«بيىل وڭىردە «قارىزسىز قوعام» جوباسىنىڭ كەزەكتى وقىتۋ كەزەڭى باستالدى. جىل سوڭىنا دەيىن 8 500 ازاماتتىڭ قارجىلىق ساۋاتىن ارتتىرۋ جوسپارلانعان. قازىرگى ۋاقىتتا ەڭبەكشىقازاق, قاراساي, تالعار, جامبىل, ىلە جانە ۇيعىر اۋدانىندا وقۋ كۋرستارى باستالىپ كەتتى. ءبىر عانا ەڭبەكشىقازاق اۋدانىنان 1 مىڭعا جۋىق ءوتىنىش كەلىپ ءتۇستى. وتكەن جىلى وسى جوبا اياسىندا 8 مىڭنان استام ءوڭىر تۇرعىنى قاراجاتىن ءتيىمدى باسقارۋدى جانە شىعىنداردى وڭتايلاندىرۋدى ۇيرەندى», دەيدى «Amanat» پارتياسى الماتى وبلىستىق فيليالى توراعاسىنىڭ ورىنباسارى اسلان كوبەنتاەۆ.
ال الماتى وبلىسى بويىنشا «قارىزسىز قوعام» جوباسىنىڭ جەتەكشىسى, مەنتور ايگۇل جايلىباەۆانىڭ ايتۋىنشا, اۋىل ازاماتتارى قاراجاتتى ۇنەمدى ءارى ءتيىمدى جۇمساۋدى بىرتە-بىرتە ۇيرەنىپ كەلەدى. كۋرسقا قاتىسۋشىلاردىڭ كىرىس-شىعىستى ەسەپتەي ءبىلۋى, قارجىنى ۇتىمدى جوسپارلاۋى, دۇرىس ماقسات قويۋى جايلى پايدالى مالىمەتتەر الۋىنا مۇمكىندىك مولايادى.
«تۇرعىندار قاراجاتتى ءتيىمدى جۇمساۋدى ۇيرەنىپ جاتىر. وسى ماقساتتا قاتىسۋشىلارعا ءتۇرلى ءدارىس ءوتىپ, ءۇي تاپسىرماسىن بەرەمىز. سونداي-اق ءوز كاسىبىن باستاعىسى كەلەتىندەرگە, تابىس تابۋدىڭ ءتۇرلى جولىن كورسەتەتىن پايدالى مالىمەتتەرمەن بولىسەمىز. ساراپشىلار كاسىپكەرلەرگە ساۋاتتى ەسەپ جۇرگىزۋدى وقىتادى», دەيدى
مەنتور.
ونىڭ ايتۋىنشا, ءۇش ساعاتتىق وقىتۋ بەس كۇنگە سوزىلادى. كۋرستاردى قارجىلىق-ەكونوميكالىق ءبىلىمى بار جانە اۋديتوريامەن جۇمىس ىستەي الاتىن ساراپشىلار جۇرگىزەدى. سونداي-اق جوبا اياسىندا بورىشكەرلەرگە تەگىن زاڭ كومەگىن كورسەتۋ جوسپارلانعان.
«جوباعا بارلىق نيەت ءبىلدىرۋشى قاتىسا الادى. ول ءۇشىن «Amanat» پارتياسىنىڭ فيليالدارىنا نەمەسە قالالار مەن اۋدانداردىڭ اكىمدىكتەرىنە جۇگىنۋ قاجەت. ءبىزدىڭ مىندەتىمىز – مۇمكىندىگىنشە نەسيەسى كوپ, قوماقتى قارىزى بار ادامداردى كوبىرەك قامتۋ. ولار نەسيەلەردى مەرزىمىنەن بۇرىن وتەۋدى, ينۆەستيتسيالاۋدى, قارجى پيراميدالارىن جانە ينتەرنەتتەگى الاياقتىقتى اجىراتا ءبىلۋدى ۇيرەنەدى», دەيدى ايگۇل جايلىباەۆا.
ايتا كەتۋ كەرەك, «قارىزسىز قوعام» − حالىقتىڭ قارجىلىق ساۋاتىن ارتتىرۋعا باعىتتالعان «Amanat» پارتياسى مەن «Halyk Bank»-ءتىڭ بىرلەسكەن باستاماسى. اتالعان جوبادا نەسيە بەرەشەگى بار جانە بورىشكەرلەر تىزىمىندە تۇرعان اۋىل تۇرعىندارى, قارىزى بار جانە ونىڭ مەرزىمىن وتكىزىپ العان ازاماتتار, مەملەكەتتەن جەڭىلدىكپەن نەسيە الۋعا ۇمىتكەر كاسىپكەرلەر وقي الادى.
بۇعان دەيىن جوبانىڭ العاشقى وقىتۋ كۋرسى 2 مامىردا باستالىپ, وڭىردەگى 9 اۋدان مەن قوناەۆ قالاسىندا جۇزەگە اسىرىلعان.
الماتى وبلىسى
