پوليتسيا قىزمەتكەرى نۇرسۇلتان جاقىپوۆ ەكى جىلدان بەرى كيكبوكسينگتەن قازاقستان قۇراما كومانداسىنىڭ مۇشەسى بولىپ كەلەدى. ماعجان جۇماباەۆ اۋدانىنىڭ تۋماسى نۇرسۇلتان جاقىپوۆ كيكبوكسينگپەن التى جاسىنان بەرى اينالىسقان. كەيىنگى جىلداردا ول شەبەرلىگىن پەتروپاۆل قالاسىندا ءادىل نۇرجاۋىپوۆتىڭ جەتەكشىلىگىمەن جالعاستىرىپ, قازىر ەلىمىزدىڭ قۇراما كومانداسىندا جاتتىعادى. قاپساعاي بويلى قارا جىگىت رينگتە باياعىنىڭ باتىرلارىنشا ويقاستايدى. ونىڭ ءدال تيگىزگەن سوققىلارىنان ۇشىپ كەتىپ جاتقان قارسىلاستارىن كورگەندە ايىزىڭ قانىپ وتىرادى. بىلتىر ول قازاقستان قۇراما كومانداسىنىڭ ساپىندا تايلاندتا وتكەن ازيا بىرىنشىلىگىندە چەمپيون بولدى. بانگكوكتە بولعان وسى چەمپيوناتقا 22 ەلدىڭ سپورتشىلارى قاتىسقان. سونىڭ ىشىندە نۇرسۇلتان ءۇش جەكپە-جەك وتكىزىپ, قارسىلاستارىنىڭ ءبارىن تىزە بۇكتىردى.
فينالعا شىققان قارسىلاسى يراندىق كيكبوكسشىنى نۇرسۇلتان العاشقى راۋندتىڭ وزىندە ەكى رەت نوكداۋنعا جىبەرىپ, ەكىنشى راۋندتا نوكاۋتقا ءتۇسىردى. قازاقستان قۇراماسى بارلىعى 21 مەدال الىپ, ازيادا ءبىرىنشى ورىندى ەنشىلەدى.
سول جولعى ساپاردان جەڭىسپەن ورالعان ونى سولتۇستىك قازاقستان پوليتسيا دەپارتامەنتىنىڭ باستىعى ايدىن قابۇلدينوۆ قابىلداپ, سىي-قۇرمەت كورسەتكەن. بىراق ءبىزدىڭ سولتۇستىكتە اتاقتى سپورتشىلاردى قولداۋ ەلىمىزدىڭ باسقا وڭىرلەرىنە قاراعاندا ۇنەمى كەمشىن بولىپ كەلەدى. 30-عا كەلگەن نۇرسۇلتان جاقىپوۆتىڭ ءالى كۇنگە اعا لەيتەنانت قانا بولىپ جۇرگەنى دە سونىڭ ايعاعى. ەلىمىزدىڭ اتىن ايداي الەمگە تانىتىپ جۇرگەن ۇزدىك سپورتشىلارعا تارتىنشاقتاماي, جاقسى قولداۋ جاساۋ كەرەك قوي.
جالپى, قازاقستان قۇراماسى كيكبوكسينگتەن الەمنىڭ ۇزدىك كوماندالارىنىڭ بىرىنە جاتادى. بىلتىر ءبىزدىڭ قۇراما پورتۋگاليانىڭ البۋفەيرە قالاسىندا 70 ەلدەن 573 سپورتشى قاتىسقان الەم بىرىنشىلىگىندە 22 ماراپات العان ەدى. ونىڭ بەسەۋى – التىن, بەسەۋى – كۇمىس جانە 12-ءسى – قولا مەدال.
سولتۇستىك قازاقستان وبلىسى
