سپورتتىڭ بۇل تۇرىنەن الەمدىك دودا سوناۋ 1926 جىلدان بەرى ۇيىمداستىرىلىپ كەلەدى. العاشقى جارىس لوندونداعى «مەموريەل حولل» ارەناسىندا ءوتتى. بۇل باسەكەلەردە ەڭ كوپ جۇلدە العان – قىتاي قۇراماسى. ەرلەر مەن ايەلدەردىڭ قوسا ەسەپتەگەندە قىتاي ەلىنىڭ وكىلدەرى 407 مارتە (145 التىن+103 كۇمىس+159 قولا) جەڭىس تۇعىرىنا كوتەرىلدى. ەكىنشى جانە ءۇشىنشى ورىندى ماجارستان (68+58.5+75.5) مەن جاپونيا (48+36+73) ءوزارا ءبولىسىپ تۇر. ءتورتىنشى جانە بەسىنشى ورىنداردا – چەحيا (28+34.5+59) مەن رۋمىنيا (16.5+10.5+19). اتالعان جارىستا بارلىعى 20 مەملەكەتتىڭ عانا ءانۇرانى شىرقالىپ, 32 ەلدىڭ تۋى كوكتە جەلبىرەدى.
ۇستەل تەننيسىنەن باسەكەلەستىكتىڭ كۇشتىلىگى سونشالىق كەزىندە 15 رەسپۋبليكانىڭ باسىن بىرىكتىرگەن كسرو سپورتشىلارىنىڭ نەبارى 14 جۇلدەنى ولجالاۋعا كۇش-جىگەرى جەتتى. ونىڭ ۇشەۋى – التىن, تورتەۋى – كۇمىس جانە جەتەۋى – قولا. ال ەل سپورتشىلارى تۋرالى ايتپاي-اق قويساق تا بولادى. 30 جىلدان اسا ۋاقىت ارالىعىندا جەرلەستەرىمىز بىردە-ءبىر جۇلدەگە قول جەتكىزە المادى. جالپى, كەڭەس وداعى تاراعاننان كەيىن بۇرىنعى «باۋىرلاس» رەسپۋبليكالار اراسىنان تەك بەلارۋستىڭ ۇستەل تەننيسشىلەرى عانا الەم چەمپيوناتىندا تابىستى ونەر كورسەتتى. ولار ءۇش جۇلدە الدى. وزگەلەردىڭ قورجىنى – بوس.
العاشقى كەزدەرى ۇيىمداستىرىلعان دۇنيەجۇزىلىك دودالاردا فاۆوريتتەر الماسىپ تۇردى. ەرلەر جايىندا ايتار بولساق, العاشقى 30 جىلدا بىرقاتار ەلدىڭ وكىلدەرى جەڭىس تۇعىرىنىڭ ەڭ بيىك ساتىسىنا الما-كەزەك كوتەرىلدى. جەكەلەگەن سايىستا ماجارستاندىق ۆيكتو بارنا بەس رەت (1930, 1932-1935 جىلدارى) باس جۇلدەنى ولجالادى. اۋستريالىق ريحارد بەرگمان ءتورت مارتە (1937, 1939, 1948, 1950) تەڭدەسسىز دەپ تانىلدى. حح عاسىردىڭ ەلۋىنشى جىلدارىنىڭ اياعىندا قىتاي سپورتشىلارى جۇلقىنىپ شىقتى. 1959 جىلى جۋن گوتۋان ءوز كومانداسىنىڭ قورجىنىنا العاشقى التىندى سالدى. چجۋان تسزەدۋن 1961, 1963 جانە 1965 جىلدارى قاتارىنان ءۇش رەت چەمپيون اتاندى. سودان كەيىن قىتاي ەلىنەن بولەك, شۆەتسيا, فرانتسيا جانە اۋستريانىڭ قولى جۇيرىك جىگىتتەرى الدىڭعى لەكتەن كورىندى. ال 2005 جىلدان بەرى 10 جارىستىڭ جالاۋى جەلبىرەسە, سونىڭ بارلىعىندا دا قىتايدىڭ ۇستەل تەننيسشىلەرىنىڭ مەرەيى ۇستەم بولدى.
ايەلدەردىڭ جاعدايى دا شامامەن سولاي. العاشقى بەس جارىستى ماجارستاندىق ماريا مەدنيانسكي (1926-1931) ۇتتى. اننا شيپوش (1932-1933) ەكى رەت, گيزەللا فاركاش (1947-1949) ءۇش رەت شاشاسىنا شاڭ جۇقتىرمادى. چەحوسلوۆاكيالىق ماريا كەتتنەروۆا (1933, 1935), امەريكالىق رۋت اارونس (1936, 1937) جانە اۋستريالىق گەرترۋدا پريتتسي (1937, 1938) قوس جارىستىڭ جەڭىمپازى اتاندى. ەلۋىنشى جىلداردىڭ العاشقى جارتىسىندا اندجەليكا روزيانۋ اتوي سالدى. رۋمىنيانىڭ ماقتانىشى بەس مارتە (1950-1955) دارا شىقتى. قىتاي قىزدارى العاشقى التىنعا 1961 جىلى قول جەتكىزدى. ال 1995 جىلدان باستاپ ولار دا چەمپيوندىق ءتاجدى ەشكىمگە بەرمەدى. اتالعان ەلدىڭ بۇرىمدىلارى قاتارىنان 15 جارىستا قارسىلاس شاق كەلتىرگەن جوق.
