فوتو: قازاقستان فۋتبول فەدەراتسياسى
ماگومەد اديەۆ فۋتبولدان قازاقستان ۇلتتىق قۇراماسىنىڭ تىزگىنىن 2022 جىلدىڭ ءساۋىر ايىندا ۇستاعان ەدى. 2 جىلعا جۋىق ۇلتتىق قۇرامانى جاتتىقتىرعان باپكەر, بۇعان دەيىن رەسەيدىڭ «احمات», «انجي» جانە تاعى باسقا كلۋبتارىمەن جۇمىس ىستەگەن.
«ماعان رەسەيلىك كلۋبتاردان ۇسىنىستار بولدى, قازىر دە ۇسىنىستار توقتاعان جوق. بىراق مەن قازاقستان قۇراماسىمەن باستاعان تسيكلدى اياقتاۋىم كەرەك. الداعى شەشۋشى ويىندارعا اتسالىسامىن, ناتيجەسىندە ناقتى شەشىمگە كەلەمىن.
ارينە, جاقىن ارادا رەسەيگە ورالۋىم مۇمكىن ەكەنىن مويىندايمىن. بىراق ول جاقتا قىزمەت ەتۋ مەنىڭ ارمانىم دەپ تە ايتا المايمىن. مەن قاي كەزدە دە ناقتى ارەكەت ەتەمىن. قازىر قازاقستان قۇراماسىندا بارلىق ويىنشىعا تولىق كوڭىلىم تولادى. بۇل كوماندا ماعان كوپ نارسە بەردى, مەن دە ولارعا بىردەڭە بەرە الدىم دەپ ۇمىتتەنەمىن. قازىرگى ۋاقىتتا بار ويىم الداعى ويىنداردا», دەدى م.اديەۆ.
