مەملەكەت قايراتكەرى, قازاقتىڭ كورنەكتى ديپلوماتى, توتەنشە جانە وكىلەتتى ەلشى اسقار احمەت ۇلى مۋسينوۆ 63 جاسقا قاراعان شاعىندا كەنەتتەن قايتىس بولدى. بۇل تۋرالى سىرتقى ىستەر مينيسترلىگى ءمالىم ەتتى.
ۇزاق مەرزىمدى ديپلوماتيالىق قىزمەت بارىسىندا ول قازاقستان رەسپۋبليكاسىنىڭ ءسىم ورتالىق اپپاراتىندا جانە شەت ەلدەردەگى مەكەمەلەرىندە ءوزى جەتەكشىلىك ەتەتىن جۇمىستىڭ بارلىق باعىتتارىندا قازاقستاننىڭ مۇددەلەرىن تاماشا قورعاپ, العا قويىلعان مىندەتتەردى كاسىبي تۇردە شەشۋدە قابىلەتى مەن تەرەڭ ءبىلىمىن كورسەتە ءبىلدى. ءسىم جاۋاپتى حاتشىسى جانە سىرتقى ىستەر ءمينيسترىنىڭ ورىنباسارى رەتىندە ول تاياۋ شىعىس جانە افريكا قۇرلىعى ەلدەرىمەن ەكىجاقتى قارىم-قاتىناستاردى نىعايتۋعا, كونسۋلدىق قىزمەت پەن مەملەكەتتىك پروتوكولدى دامىتۋعا زور ۇلەس قوستى.
مىسىرداعى, ساۋد ارابياسىنداعى, بىرىككەن اراب امىرلىكتەرى مەن وڭتۇستىك افريكا رەسپۋبليكاسىنداعى توتەنشە جانە وكىلەتتى ەلشى قىزمەتىن اتقارا ءجۇرىپ, قازاقستان مۇددەسىن كاسىبي تۇردە ىلگەرىلەتىپ, قورعادى. يسلام ىنتىماقتاستىعى ۇيىمى باس حاتشىسىنىڭ عىلىم جانە تەحنولوگيا جونىندەگى ورىنباسارى جانە ازىق-ت ۇلىك قاۋىپسىزدىگى جونىندەگى يسلام ۇيىمىنىڭ باس ديرەكتورى رەتىندە حالىقارالىق بەيبىتشىلىك پەن تۇراقتىلىق ىسىنە ادال قىزمەت ەتتى.
ديپلوماتيالىق ورتادا ول ءوز وتانىنىڭ ناعىز پاتريوتى, جوعارى دەڭگەيدەگى ديپلومات جانە اراب باعىتىنداعى قازاق ديپلوماتيا مەكتەبىنىڭ نەگىزىن قالاۋشىلاردىڭ ءبىرى رەتىندە تانىمال بولدى.
