ابايدىڭ اشعابادتاعى ءمۇسىنىن كىم جاسايدى؟

اتالعان بايقاۋ تۇرىكمەنستاننىڭ اشعاباد قالاسىندا ورناتىلاتىن اباي ەسكەرتكىشىنىڭ ۇزدىك جۇمىس جوباسىن ايقىنداۋ ماقساتىن كوزدەيدى. دودانىڭ شىعارماشىلىق تالاپتارىنا كەلسەك, ەسكەرتكىشتىڭ جۇمىس جوباسى تۇلعانى تۇرعان بويى كەيپىندە بەينەلەپ, كوركەمدىك دەڭگەيى, ەستەتيكالىق مانەرلىلىگى, يدەيالىق مازمۇنى جوعارى, كوركەمدىك تۇتاستىعى مەن ءبىتىمى ەرەكشە بولۋى كەرەك. ءمۇسىن الىستان كوز تارتىپ, ورنالاساتىن جەردەگى كورىنىستىڭ باسىم كومپوزيتسياسى رەتىندە قابىلدانۋى دا شارت. ەسكەرتكىش اقىننىڭ كەمەل جاسىن بەينەلەپ, ونىڭ پورترەتتىك ۇقساستىعىن قامتاماسىز ەتۋگە ءتيىس.

گرافيكالىق ورىنداۋ ادىستەرى – ماكەتتىڭ ءتۇسى, تەحنيكاسى, ماتەريالى جانە ءمۇسىننىڭ ەسكيزى اۆتوردىڭ ءوز قالاۋى بويىنشا ورىندالادى. ەسكەرت­كىشتىڭ ماتەريالى – قولا. ەسكەرت­كىشتىڭ ءوزىنىڭ بيىكتىگى – 4,5-5 م, تۇعىردىڭ بيىكتىگى – 2,0-2,5 م.

ايتا كەتەيىك, كونكۋرس ماتەريالدارىن مونۋمەنتتىك ونەر قۇرىلىستارىن ورناتۋ جونىندەگى كوميسسيا قارايدى.

اۆتورلار كونكۋرس ماتەريالدارىن مادەنيەت جانە اقپارات مينيسترلىگىنىڭ مادەنيەت كوميتەتىنە 25 اقپانعا دەيىن ۇسىنۋى كەرەك.

مۇسىنشىلەر بايقاۋى تۋرالى تولىق اقپاراتتى مادەنيەت جانە اقپارات مينيسترلىگىنىڭ سايتىنان وقۋعا بولادى.