كەيىنگى الەم چەمپيوناتى 2023 جىلى وار-دىڭ دۋربان قالاسىندا ۇيىمداستىرىلدى. ەرلەر باسەكەسىندە بارلىق ءتورت جۇلدەنى دە قىتاي قۇراماسى ولجالادى: فان چجەندۋن – التىن, ۆان چۋتسين – كۇمىس جانە ليان تسزينكۋن مەن ما لۋن – قولا. ايەلدەر سايىسىندا سۋن ينشا باس جۇلدە السا, چەن مەن كۇمىسپەن كۇپتەلدى. چەن سينتۋن مەن جاپونيالىق حينا حاياتا قولاعا قول سوزدى.
ال كوماندالىق جارىس جايىندا ايتار بولساق, كۇنى بۇگىنگە دەيىن قىتاي قارسىلاس شىداتپاي ءجۇر. ماسەلەن, بۇل ەلدىڭ ەرلەر قۇراماسى 2001 جىلدان بەرى ۇيىمداستىرىلعان سوڭعى 10 دودادا دارا شىقتى. بارلىعى 22 جارىستا جەڭىمپاز اتاندى. ماجارستان 10 مارتە جانە چەحوسلوۆاكيا التى رەت باس جۇلدەنى ولجالادى. بۇل مەملەكەتتەردىڭ ورەندەرى حح عاسىردىڭ العاشقى جارتىسىندا اتوي سالدى. 1954-1969 جىلدار ارالىعىندا جاپوندار جەتى دۇركىن الەم چەمپيونى اتانسا, 1973-2000 جىلدارى شۆەدتەردىڭ التى رەت اسىعى الشىسىنان ءتۇستى. اقش (1937) پەن انگليانىڭ (1953) ۇستەل تەننيسشىلەرى ءبىر-ءبىر رەتتەن توپ جاردى.
قىتايدىڭ ايەلدەر قۇراماسىنىڭ كورسەتكىشى ودان دا جاقسى. 1965-2023 جىلدار ارالىعىندا 28 مارتە جالاۋى جەلبىرەگەن جارىستىڭ 23-ىندە قىتاي ەلىنىڭ ارۋلارى التىننان القا تاقتى. سونداي-اق جاپونيا – 8 (1957-1962 جىلدار ارالىعى), رۋمىنيا – 5 (1950-1956), چەحوسلوۆاكيا – 3 (1935, 1936, 1938), اقش (1937, 1949), گەرمانيا (1933, 1939), وڭتۇستىك كورەيا (1973, 1993) – 2 جانە كسرو (1969) مەن سينگاپۋر (2010) 1 رەتتەن تەڭدەسسىز دەپ تانىلدى.
كەيىنگى جىلدارى ۇستەل تەننيسى قازاقستاندا قارقىندى دامىپ كەلەدى. وعان دالەل – جەرلەستەرىمىزدىڭ ءتۇرلى حالىقارالىق جارىستا جۇلدە الۋى. الەمدىك رەيتينگتەگى جاعدايىمىز دا جامان ەمەس. ەرلەر اراسىندا كيريلل گەراسيمەنكو 47-ورىندى يەلەنىپ تۇر. بۇل – كەلمەسكە كەتكەن كسرو قۇرامىنداعى مەملەكەتتەر اراسىنداعى ەڭ ۇزدىك كورسەتكىش. جاس دارىن الان قۇرمانعاليەۆ 210-ورىندى ەنشىلەگەن. ايدوس كەنجەعۇلوۆ 276-ورىنعا تۇراقتاسا, سانجار جۇبانوۆ 280-ساتىعا جايعاستى. ال ايەلدەردىڭ جاعدايى اسا ءماز ەمەس. ەلىمىزدىڭ ەڭ ۇزدىك ويىنشىلارى مىناداي ورىندارعا تابان تىرەدى: ساربينوز مىرقادىروۆا – 206, زاۋرەش اقاشەۆا – 232, اناستاسيا لاۆروۆا – 248 جانە انگەلينا رومانوۆسكايا – 327.
سوڭعى دايارلىعىن قازاقستاننىڭ ۇستەل تەننيسشىلەرى الماتىدا پىسىقتادى. ولار ازەربايجان قۇراماسىمەن بىرلەسكەن وقۋ-جاتتىعۋ جيىنىن وتكىزدى. سپورتشىلاردى ەلميرا اليەۆا, دميتري پەرەۆەرزەۆ, ەۆگەني تيمچەنكو جانە دميتري لەۆەنكو سىندى ماماندار باپتادى. ال كوماندانىڭ سەركەلەرى شەتەلدە دايارلاندى. اتاپ ايتساق, كيريلل گەراسيمەنكو مەن اناستاسيا لاۆروۆا گەرمانيادا جانە الان كۇرمانعاليەۆ قىتايدا جاتتىقتى.
