قازىرگى كەزدە قازاقستاننىڭ بۇرىمدىلارى اراسىندا تابىستى ونەر كورسەتىپ جۇرگەن 26 جاستاعى ءابيبا ابۋجاقىنوۆا عانا ەكەنى بارشاعا ءمالىم. وزبەكستاندا دۇنيەگە كەلگەن قازاق قىزى وسىدان بىرەر جىل بۇرىن تاريحي وتانىنا قونىس اۋداردى. الماتىداعى رەسپۋبليكالىق سپورت كوللەدجىندە ءبىلىمىن جەتىلدىرىپ, شەبەرلىگىن شىڭدادى. تالاي تۇلپاردىڭ توماعاسىن سىپىرعان قارا شاڭىراقتا بىلىكتى بالۋان, تانىمال باپكەر نۇربول سۇلەيمەنوۆتىڭ قول استىندا جاتتىقتى. اسا جەڭىل سالماقتا باق سىناعان ءابيبا بىرەر جىل اتاقتى دزيۋدوشى وتگونتسەتسەگ گالبادراحتىڭ كولەڭكەسىندە ءجۇردى. موڭعوليالىق لەگيونەر ۇلكەن سپورتتان قول ۇزگەننەن كەيىن ابۋجاقىنوۆا 48 كگ سالماق دارەجەسىنىڭ تىزگىنىن قولىنا مىقتاپ ۇستادى.
بۇگىنگى تاڭدا ءابيبانىڭ باعىندىرعان بەلەسى زور. 2021 جانە 2022 جىلدارى ول ازيا بىرىنشىلىگىندە كۇمىس مەدالدى يەلەنسە, الدىڭعى جىلى تاشكەنتتە وتكەن الەم چەمپيوناتىندا قولا مەدالدى ولجالادى. بۇعان قوسا Grand Slam مەن Gran Prix تۋرنيرلەرىندە جەڭىس تۇعىرىنا كوتەرىلدى. بىلتىر ازيادادا كۇمىس السا, بيىل پورتۋگالياداعى ءدۇبىرلى دودادا وتاندىق دزيۋدوشىلار اراسىنان جالعىز ءوزى جەڭىس تۇعىرىنا كوتەرىلدى. قازىرگى كەزدە قازاقستان قۇراما كومانداسى مۇشەلەرى اراسىندا IJF رەيتينگىندە ەڭ جاقسى كورسەتكىش ءابيبا ابۋجاقىنوۆاعا تيەسىلى. ول 7-ورىندى يەلەنىپ تۇر.
كاميلا بەرلىقاشتىڭ دا اياقالىسى جامان ەمەس. اسا اۋىر سالماقتا ايقاساتىن 24 جاستاعى بالۋان كەيىنگى ەكى-ءۇش جىلدا بىرقاتار اسا ءىرى حالىقارالىق تۋرنيردە جۇلدەگەرلەر قاتارىنان كورىندى. كەيبىر باسەكەلەردە جەڭىس تۇعىرىنا سىنىق سۇيەم قالعاندا ءسۇرىندى. وسىلايشا, قاجەتتى ۇپايلارىن قورجىنعا سالعان كاميلا بۇگىندە +78 كگ سالماقتا 15-ورىندا تۇر. ءدال وسى تۇعىردان تومەندەمەسە, بەرلىقاشتىڭ وليمپياداعا باراتىنى انىق.
وكىنىشكە قاراي, وزگە بالۋاندارىمىزدىڭ جاعدايى ءماز ەمەس. IJF رەيتينگىندەگى ولار مىناداي ورىندارعا تابان تىرەدى: عاليا تىنباەۆا (60 كگ) – 28-ورىن, ارۋنا جانكەلدينا (78 كگ) مەن ەسميگۇل كۋيۋلوۆا (63 كگ) – 38-ورىن, اقەركە رامازانوۆ (+78 كگ) – 39-ورىن, نازگۇل ماراتوۆا (+78 كگ) – 44-ورىن جانە سەۆارا نىشانباەۆا (57 كگ) – 53-ورىن. ءيا, ءدال وسىنداي وگىزاياڭ جۇرىسپەن جوعارىدا ەسىمدەرى اتالعان سپورتشىلاردىڭ وليمپيا ويىندارىنا جولداما الۋى ەكىتالاي.
IJF رەيتينگىندە فرانتسيا وزگەلەردەن كوش ىلگەرى. قازىرگى كەزدە ولاردىڭ 12 سپورتشىسى توپ-10-دىققا ەنىپ وتىر. ەكىنشى ورىندا – جاپونيا. كۇنشىعىس ەلىنىڭ 8 قىزى – ۇزدىكتەر تىزىمىندە. ارينە, وعان ەش تاڭدانۋعا بولمايدى. ويتكەنى ءدال وسى مەملەكەتتىڭ وكىلدەرى وليمپيا ويىندارى مەن الەم چەمپيوناتتارىندا ولجاعا مولىنان كەنەلىپ ءجۇر. 2021 جىلى توكيوداعى دودادا كۇنشىعىس ەلىنىڭ قىزدارى 4 التىن, 1 كۇمىس جانە 1 قولا مەدالدى ولجالاسا, 2023 جىلى دوحاداعى الەم چەمپيوناتىندا ءدال سونداي ناتيجە كورسەتتى. قارت قۇرلىقتىڭ وكىلدەرى تورتجىلدىقتىڭ باستى دوداسىن 1 التىن, 3 كۇمىس جانە 1 قولامەن قورىتىندىلاسا, قاتاردىڭ استاناسىندا ءدال سول كورسەتكىشتى اينا-قاتەسىز قايتالادى.
ۇزدىك ۇشتىكتى يزرايل تۇيىندەپ تۇر. جوعارىداعى رەيتينگتە ولاردىڭ 5 بۇرىمدىسى بار. ءتورتىنشى ساتىعا 4 دزيۋدوشىسىنا سەنىم ارتقان گەرمانيا جايعاستى. سونداي-اق يتاليا, كوسوۆو, پورتۋگاليا, كانادا, برازيليا, قىتايدىڭ – 3, يسپانيا, ۇلىبريتانيا, ماجارستان, وڭتۇستىك كورەيا, اۋستراليا, نيدەرلاند, حورۆاتيانىڭ – 2, سەربيا, قازاقستان, موڭعوليا, وزبەكستان, گرۋزيا, پولشا, گرەكيا, اۋستريا جانە تۇركيانىڭ 1 بالۋانى ۇزدىك وندىقتىڭ قاتارىندا.
كوشباسشىلارعا كەلەر بولساق, كانادانىڭ ەكى بۇرىمدىسى الدىنا جان سالار ەمەس. ولار – كريستيا دەگۋچچي (57 كگ) مەن كاترين بوشمەن-پينار (63 كگ). جاپونيادا تۋىپ-ءوسىپ, كەيىننەن ۇيەڭكى جاپىراقتار ەلىنە قونىس اۋدارعان 28 جاستاعى دەگۋچچي – الەمنىڭ ەكى جانە پانامەريكا چەمپيوناتىنىڭ ءۇش دۇركىن چەمپيونى. مونرەالدا دۇنيەگە كەلگەن 29 جاستاعى بوشمەن-پينار – وليمپيا ويىندارىنىڭ قولا, الەم چەمپيوناتىنىڭ كۇمىس جۇلدەگەرى. اسا جەڭىل سالماقتا 22 جاستاعى يتاليانىڭ ارۋى اسسۋنتا سكۋتتو ەشكىمگە جەتكىزبەي كەلەدى. ءابيبا ابۋجاقىنوۆانىڭ باستى قارسىلاستارىنىڭ ءبىرى دۇنيەجۇزىلىك دودادا ەكى رەت ءۇشىنشى ورىندى يەلەندى. شاعىن عانا كوسوۆو ەلىنەن شىققان 28 جاستاعى ديستريا كراسنيچي 52 كگ سالماقتا دارا تۇر. ول – توكيو وليمپياداسىنىڭ جەڭىمپازى, الەم چەمپيوناتىنىڭ ەكى دۇركىن قولا جۇلدەگەرى, ەۋروپا چەمپيونى جانە قۇرلىقتىق جارىستا ءتورت مارتە جەڭىس تۇعىرىنا كوتەرىلدى.
نيدەرلاندتىق ساننە ۆان دەيك 70 كگ سالماق دارەجەسىنىڭ تىزگىنىن قولىندا بەرىك ۇستاپ تۇر. 28 جاستاعى قىزعالداقتار ەلىنىڭ وكىلى وليمپيا ويىندارىندا ءبىر مارتە, الەمدىك دودادا ءتورت رەت قولا مەدالدى موينىندا جارقىراتتى. ەۋروپا بىرىنشىلىگىندە بەس رەت (2 التىن, 2 كۇمىس, 1 قولا) ولجا سالىپ, ەۋروپا ويىندارىنىڭ فينالىندا كۇرەستى. 78 كگ سالماقتا ينبار لانير اعارىپ الدا كەلەدى. 23 جاستاعى يزرايل دزيۋدوشىسى توكيوداعى ويىنداردىڭ كوماندالىق سايىسىندا ءۇشىنشى ورىن السا, بىلتىرعى الەم چەمپيوناتىندا باس جۇلدەنى ولجالادى. اسا اۋىر سالماقتا فرانتسيالىق رومانا ديككونىڭ ءداۋىرى ءجۇرىپ تۇر. 24 جاستاعى قارا ءناسىلدى بالۋان توكيونىڭ جەكەلەگەن سايىسىندا قولا السا, كوماندالىق باسەكەدە التىننان القا تاقتى. الەم چەمپيوناتىنىڭ اقتىق سىنىندا ەكى مارتە ايقاسىپ, ءبىر التىن مەن كۇمىستى قورجىنىنا سالدى. ءتورت بىردەي قۇرلىق بىرىنشىلىگىندە قارسىلاس شىداتقان جوق.
