سايلانعان اكىمگە سەنىم كوپ

سايلاۋ ۇدەرىسىنە ەنگەن تاعى ءبىر وزگەشەلىك – اكىمدەردى تىكەلەي سايلاۋ. تۇرعىنداردىڭ جەرگىلىكتى اتقارۋشى بيلىك باسشىسىن تاڭ­داۋ­عا قاتىسۋى ولاردىڭ ەرتەڭ­گى كۇنگە دەگەن سەنىمىن وياتىپ, قو­عامنىڭ اشىقتىققا قادام باس­قا­نىن ايقىنداي تۇسەدى. باسقا دا وڭىرلەر سەكىلدى قىزىلوردا وبلىسىندا دا اۋىل جانە كەنت اكىمدەرىن تاڭداۋدان باستالعان ناۋقان اۋدان اكىمدەرىن تىكەلەي سايلاۋمەن جالعاستى. پيلوتتىق سايلاۋ سىرداريا جانە شيەلى اۋدا­­نىندا زاڭ اياسىندا جانە اشىق­­­تىق قاعيداتى نەگىزىندە ۇيىم­­­­داس­تى­رىلددى.

سايلانعان اكىمنىڭ ءبىرى – قازا­لى اۋدانىنداعى قاراشەڭگەل اۋىل­­دىق وكرۋگىن باسقاراتىن شوقان قوجانتاەۆ ەسىمدى ازامات. قىزىل­ورداداعى «بولا­شاق» ۋني­­ۆەر­سي­تە­تىن بىتىرگەن ول ەڭبەك جولىن جەر­گىلىكتى تەلەارنادان باستاعان. ءبىراز جىل كامەرا ار­قا­لاپ, وڭىرگە قاتىستى تالاي دۇنيەنى تاس­پالادى. كەيىن دە سول تەلەارنادا ەڭ­بەك ەتتى.

كەيىنگى 15-20 جىلدا جايلى تىرشىلىك ىزدەپ, اۋىلدان قالاعا اعىلعان جۇرتتىڭ قاراسى قالىڭ. بۇل قۇبىلىستى بىرەۋلەر قازىر جوس­پارسىز ۋربا­نيزاتسياعا جاتقىزىپ ءجۇر. ال شوقان ۋربان­دا­لۋدىڭ وسى شارتىنا قارسى كەلىپ, قالاداعى جايلى قىزمەتىن تاستاپ ەلگە كەتتى. كەيىننەن اۋىل اكىمدىگىنە جۇمىسقا تۇردى. قىزمەتتە ساتىلاپ كوتەرىلگەن تياناقتى جىگىتتىڭ تالابىن تۇرعىندار دا قولداپ, 2021 جىلى اۋىل اكىمى ەتىپ سايلادى.

– «ەل سەنىمىن قايتكەندە اق­تا­ۋىم كەرەك» دەگەن ويدىڭ ءوزى-اق ادامعا تىنىم بەرمەيدى. ساي­لاۋ­ال­دى باعدارلاماڭدى ورىندايمىن دەپ باسقا شارۋانى جيىپ قوياتىن كەزىمىز كوپ. اكىم بولۋ تاڭعى 9-دا بارىپ, كەشكە كەڭسەنى جاۋىپ, ۇيگە قايتىپ كەتەتىن جۇمىس ەمەس. بىرەۋ سەنەر, بىرەۋ سەنبەس, كەيدە تۇسكى اسقا شى­عات­ىن دا ۋاقىت تاپپاي قا­لا­سىڭ, – دەيدى ول.

قازالىمەن ىرگەلەس ارال اۋدا­­نىندا جاڭا­قۇ­رىلىس اتتى اۋىل بار. كەزىندە وسى اۋىلدى باس­قا­رىپ, بۇگىندە سونداعى ارداگەرلەر كەڭەسىنە جەتەكشىلىك جاسايتىن سەردالى شالباەۆ ۇنەمى ەل تۇرمىسىنا قاتىستى ماسەلەلەردى كوتەرىپ كەلەدى. اقساقالدىڭ اي­تۋىن­شا, سايلانعان اكىم ەلدىڭ مۇڭ-مۇقتاجىن اۋەلگى ورىنعا قويادى. بىراق اۋىلدى باسقاراتىن ازاماتتاردى تاڭداۋدا ەل اراسىنا جىك تۇسپەۋىن دە ويلاعان ءجون.

– قازىرگى اكىمىمىز ەلنۇر ەلشەكەن دەگەن جاس جىگىت. بۇعان دەيىن دە شارۋا قوجالىعىن باس­قا­رىپ, اۋىلدىڭ كەم-كەتىگىنە كومەك كورسەتىپ تۇراتىن. سول جاردەمىن ءالى جالعاستىرىپ كەلەدى. اۋىل ادامدارىنىڭ ازىن-اۋلاق باقشا ونىمدەرىن ەگىپ الۋى ءۇشىن جەرىن جىرتىپ, جاعدايىن جاسادى. ونداي تالابىنا قۋانىپ وتىرامىز. ەڭ باتىسى, ەل تىرشىلىگىن بىلەدى, مۇڭ-مۇقتاجىنان حاباردار, – دەيدى اقساقالى.

پرەزيدەنت پارمەنىمەن بىلتىر جىل باسىندا سايلاۋ كوميسسيالارى كاسىبي نەگىزدە تۇراقتى جۇمىس ىستەۋگە كوشكەنى بەلگىلى. ناتيجەسىندە, قازىر 31 كوميسسيا مۇشەسى تۇراقتى جۇمىس اتقا­رىپ, بۇرىنعى جىلدارمەن سالىس­تىر­عان­دا كادر­­لار قۇرامى 1,7 ەسەگە ءوستى. بيىلدان باستاپ وبلىس, قالا, اۋداندىق سايلاۋ كوميسسيا­لا­رى مەن ۋچاسكەلىك كوميسسيا مۇ­شەلەرىنىڭ قۇرامى جاڭادان جا­ساق­تالدى. بىلتىر وبلىستا 38 اۋىل جانە كەنت اكىمى سايلانسا, وسى جىلى 25 اۋىل جانە كەنت اكىمدەرىنىڭ وكىلەتتىلىك مەرزىمى اياقتالىپ تۇر. الدا ارال اۋدانىندا – 3, قازالىدا – 5, قارماقشى اۋدانىندا – 7, جالاعاش اۋدانىندا – 1, سىرداريا اۋدانىندا – 2, شيەلى اۋدانىندا – 6, جاڭاقورعان اۋدانىندا 1 اكىمدى تۇرعىندار تاڭدايدى.

ازاماتتىق جاۋاپكەرشىلىك ساي­لاۋدان باستاۋ الاتىنى انىق. بۇل رەتتە قىزىلوردا وڭىرىندەگى تۇرعىنداردىڭ سايلاۋعا قاتىسۋ دەڭگەيى جوعارى. اسىرەسە ساي­لاۋعا وتباسىمەن بىرگە بارۋ ءداستۇرى قارقىن الدى. مۇنىڭ ءبارى دە – ەلدەگى سايلاۋ جۇيەسىنىڭ ورنىقتى ءارى ۇيلەسىمدى دامۋىنىڭ كورىنىسى.

قىزىلوردا