تسيفرلاندىرۋ جۇيەسىنىڭ قارقىندى كۇش الۋى ەلىمىزدىڭ ەكونوميكالىق الەۋەتىن ارتتىراتىنى انىق. بۇل رەتتە جەرگىلىكتى ستارتاپتار جوعارى دەڭگەيدەگى بەلسەندىلىگى مەن نارىقتا كورسەتكەن ساۋاتتىلىعى ارقىلى جاقسى ناتيجەگە قول جەتكىزىپ تە ۇلگەردى. سولاردىڭ ءبىرى – «MOST Investment Readiness Accelerator» باعدارلاماسىنىڭ تۇلەگى «Beksar» ستارتاپى. جەرگىلىكتى ينۆەستورلاردىڭ نازارىنا ىلىككەن ستارتاپقا بەلگىلى ينۆەستور ءارى كاسىپكەر مۇرات ءابدىراحمانوۆ 150 مىڭ دوللار ينۆەستيتسيا سالدى. ال «MOST Ventures» قورى 105 مىڭ دوللار قارجى قۇيدى. بۇل قاتارعا ينۆەستور ەلدار تولەش تە قوسىلىپ, ستارتاپتىڭ كاپيتالىنا 50 مىڭ دوللار قوستى.
– مەن ماقسات بەكتىباەۆتى العاش رەت «Digital Bridge» فورۋمىنداعى ستارتاپ «شايقاسىنىڭ» فينالىندا كوردىم. ماعان جوبا دا, ونىڭ نەگىزىن قالاۋشى دا ۇنادى. «Beksar» ۇجىمى نارىقتاعى كەمشىلىكتەردىڭ شەشىمىن قاراستىرىپ جاتىر. فورۋمنان كەيىن ولاردىڭ سايتىن قاراپ, ءوزىم ۇسىنىسپەن شىقتىم. بۇل ينۆەستيتسيا ورتالىق ازيانىڭ نەگىزگى قۇرىلتايشىلارىنا قولداۋ كورسەتۋ ستراتەگياسىنا دا سايكەس كەلەدى, – دەيدى مۇرات ءابدىراحمانوۆ.
«Beksar» – شاعىن جانە ورتا بيزنەستىڭ ۇدەرىستەرىن اۆتوماتتاندىرۋعا ارنالعان جوبا. ستارتاپ كليەنتتەرىنىڭ قاتارىندا ساۋدا دۇكەندەرى, ونداعان فيليالدارى بار ساۋدا جەلىلەرى بار. باعدارلامادا كاسسا, اناليتيكا, قويما ەسەبى سەكىلدى جۇيەلەر قامتىلعان. تەحنولوگيا ماركەتينگ قۇرالدارىن پايدالانۋعا مۇمكىندىك بەرەدى. «قازاقستاندا 150 مىڭنان اسا شاعىن جانە ورتا بيزنەس سۋبەكتىسى بار ەكەنىن ەسكەرسەك, بۇل سالالارداعى اۆتوماتتاندىرۋدىڭ ماڭىزدىلىعى مەن قاجەتتىلىگى بۇرىنعىدان دا وزەكتى بولىپ وتىر. «Beksar»-عا سالعان ينۆەستيتسيامىز ساۋدا نىساندارىنىڭ اعىمداعى ترەندتەرى مەن نارىقتىڭ ءوسۋ الەۋەتى تۋرالى تۇسىنىگىمىزدى كورسەتەدى. ستارتاپ وپەراتسيالىق تيىمدىلىكتى ارتتىرۋعا جانە اقىلدى اۆتوماتتاندىرۋ ارقىلى شىعىنداردى ازايتۋعا باعىتتالعان وفلاين ساۋدا ءۇشىن نەگىزگى شەشىمدى ۇسىنادى. ءبىز جەتىلگەن ءارى ماسشتابتاۋعا ءازىر ستارتاپتار كومانداسىنا سەنەمىز, – دەيدى «MOST Ventures» قورىنىڭ باسقارۋشى سەرىكتەسى ءالىم حاميتوۆ.
جوبانىڭ نەگىزىن قالاعان ماقسات بەكتىباەۆ قازىردىڭ وزىندە ەل بويىنشا 2700-دەن اسا دۇكەن جوباعا قوسىلعانىن ايتتى. ء«بىز ساۋدا يندۋسترياسىنان شىقتىق. جەكە ساۋدا دۇكەندەرىمىز بار جانە دۇكەن يەلەرىندە كەزدەسەتىن پروبلەمالاردى جاقسى بىلەمىز. ءبىزدىڭ ءونىم كاسىپكەرلەر ءۇشىن قيىندىقتى شەشە الادى جانە بۇعان كاسىبي ۆەنچۋرلىق كاپيتاليستەر نازار اۋدارعانىنا قۋانىشتىمىز. جوبانى ودان ءارى كەڭەيتۋ جانە جەتىلدىرۋ جوسپارى دا بار. «HoReCa» ءۇشىن شەشىمدى بەيىمدەۋدى ويلاستىرىپ جاتىرمىز», دەدى ول.
قىسقاسى, «Beksar» ستارتاپىنىڭ ساۋدا نىساندارى ءۇشىن اكەلگەن پايداسى زور. سونداي-اق تسيفرلاندىرۋ جولىندا ساۋدا ورىندارىنداعى جەڭىلدىك جۇيەسى, كاسسا ورىندارى, ارنايى تولەم سەكىلدى ۇدەرىستەردى ءبىر باعىتتا جيناپ, بەلگىلى ءبىر تەتىكتى باسۋ ارقىلى ناتيجەگە قول جەتكىزۋدى كوزدەدى. قازىرگى تاڭدا بۇل جۇزەگە اسىرىلعان دۇنيە. «Beksar» جۇيەسى تەحنولوگيالىق اۆتوماتتاندىرۋ, نارىقتاعى بەلسەندىلىك, ينۆەستيتسيا تارتۋ سىندى فاكتورلاردى توپتاستىرا وتىرىپ, كوزدەگەن ماقساتقا قول جەتكىزىپ كەلەدى. بۇل جوبانى سەنىمدىلىگى اسا جوعارى جانە بولاشاعى جارقىن ستارتاپتار قاتارىنا جاتقىزا الامىز.
نۇرداۋلەت كارىباي,
قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ 2-كۋرس ستۋدەنتى
