مەملەكەت باسشىسى اتاپ وتكەندەي: «قازاقستاننىڭ ەكونوميكالىق دامۋىنىڭ جاڭا پاراديگماسى ەلىمىزدىڭ باسەكەلىك ارتىقشىلىقتارىن ءتيىمدى پايدالانۋعا جانە ءوندىرىس سالاسىنداعى ەڭبەك, كاپيتال, رەسۋرستار, تەحنولوگيا سياقتى نەگىزگى فاكتورلاردىڭ الەۋەتىن بارىنشا اشۋعا نەگىزدەلەدى». سوندىقتان ۇكىمەتتىڭ كەڭەيتىلگەن وتىرىسىندا ايتىلعان ون مىندەت كەشەندى جۇمىستىڭ ارقاسىندا جىل سايىنعى ەكونوميكا كولەمىنىڭ ءوسىمىن كەمىندە 6 پايىزدان تومەندەتپەۋگە ءتيىس.
الەمدىك تاجىريبە كورسەتكەندەي, ەكونوميكالىق ءوسىمنىڭ ماڭىزدى فاكتورلارىنىڭ ءبىرى – ۇكىمەتتىڭ كەڭەيتىلگەن شىعىندارى. كەيىنگى 40 جىل ىشىندە دۇنيە ءجۇزىنىڭ كوپتەگەن ەلى مەملەكەت كولەمى مەن ەكونوميكالىق ءوسىم قارقىنى اراسىنداعى تەرىس قاتىناسپەن سيپاتتالدى. سول سەبەپتى مەملەكەتتىڭ ۇلكەن كولەمى – ءىجو-دەگى مەملەكەتتىك شىعىنداردىڭ جوعارى ۇلەسى, ونىڭ ىشىندە ەكونوميكانىڭ قۇرىلىمىنا بايلانىستى, ەكونوميكالىق ءوسۋدى تەجەيدى. سايكەسىنشە ۇكىمەتتىڭ باستى باسىمدىعى مەملەتكەتتىك شىعىنداردى وڭتايلاندىرىپ, كىرىس بولىگىن جۇيەلى ارتتىرۋدىڭ تەتىكتەرىن قاراستىرۋ بولماق. ونى جۇزەگە اسىرۋ ءۇشىن قازىرگى ەكونوميكالىق احۋالعا قاتىستى وزەكتى ماسەلەلەردى «كىشى جەڭىستەر» ستراتەگياسى ارقىلى ەڭسەرىپ, ەكونوميكانىڭ ۇزاقمەرزىمدى ساپالى دامۋىن قامتاماسىز ەتۋ جوسپارىن ويلاستىرۋ قاجەت. ەكونوميكانىڭ تيىمدىلىگى مەن قارجىلىق تۇراقتىلىقتىڭ تاعى ءبىر ماڭىزدى كورسەتكىشى – ۇلتتىق ۆاليۋتا باعامى. حالىقتىڭ جىل بويى كوڭىل كۇيىنە تىكەلەي اسەر ەتەتىن كورسەتكىش. ۇلكەن ماسەلەلەردى شەشۋ جولىندا جاڭا ۇكىمەت مۇنداي سەزىمتال نارسەلەردى دە ويدان شىعارماۋى كەرەك.
الەمدە مەملەكەتتىڭ قارجى مولشەرى دەپ ەلدىڭ اۋماعى مەن حالىق سانى ەمەس, مەملەكەتتىك سەكتوردا جۇمىس ىستەيتىندەردىڭ ۇلەس سالماعى, مەملەكەت مەنشىگىندەگى اكتيۆتەردىڭ ۇلەس سالماعى, مەملەكەتتىك كاسىپورىنداردا وندىرىلگەن ءونىمنىڭ ۇلەس سالماعى (مەملەكەتتىك كاسىپكەرلىك), ءىجو-دەگى مەملەكەتتىك شىعىنداردىڭ ۇلەس سالماعى ەسەپتەلەدى. ال مەملەكەتتىڭ قارجى مولشەرىن تەز ارادا ارتتىرۋ ءۇشىن العا جىلجۋدى قامتاماسىز ەتەتىن ەكونوميكانى قۇرىلىمداۋشى سالالار قاجەت. ال الەمدەگى جاڭا توڭكەرىس الىپ كەلەتىن سالا – جاساندى ينتەللەكت. ونىڭ جۋىق ارادا قامتىماعان سەكتورى قالمايدى. سوندىقتان مۇنداي تەندەنتسيالاردان قالىس قالۋ ارتتا قالعان مەملەكەتپەن پارا-پار. قازاقستاندا جاساندى ينتەللەكت قۇرالدارىن دامىتۋدىڭ ىرگەتاسى قالىپتاسىپ كەلەدى, باستىسى جىگەر دە بار. پايدالانا الماعان مۇمكىندىكتەر رەتىندە ەمەس, الەۋەتىمىزدى ناقتى ناتيجەمەن كورسەتۋ ماڭىزدى.
ريززات تاسىم,
قازاقستان قوعامدىق دامۋ ينستيتۋتى قوعامدىق ۇدەرىستەردى زەرتتەۋ ورتالىعىنىڭ باسشىسى
