قارجى-ەكونوميكالىق بلوك مينيسترلەرىن تىڭداپ بولعان سوڭ, پرەمەر-مينيستر بيۋدجەت شىعىستارى تولىعىمەن ەكونوميكالىق تابىس اكەلۋگە باعىتتالىپ, ءونىمسىز شىعىستار تولىعىمەن جويىلۋى كەرەكتىگىن اتاپ ءوتتى.
«قارجى مينيسترلىگى 10 كۇن ىشىندە رەسپۋبليكالىق بيۋدجەتكە جانە ءبىر اي ىشىندە جەرگىلىكتى بيۋدجەتتەردىڭ بارلىعىنا رەۆيزيا جۇرگىزىپ, اسا ماڭىزى جوق شىعىستاردى ايتارلىقتاي قىسقارتۋعا ءتيىس. ەشكىم دە اقشانى ورىنسىز شاشپاۋى كەرەك», دەدى ولجاس بەكتەنوۆ.
Cونىمەن قاتار پرەمەر-مينيستر سالىق كودەكسىنىڭ جوباسىن قايتا جازىپ, ونىڭ فيلوسوفياسىن وزگەرتۋ قاجەتتىگىن اتاپ ءوتتى.
«ساراپشىلار مەن بيزنەس قوعامداستىقتارىنىڭ پىكىرلەرىن ەسكەرۋ قاجەت. سالىق كودەكسى بيزنەستىڭ بەلسەندى بولۋىنا جاعداي جاساپ, ونى ۇلعايتۋعا ىنتالاندىرۋى كەرەك», دەپ تاپسىردى ول.
ولجاس بەكتەنوۆتىڭ ايتۋىنشا, قۇجاتتى دايىنداۋ كەزىندە اكىمشىلەندىرۋدى تولىق تسيفرلاندىرىپ, سالىق جەڭىلدىكتەرىن بەرۋ ماسەلەسىن رەتتەۋ قاجەت.
جالپى, پرەمەر-مينيستر بيزنەسكە فيسكالدىق شىعىندار مەن اكىمشىلىك جۇكتەمەلەردەن قورىقپاي, ء«وسۋ» قاعيداتى بويىنشا جۇمىس ىستەۋ ءۇشىن ءتيىمدى جاعداي جاساۋ قاجەتتىگىن اتاپ ءوتتى.
ۇكىمەت باسشىسى ونەركاسىپتىك دامۋعا جاڭا سەرپىن بەرۋ ءۇشىن بىرقاتار ناقتى مىندەتتەردى بەلگىلەپ, ءبىرىنشى ۆيتسە-پرەمەر رومان سكليارعا 10 كۇن ىشىندە بارلىق ءىرى ونەركاسىپ كاسىپورنى يەلەرىمەن, ءبىرىنشى كەزەكتە ءوندىرۋشى سالالارداعى كاسىپورىندارمەن كەلىسسوزدەر جۇرگىزۋدى تاپسىردى.
«ولار جاقىن ارادا جاڭا جوعارى دارەجەدە وڭدەۋ وندىرىستەرىن قۇرۋدىڭ ناقتى جوسپارلارىن ۇسىنۋلارى كەرەك», دەدى ولجاس بەكتەنوۆ.
بۇل رەتتە پرەمەر-مينيستر وتاندىق ونەركاسىپ سالاسىنداعى الپاۋىت كاسىپورىندار قازاقستاندىق تاۋارلاردى, جۇمىستار مەن قىزمەتتەردى ساتىپ الۋدى تۇبەگەيلى ارتتىرۋعا ءتيىس ەكەنىن اتاپ ءوتتى. ولارمەن ءتيىستى كەلىسىمدەر جاسالماق.
قۇرىلىس سالاسىنىڭ تۇيتكىلدى ماسەلەلەرىن تالقىلاي وتىرىپ, پرەمەر-مينيستر وتاندىق وندىرۋشىلەردىڭ ونىمدەرىن كەڭىنەن قولدانۋدىڭ ماڭىزدىلىعىن اتاپ ءوتتى.
«بارلىق سمەتالىق قۇجاتتارعا قازاقستاندىق قۇرىلىس ماتەريالدارى مەن باسقا دا زاتتار ەنگىزىلۋگە ءتيىس. سونداي-اق سمەتالىق قۇجاتتامالارعا ماتەريالدار مەن جۇمىستاردىڭ قۇنىن ورىنسىز جوعارىلاتىپ جىبەرۋگە قاتىستى تەكسەرۋ جۇرگىزىڭىزدەر. سمەتالاردىڭ قۇنى كوتەرىلىپ كەتەتىنى بارشاعا ءمالىم. بۇل ماسەلەدە دە ءتارتىپ ورناتۋ كەرەك», دەدى ولجاس بەكتەنوۆ.
سونداي-اق ۇكىمەت باسشىسى ونەركاسىپتىك كاسىپورىنداردى ەنەرگيامەن سەنىمدى تۇردە قامتاماسىز ەتۋدىڭ ماڭىزدىلىعىن اتاپ ءوتتى. پرەزيدەنتتىڭ تاپسىرماسى بويىنشا بيىل 700 مۆت-تان استام قوسىمشا گەنەراتسيانى ىسكە قوسۋ قاجەت. ولجاس بەكتەنوۆ تاپسىرما ورىندالماعان جاعدايدا ءتيىستى قورىتىندىلار جاسالاتىنىن اتاپ ءوتتى.
سۋ رەسۋرستارىمەن قامتاماسىز ەتۋ ماسەلەسىنە قاتىستى پرەمەر-مينيستر جاۋاپتى مينيسترلىككە ەكونوميكا سالالارىندا سۋدى ۇتىمدى تۇتىنۋ جونىندەگى شارالار كەشەنىن دايىنداۋدى, سونداي-اق سۋ پايدالانۋ مادەنيەتىن ەنگىزۋ جونىندەگى جۇمىستاردى پىسىقتاۋدى تاپسىردى.
قاتتى تۇرمىستىق قالدىقتاردى قايتا وڭدەۋ زاۋىتتارىن سالۋعا قاتىستى ۇكىمەت باسشىسى ءبىر اي مەرزىمدە جەكە ينۆەستيتسيالار تارتۋ جونىندە ۇسىنىستار ازىرلەۋدى تالاپ ەتتى.
«ۇسىنىستار جالپى كوزقاراستاردى عانا ەمەس, الەۋەتتى ينۆەستورلارى مەن ىسكە اسىرۋ مەرزىمدەرى بار ناقتى جوبالاردى بىلدىرەدى», دەپ اتاپ ءوتتى پرەمەر-مينيستر.
الەۋمەتتىك بلوك ماسەلەلەرىنە توقتالعان ولجاس بەكتەنوۆ ەڭ الدىمەن ءمامس جۇيەسىن رەفورمالاۋ قاجەتتىگىنە نازار اۋداردى.
ء«مامس جۇيەسى ەلەۋلى قايتا فورماتتاۋدى قاجەت ەتەدى دەپ سانايمىن. قاراجاتتى ءتيىمسىز جۇمساۋ مەن ارتىق جالعان تىركەۋلەر بولا تۇرا ونى قارجىلاندىرۋدى ۇلعايتۋعا جول بەرىلمەيدى. سالا تولىق تسيفرلاندىرۋ مەن اشىقتىقتى تالاپ ەتەدى», دەدى پرەمەر-مينيستر.
وتىرىس بارىسىندا ۇكىمەت باسشىسى تسيفرلىق ترانسفورماتسيانى جۇرگىزۋ, كولىك جانە اۋىل شارۋاشىلىعى سالالارىن دامىتۋ, «جايلى مەكتەپ» جانە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوبالارىن ىسكە اسىرۋ, سونداي-اق ازاماتتاردى الەۋمەتتىك قولداۋ, مەملەكەتتىك ساتىپ الۋ جانە مەملەكەتتىك-جەكەشەلىك ارىپتەستىك تەتىكتەرىن رەفورمالاۋ جونىندە ناقتى تاپسىرمالار بەردى.
ء«بىز باتىل ارەكەت ەتەتىن ۇكىمەت بولامىز. بىزگە ءوسۋ قارقىنىن ءتيىمدى ۇلعايتۋ, ەكونوميكانى ءارتاراپتاندىرۋدى بەلسەندىرەك جۇرگىزۋ, ينۆەستيتسيا تارتۋ جانە بارلىق مىندەتتەردى شەشۋ ءۇشىن جەتكىلىكتى وكىلەتتىكتەر بەرىلدى», دەپ اتاپ ءوتتى ولجاس بەكتەنوۆ.
ونىڭ ايتۋىنشا, فورماليزم مەن بيۋروكراتيالىق سارساڭعا سالۋدى تولىعىمەن جويا وتىرىپ, ستەرەوتيپتەردەن ارىلۋ قاجەت.
«مينيسترلەر ءوز بەتىنشە شەشىم قابىلداي بىلۋگە ءتيىس, سالالىق ماسەلەلەردى ءوز دەڭگەيىندە جەدەل شەشۋلەرى قاجەت. جۇمىس قارقىنى جوعارى, تالاپ قاتاڭ بولاتىنىن اركىم تۇسىنۋگە ءتيىس», دەپ قورىتىندىلادى ءسوزىن پرەمەر-مينيستر.
