7 اقپان كۇنى اقتوعاي اۋدانى ورتالىعىنان شالعاي جاتقان ايىرتاس اۋىلىندا كۇندىزگى ساعات ەكى شاماسىندا ايەل بالاسىمەن بوران كەزىندە ۇيدەن شىعىپ, ودان قايتىپ ورالماعان.
ءداپ وسى كۇننىڭ تۇنىندە تۋىستارىنان جوعالعانى تۋرالى حابار العاننان كەيىن بىراق جەرگىلىكتى قۇتقارۋشىلار قىزمەتىنە كىرىسكەن. بوراندى ءتۇنى ادام ىزدەۋ بىلاي تۇرسىن, اياق الىپ ءجۇرۋدىڭ ءوزى مۇمكىن ەمەس شارۋا. بىراق اقتوعايلىق قۇتقارۋشىلار اۋىل جۇرتىمەن بىرگە الاڭداپ, امان-ەسەن تابۋدى ماقسات تۇتادى.
مىنە, ءسويتىپ 1993 جىلعى ايەل مەن 2017 جىلعى جاس بالانى تاڭعى 08.50-دە ءبىر-اق تابادى. ايىرتاس اۋىلىنىڭ باتىس بولىگىنە قاراي 6 شاقىرىم جەردەن تابىلىپ, بىردەن اۋداندىق ورتالىق اۋرۋحاناعا جەتكىزىلەدى. قازىر جاعدايلارى قالىپتى, قاجەتتى ءدارى-دارمەك بەرىلىپ, ەم-دوم جاسالدى.
ءوز كەزەگىندە, تۋىستارى, اۋىل جۇرتى قۇتقارۋشىلاردىڭ ءتۇنى بويعى تىنىمسىز ەڭبەگىنە ايرىقشا العىس ايتتى.
مىنە, ەلدىڭ وسىنداي شىنپەيىل تىلەگىن الۋ – ءمىنسىز قىزمەتتىڭ ناق ءوزى.
مۇنىمەن قوسا, بۇقار جىراۋ اۋدانىندا بىرنەشە كولىك قار قۇرساۋىندا قالىپ قويدى. توتەنشە جاعدايلار قىزمەتى كولىكتەرىن سۇيرەپ شىعارىپ بەرىپ, پوليتسيا قىزمەتكەرلەرى جول باستاپ, دىتتەگەن جەرلەرىنە امان جەتكىزدى.
وسىنداي جاعداي قاراعاندى – تەمىرتاۋ تاسجولىندا دا ءجيى بولادى.
توتەنشە جاعدايلار دەپارتامەنتىنىڭ قىزمەتكەرلەرى سول جولدا قالىپ قويعان №107 مارشرۋتتىق اۆتوبۋستىڭ 30 جولاۋشىسىن قالاعا جەتكىزدى.
وسى رەتتە, پوليتسەيلەردىڭ دە جولاۋشىلار اماندىعى دەپ شاپقىلاۋمەن بولعانىن اتاپ ءوتۋىمىز قاجەت-ءتى. قىزمەتتىك كولىكتەرىمەن قارعا باتىپ قالعان بىرنەشە تەحنيكانى سۇيرەپ شىعاردى. ءبىر-بىرىنە جانى اشىعان جولاۋشىلار دا كومەك قولىن سوزىپ جاتتى. وسىنداي قيىن-قىستاۋ كەزەڭدە ەشتەڭەدەن قايمىقپاي ەلدىگىمىزدى كورسەتتىك, ەرلىگىمىزدى دە پاش ەتتىك. اسىرەسە الەۋمەتتىك جەلىلەرگە جاريالانعان جازبالاردان توتەنشە جاعدايلار دەپارتامەنتى مەن پوليتسيا قىزمەتكەرلەرىنە دەگەن كوپتىڭ ىقىلاس-پەيىلىن انىق اڭعارۋعا بولادى.
قاراعاندى وبلىسى
