتانۋشى-ساراپشى
پاۆلودار
