ەڭبەك جانە حالىقتى الەۋمەتتىك قورعاۋ مينيسترلىگىنىڭ باستاماسىمەن بىلتىر ەرەكشە قاجەتتىلىكتەرى بار ادامدارعا ينۆاتاكسي قىزمەتىن كورسەتۋ كەزىندە تاكسي اگرەگاتورلارىن پايدالانۋعا مۇمكىندىك بەرەتىن قاناتقاقتى جوبا باستالدى. 2024 جىلدىڭ 1 اقپانىنداعى دەرەككە سۇيەنسەك, استانا مەن الماتى قالالارىندا اتالعان قىزمەت 9,9 مىڭ رەت كورسەتىلدى. ال وتكەن جىلى مۇگەدەكتىگى بار ادامدارعا ينۆاتاكسي قىزمەتى 53,9 مىڭ رەت كورسەتىلگەنىن ايتا كەتكەن ءجون.
ينۆاتاكسي قىزمەتىن كورسەتۋ جىلدامدىعى مەن ساپاسىن ارتتىرۋ ماقساتىندا مينيسترلىك اكىمدىكتەرمەن بىرلەسىپ وسى قىزمەتتىڭ تەتىگىنە وزگەرتۋ ەنگىزۋ تۋرالى شەشىم قابىلداعان ەدى. ويتكەنى بۇعان دەيىن ازاماتتارعا قىزمەت الۋدان ءبىر كۇن بۇرىن تەلەفون ارقىلى جازىلۋ قاجەت بولاتىن. بۇل ولارعا ءوز ساپارلارىن الدىن الا جوسپارلاۋعا, ينۆاتاكسيدى كۇتۋگە ءماجبۇر ەتەتىن. سونداي-اق ينۆاتاكسي قىزمەتتەرىن كورسەتەتىن كولىك قۇرالدارىنىڭ جەتىسپەۋشىلىگى سياقتى ماسەلەلەر دە بولدى.
وسىناۋ كەلەڭسىزدىكتەردى رەتتەۋدىڭ ءبىر جولى – ينۆاتاكسي قىزمەتىنە تاكسي اگرەگاتورلارىن تارتۋ. مۇنداعى باستى شارت – ساپارلاردىڭ اقىسىنان پايىز ۇستاماۋ. ادەتتە مۇنداي پايىز اگرەگاتور پلاتفورمالارىنىڭ پايداسىنا اۋدارىلاتىن. وسى باستاماعا قولداۋ بىلدىرگەن «ياندەكس» كومپانياسى جوباعا وتەۋسىز نەگىزدە قاتىسۋعا نيەت ءبىلدىردى. سونىمەن بىلتىردان بەرى مۇگەدەكتىگى بار ازاماتتار ياندەكس Go ءموبيلدى قوسىمشاسى ارقىلى ينۆاتاكسي قىزمەتىن قولدانىپ كەلەدى. بۇل قىزمەتتى الۋشى ءۇشىن كولىكتى تەزىرەك تاڭداۋعا, ونلاين رەجىمدە تاپسىرىس مارتەبەسىن قاداعالاۋعا جانە ساپارلارعا مونيتورينگ جاساۋعا مۇمكىندىك بەرەدى. اتالعان قوسىمشادا مۇگەدەكتىگى بار ادامدار جۇرگىزۋشىگە ساپارداعى ەرەكشە قاجەتتىلىكتەرى تۋرالى ەسكەرتۋى ءۇشىن ارنايى مۇمكىندىكتەر ەكرانى ىسكە قوسىلدى. ءوز كەزەگىندە جۇرگىزۋشىلەر ادامدى كولىككە وتىرعىزۋ جانە ودان تۇسۋدە قالاي كومەك كورسەتۋگە بولاتىنى سەكىلدى ارنايى نۇسقاۋلار الادى.
قاناتقاقتى جوباعا العاشقى كەزەڭدە استانا جانە الماتى قالالارىنان مۇگەدەكتىگى بار ادامداردىڭ فوكۋس-توبى قاتىسادى. جوبا 2024 جىلى دا جالعاسىپ جاتىر. بولاشاقتا جاڭا فورماتتا قىزمەت كورسەتۋدى مۇگەدەكتىگى بار ادامداردىڭ باسقا توپتارىنا كەڭەيتۋ جانە ەلدىڭ بارلىق وڭىرىندە قولدانۋ جوسپارلانىپ وتىر.
