ءوڭىر باسشىسى ناريمان تورەعالي ۇلىنىڭ باستاماسىمەن 2024-2026 جىلدارعا ارنالعان جوبا اياسىندا ورال قالاسىنان ءبىر كوش اۋىلعا بەت تۇزەدى. وتاعاسى ايات سيسەنوۆ وتباسىلى, 5 بالاسى بار. بالالارىنىڭ ەكەۋى – مەكتەپ جاسىندا بولسا, ۇشەۋى – ودان دا كىشى. ايات كەيىنگى 5 جىل بويى ورال قالاسىندا پاتەر جالداپ تۇرعان ەكەن. كوپبالالى وتباسى قازتالوۆ اۋدانى اكىمىنىڭ شاقىرۋىن قۇپ العان.
– وڭىرىمىزدە قولعا الىنعان باعدارلامانىڭ ماقساتى – ازاماتتاردىڭ اۋىلعا كەلۋىن ىنتالاندىرۋ, حالىقتىڭ كوشى-قونىن ازايتۋ, اۋىلدىق جەردە جۇمىس كۇشى تاپشىلىعىن جويۋ, اگروونەركاسىپ كەشەنىن تۇراقتى دامىتۋدى قامتاماسىز ەتۋ, شاعىن جانە ورتا بيزنەس نىساندارىنىڭ سانىن ارتتىرۋ, تۇراقتى جۇمىس ورنى جوق قالا ازاماتتارىنىڭ, سونداي-اق جاس وتباسىلاردىڭ الەۋمەتتىك ماسەلەسىن شەشۋگە قولداۋ كورسەتۋ. ءبىز قازتالوۆ اۋدانىنىڭ 8 ەلدى مەكەنىنە ادام شاقىرىپ وتىرمىز. ياعني اۋدانداعى جاڭاتاڭ, ءابىش, كوپكۇتىر, جاس, سارىقۇدىق, سارالجىن, ساتىبالدى, كومەكشى سەكىلدى شاعىن اۋىلداردىڭ ەكىنشى تىنىسىن اشۋ ءۇشىن جىلدىڭ باسىندا ارنايى جۇمىس توبى قۇرىلدى. كوشىپ كەلەم دەگەن ازاماتتارعا اتالعان ەلدى مەكەندەردەن جۇمىس, تۇرعىن ۇيمەن قامتۋ ماسەلەسى قاراستىرىلادى. جۇمىس توبى ورال قالاسىندا تۇرىپ جاتقان 13 وتباسىمەن سويلەستى. ناتيجەسىندە, 4 وتباسى اۋىلعا كوشىپ كەلۋگە نيەت ءبىلدىرىپ وتىر. ايتا كەتەيىك, جوعارىداعى ەلدى مەكەندەرگە جەكە ينۆەستور ەسەبىنەن ءۇي سالۋ جوسپارلانعان. كوشىپ كەلۋگە نيەتتى ازاماتتارعا جەرگىلىكتى دەمەۋشىلەر ەسەبىنەن ۇساق مالىن جانە ءىرى قارا مالىن بەرۋ, 1 ملن 476 مىڭ تەڭگەگە دەيىن قايتارىمسىز گرانت الۋعا جانە «اۋىل اماناتى» باعدارلاماسى بويىنشا نەسيە الۋعا بولاتىنى جونىندە ءتۇسىندىرىپ جاتىرمىز, – دەيدى قازتالوۆ اۋدانىنىڭ اكىمى اسلانبەك سارقۇلوۆ.
ايات بولات ۇلىنىڭ تۋعان اۋىلىنا قايتا كوشۋى اۋدانداعى ەرەكشە وقيعاعا اينالعان. اۋدان اكىمى اسلانبەك سارقۇلوۆتىڭ ءوزى ورال قالاسىنا ارنايى بارىپ, سيسەنوۆتەر اۋلەتىمەن جۇزدەسكەن. اياتتىڭ اۋىلعا قونىس اۋدارۋعا جانە اۋىل ەكونوميكاسىنىڭ دامۋىنا ۇلەس قوسۋعا دەگەن ىزگى نيەتى ءۇشىن ريزاشىلىق ءبىلدىرىپ, ناقتى كومەك بەرىلەتىنىن ايتىپ, ۋادە بەرگەن.
سونىمەن ايات سيسەنوۆتىڭ وتباسى جاڭاتاڭ اۋىلىندا بىردەن باسپانالى بولادى. وتاعاسى اۋىلداعى اۋىزسۋ ستانساسىنا وپەراتور, ال ايەلى مەكتەپكە جۇمىسقا ورنالاسادى. بۇعان قوسا جەرگىلىكتى مەتسەناتتار ەرۋلىك رەتىندە جاڭا اۋىلداسىنىڭ قوراسىنا 2 ءىرى قارا جانە 5 قوي كىرگىزبەك نيەتتە.
باتىس قازاقستان وبلىسى
