فوتو: azattyq-ruhy.kz
اشتىقتان جاندارى قىسىلعان ەلىكتەر ادامزاتتان وسىلاي كومەك الىپ جاتىر. قازىر ولار قارى تازالانعان جولدىڭ جيەگىنە باتىل باسىپ كەلىپ, جيەكتەگى قاردى تەۋىپ تاماقتارىن تابۋعا تىرىسىپ ءجۇر. وسىنى كورگەندە اشتىقتان جانى قىسىلىپ, 30-جىلدارداعى بوسىپ كەتكەن قازاقتار كوزىڭە ەلەستەيدى. تاماق ءۇشىن ولار دا وسىلاي جان ساۋعالادى-اۋ...
وسىنى تۇسىنگەن جاندار كوزى جاۋدىرەگەن, تابيعاتتىڭ سۇلۋ اڭىنا قولدان كەلگەن كومەكتەرىن بەرۋگە تىرىسىپ جاتىر. بىراق ادامنىڭ ءبارى سانالى ەمەس, اڭ كورسە, اتا جاۋىن كورگەندەي جۇلقىناتىن بىرەۋلەر بەيباق جانۋارلاردى قىرۋعا اۋەس. وندايلار ءتىپتى قازىر اشاتۇياقتى اڭداردى اۋلاۋعا تيىم سالىنعانىنا دا قارامايدى.
اقپان ايىنىڭ باسىنان بەرى پوليتسيا قىزمەتكەرلەرى ورمان جانە اڭشىلىق شارۋاشىلىقتارىنىڭ جۇمىسشىلارىمەن بىرلەسىپ, «براكونەر» جەدەل-پروفيلاكتيكالىق ءىس-شاراسىن وتكىزىپ جاتىر. ولار 7 كۇن ىشىندە 91 قۇقىق بۇزۋشىلىقتى انىقتادى, ونىڭ ىشىندە 62-ءسى – اڭشىلىق, 21-ءى – بالىق اۋلاۋ قاعيدالارىن بۇزۋشىلىقتار. اراسىندا ايىرتاۋ اۋدانىنىڭ ءبىر تۇرعىنى دا بار. پوليتسيا قىزمەتكەرى ونىڭ جۇرىسىنەن سەكەم الىپ, بۇرلىق ورمان شارۋاشىلىعى مەن قاراتال اۋىلىنىڭ ورتاسىندا توقتاتقان. كۇدىك تەگىن بولماعان, الگىنىڭ كولىگىنەن 16 كاليبرلى تىركەلمەگەن «توز» مىلتىعى مەن ءتورت وق تابىلعان. ءوزى وسى ماڭدا وتىن دايىندايتىن كاسىپورىندا جۇمىس ىستەيتىنىن ايتقان. تۇرعىلىقتى جەرىنە كەلگەندە ونىڭ بىرنەشە ەلىكتى جايراتىپ, ەتىن بولشەكتەپ قويعانى بەلگىلى بولدى. جازىقسىز جانۋارلاردى قىرعان مىسكىن قاماۋعا الىندى. ەندى ول سوتتىڭ شەشىمىمەن ءومىرى تاپپاعان اقشاسىن ايىپپۇل رەتىندە تولەيتىنى بەلگىلى.
وسىنداي سوراقىلىق شال اقىن اۋدانىنداعى سەرگەەۆ ورمان شارۋاشىلىعىنىڭ ماڭىنان دا شىقتى. قار ۇستىندە زىمىرايتىن «بۋران» موتوشاناسىنىڭ ۇستىندەگى 59 جانە 26 جاستاعى ەكى ازامات تا بىرنەشە ەلىكتى اتىپ تاستاعان. موتوشانانىڭ يەسى وسى اۋدانداعى اۋىزسۋمەن جابدىقتايتىن كاسىپورىن ەكەن, ال مىنا ەكەۋى سونىڭ جۇمىسشىلارى بولىپ شىقتى. ولاردان الىنعان 9 پاترونى بار «يج-18» مىلتىعى دا ەش جەردە تىركەلمەگەن.
وبلىستىق پد جەرگىلىكتى پوليتسيا قىزمەتى باسقارماسى باستىعىنىڭ ورىنباسارى الەكساندر روزباحتىڭ ايتۋىنا قاراعاندا, وسى ەكى وقيعا دا سوتقا دەيىنگى تەرگەۋ تىزىلىمىنە ەنگىزىلگەن.
سولتۇستىك قازاقستان وبلىسى
