ەلوردا فيلارمونياسى ءۇشىن اتالعان قوس تالانتتىڭ ورنى بولەك. ايتالىق, مىرزاعالي ايدابولوۆ 1997 جىلى استانا اكىمدىگىنىڭ شاقىرۋىمەن باس شاھارعا قونىس اۋدارىپ, قالالىق فيلارمونيانىڭ قازاق ۇلتتىق اسپاپتار وركەسترىن قۇرىپ, 1998 جىلدىڭ 15 ساۋىرىندە «جاستار» سارايىندا ونىڭ تۇساۋكەسەر كونتسەرتىن وتكىزدى. بۇل استانالىق فيلارمونيانىڭ نەگىزىن قالاعان العاشقى ونەر ۇجىمى بولدى. دارىندى ديريجەر سوڭعى دەمىنە دەيىن وركەسترگە جەتەكشىلىك ەتىپ, ونى ءدۇيىم ەلگە تانىتۋعا زور ۇلەس قوستى.
ال مۇحامەتقالي ءتىنالين قازىرگى قۇرمانعازى اتىنداعى قازاق ۇلتتىق كونسەرۆاتورياسىن اياقتاعاننان كەيىن ءوزى تۋعان تسەلينوگراد قالاسىنا ورالىپ, «تىڭ يگەرۋشىلەر» سارايىنىڭ «التىن ءدان», وبلىستىق فيلارمونيانىڭ «ارمانداستار» ەسترادالىق انسامبلدەرىنە جەتەكشىلىك ەتتى. اقمولا دا العاشقى حالىق اسپاپتارى وركەسترىن قۇرىپ, قازاق وركەسترىنە ارنالعان كوركەم تۋىندىلاردى جارىققا شىعاردى. كومپوزيتور ءومىرىنىڭ سوڭىنا دەيىن قازاق ۇلتتىق ونەر ۋنيۆەرسيتەتىندە ۇستازدىق ەتە ءجۇرىپ, استانالىق فيلارمونيامەن بايلانىسىن ەش ۇزگەن ەمەس. 40-تان اسا ءتۇرلى مۋزىكالىق تۋىندى جازىپ, 200-دەن اسا شىعارمانى وركەسترگە, انسامبلدەرگە لايىقتاپ وڭدەدى.
كەش بارىسىندا ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ قازاق وركەسترى (باس ديريجەرى-كوركەمدىك جەتەكشىسى – قازاقستاننىڭ ەڭبەك سىڭىرگەن قايراتكەرى, پروفەسسور ايتقالي جايىموۆ, ديريجەرى – مادەنيەت قايراتكەرى نۇرلان بەكەنوۆ), قوس مۋزىكانتتىڭ شاكىرتتەرى, فيلارمونيا سوليستەرى ولاردىڭ ءتول تۋىندىلارى مەن وڭدەگەن شىعارمالارىن ورىندادى. اتاپ ايتقاندا, بەلگىلى ءانشى, قازاقستاننىڭ ەڭبەك سىڭىرگەن قايراتكەرى گۇلميرا سارينا, قوبىزشى جانار ءجۇسىپوۆا, مادەنيەت سالاسىنىڭ ۇزدىگى نۇراي تاناباەۆ, «دارىن» مەملەكەتتىك جاستار سىيلىعىنىڭ لاۋرەاتى التىنبەك ءابىلدا, سونداي-اق مىرزاعالي ايدابولوۆتىڭ قىزى گۇلجان ايدابولوۆا مەن مۇحامەتقالي ءتىناليننىڭ پەرزەنتى پەريزات ءتىنالينا ونەر كورسەتتى.
