فوتو: gov.kz
ۆەدومستۆو مالىمەتىنشە سۋىق سۋمەن جابدىقتاۋ قۇبىرىنىڭ جارىلۋى سالدارىنان توپىراق ىلعالدانىپ, كەيىن كولەمى 3200 تەكشە مەتر بولاتىن جىلجىما تۇسكەن. ەكى جەر ۇيگە, ونىڭ ىشىندە بىرەۋىنە ءىشىنارا زاقىم كەلگەن.
الدىن الا اقپاراتقا سايكەس, ۇيلەردە ءتورت ادام, ونىڭ ىشىندە ەكى بالا بولعان.
وقيعا ورنىندا «قازسەلدەنقورعاۋ» مم, الماتى قالاسىنىڭ «109 قۇتقارۋ قىزمەتى» مم, رەسپۋبليكالىق جەدەل-قۇتقارۋ جاساعىنان, الماتى قالاسى تجد, تجم 28237 اسكەري بولىمىنەن, جەدەل مەديتسينالىق كومەك بريگاداسىنان, مەدەۋ اۋدانىنىڭ اكىمدىگىنەن 160-تان استام ادام جانە 30 بىرلىك تەحنيكا جۇمىلدىرىلعان.
جاقىن ماڭداعى ۇيلەردىڭ تۇرعىندارى ەۆاكۋاتسيالانىپ, №47 مەكتەپكە ورنالاستىرىلعان. ولارعا تۇنەۋ ورنى, جىلى شاي جانە باسقا دا قاجەتتى كومەك كورسەتىلگەن. جينالۋ پۋنكتىنە ورنالاستىرىلعاننان كەيىن بىرنەشە ساعات وتكەن سوڭ, تۇرعىندار ءوز ەركىمەن دوستارى مەن تۋىستارىنا كەتكەن.
وقيعا ورنىندا تجد پسيحولوگيالىق توبى مەن دارىگەرلەر بريگاداسى جۇمىس ىستەپ جاتىر. ىقتيمال زارداپ شەككەندەردى ىزدەۋ جالعاسادى. ۇيلەردىڭ جاقىن ورنالاسۋى مەن تەحنيكانى پايدالانۋ مۇمكىندىگىنىڭ بولماۋى جۇمىستى قيىنداتىپ وتىر.
«اقپارات تولىقتىرىلاتىن بولادى. تەك رەسمي دەرەكتەرگە سەنۋدى سۇرايمىز», دەلىنگەن حابارلامادا.
