پرەزيدەنت اۋىل شارۋاشىلىعى سالاسىن دامىتۋعا ەكى ەسە قارجى ءبولۋ كەرەك دەدى. مەملەكەت اۋىل شارۋاشىلىعىن ەشقاشان قولداۋسىز قالدىرعان ەمەس. بىراق مەملەكەت باسشىسىنىڭ كەيىنگى جىلدارى ۇردىسكە اينالىپ بارا جاتقان قۋاڭشىلىق پەن قىمباتشىلىقتى ەسكەرە وتىرىپ قابىلداعان وڭ شەشىمى شارۋالاردىڭ ەڭسەسىن كوتەرىپ تاستاعانى شىندىق.
وتكەن جىلدىڭ اۋىرتپالىعىنا قاراماستان, بيىل ءوڭىر شارۋاشىلىقتارىنا تۇگەل جەتەتىن تۇقىم بار. شارۋالاردىڭ ءبارى الداعى كوكتەمدە قالاي بولسا دا ءدان سەبۋگە دايىن وتىر. اۋىل ادامدارى ءتوزىمدى, شىدامدى, تەحنيكاسىن بالعامەن دە جوندەپ جۇرە بەرەدى, ءبارى شەبەر. ەڭ باستىسى, بيىل سەبىلەتىن تۇقىمنىڭ ساپاسىن اي سايىن تەكسەرىپ وتىرۋ كەرەك. ساپاسىز بيدايدى تۇقىمعا جىبەرمەگەن دۇرىس. تۇقىم دۇرىس بولسا, كۇز بەرەكەلى بولادى.
سۋبسيديا ەرەجەسى دە جىل سايىن وزگەرەدى. شارۋالار شارشادى. وسىدان 10 جىل بۇرىن اگروبانك اشۋ كەرەك دەگەندى ايتىپ ەدىك, ول ءالى جوق. «دامۋ», «اگرارلىق نەسيە كورپوراتسياسى» سەكىلدى تولىپ جاتقان نەشە ءتۇرلى قارجى ينستيتۋتتارىنىڭ باسىن بىرىكتىرىپ, ءبىر بانك اشسا, ودان ارتىق ەشتەڭە كەرەك ەمەس.
مەملەكەت باسشىسىنىڭ اۋىلشارۋاشىلىق ءونىمىنىڭ ءتۇسىمىن كوتەرۋ تۋرالى ويى كوپتىڭ كوڭىلىنەن شىقتى. وسى ورايدا ايتارىم, ول ءۇشىن تىڭايتقىش ماسەلەسىن شەشۋدى مىقتاپ قولعا الۋ كەرەك. تىڭايتقىشتى ارزانداتىپ, شاعىن شارۋالاردىڭ دا قولى جەتەتىندەي ەتەتىن امالداردى قاراستىرعان ءجون. ءونىمدى تىڭايتقىش كوتەرەدى. مىسالى, باتىس ەلدەرى تىڭايتقىشتىڭ ارقاسىندا جوعارى ونىمگە قول جەتكىزىپ جاتىر. اۋىل شارۋاشىلىعى مينيسترلىگى مەن جەرگىلىكتى اتقارۋشى بيلىك وسى ماسەلەگە نازار اۋدارعانى ءجون.
كوزىمىزدى اشقالى اۋىل شارۋاشىلىعى سالاسىندا ەڭبەك ەتىپ كەلدىك. سوندىقتان اۋىلدى كوركەيتۋ ءۇشىن, ەڭ الدىمەن, ينفراقۇرىلىمدى جاقسارتۋ كەرەك. كەيىنگى جىلدارى اۋىل-اۋىلعا اۋىزسۋ قۇبىرى تارتىلىپ, جولدار سالىنىپ, قىرۋار شارۋا اتقارىلىپ جاتىر. الايدا اۋىلعا گاز كەلمەي, جاعداي تۇراقتالمايدى, ادامدار كوشە بەرەدى. قانداي جاعداي جاساساق تا كەتە بەرەدى. وسى ماسەلەنىڭ دە باسشىلاردىڭ قاپەرىندە جۇرگەنى دۇرىس.
سايران بۇقانوۆ,
قازاقستاننىڭ ەڭبەك ەرى
قوستاناي وبلىسى,
مەڭدىقارا اۋدانى,
قارقىن اۋىلى
