بارەكەلدى! 
كەشە تاراز قالاسىنداعى №1-ءشى پەرزەنتحانادا وبلىس ىسكەر ايەلدەرى قاۋىمداستىعىنىڭ قوعامدىق بىرلەستىگى “بىرلىگىمىز جاراسقان!” ۇرانىمەن وتكىزىلىپ جاتقان اكتسيا شەڭبەرىندە “اشىق جۇرەك” اتتى قايىرىمدىلىق ءىس-شاراسىن ۇيىمداستىردى. وبلىس ورتالىعىنداعى بۇل پەرزەنتحانادا ەلىمىزدىڭ كوپتەگەن بولاشاق باتىرلارى مەن اقىندارى, عالىمدارى مەن دارىندارى دۇنيەگە كەلىپ جاتىر دەۋگە تولىق نەگىز بار.
ويتكەنى, پەرزەنتحانا باس دارىگەرى ق.ساعىنعاليەۆانىڭ ايتۋىنشا, مۇندا ءبىر ايدا 600-گە جۋىق نارەستەنىڭ كىندىگى كەسىلەدى ەكەن. ال ۇستىمىزدەگى جىلدىڭ وتكەن 5 ايى ىشىندە ىڭگالاعان 3000 ءسابي دۇنيە ەسىگىن اشىپتى. اتام قازاق “ادامدى سانامايدى” دەپ ىرىم ەتسە دە, “بالالى ءۇي بازار” دەگەندەي, ەلىمىزدىڭ ءوسىپ-وركەندەپ جاتقان قۋانىشىن جