فوتو: مقىا ءباسپاسوز قىزمەتى
مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي دۋباي قالاسىندا وتكەن دۇنيەجۇزىلىك ۇكىمەتتەر سامميتىنە قاتىستى. سامميت اياسىندا مەملەكەتتىك سەكتورداعى پەرسونالدىڭ تيىمدىلىگى مەن باسەكەگە قابىلەتتىلىگىن ارتتىرۋ, HR پروتسەستەرىن ودان ءارى تسيفرلاندىرۋ ماسەلەلەرى تالقىلاندى.
دارحان جازىقباي شەتەلدىك ارىپتەستەرىنە قازاقستاندا مەملەكەتتىك قىزمەت جۇيەسىن دامىتۋعا باعىتتالعان – «ادامعا باعدارلانعان» سەرۆيستىك سيپاتتاعى مەملەكەتتىك اپپاراتتى قالىپتاستىرۋ شارالارى تۋرالى ايتتى.
ول مەملەكەتتىك قىزمەتتە ادام رەسۋرستارىن جەتىلدىرۋ, HR قۇرالداردى ەنگىزۋ, «e-Qyzmet» جۇيەسى نەگىزىندە ىرىكتەۋ پروتسەستەرى مەن پەرسونالدى باسقارۋدى تسيفرلاندىرۋ بويىنشا اگەنتتىكپەن جۇزەگە اسىرىلىپ جاتقان جوبالار مەن باستامالارعا دا توقتالدى.
مقىا توراعاسى بىرىككەن اراب امىرلىكتەرىنىڭ لاۋازىمدى تۇلعالارىمەن ەكىجاقتى كەزدەسۋلەر وتكىزدى. سونىڭ ناتيجەسىندە مەملەكەتتىك باسقارۋدى ترانسفورماتسيالاۋ سالاسىنداعى تاجىريبە الماسۋ بويىنشا سەگىز ۇكىمەتارالىق باعىتتىڭ ءبىرى «الەۋەتتى ارتتىرۋ جانە كوشباسشىلىق» اياسىندا العاشقى «باسقارۋشىلاردىڭ كوشباسشىلىق باعدارلاماسى» ىسكە قوسىلدى.
باعدارلاما بويىنشا وقىتۋ بيىلعى جىلدىڭ ناۋرىز ايىنان باستالادى. 30 مەملەكەتتىك قىزمەتشى وقىتىلادى دەپ جوسپارلانعان.
سونىمەن قاتار اتالعان باعىت اياسىندا مەملەكەتتىك قىزمەتشىلەر ءۇشىن «Executive Leaders Program», «Future Leaders Program», «Youth Leaders Program» اتتى ءۇش باعدارلاما بويىنشا تەگىن ونلاين وقىتۋ جۇرگىزىلەدى. سونداي-اق باعدارلامالاردا پرەزيدەنت جانىنداعى مەملەكەتتىك باسقارۋ اكادەمياسىندا جانە ءباا-دە ءبىر اپتالىق وقۋ وتكىزۋ قاراستىرىلعان.
كەزدەسۋ سوڭىندا تاراپتار مەملەكەتتىك قىزمەتشىلەرگە ارنالعان بىرلەسكەن ءبىلىم بەرۋ باعدارلامالارىن جۇزەگە اسىرۋداعى ىنتىماقتاستىقتى ودان ءارى دامىتۋعا دايىن ەكەنىن ءبىلدىردى.
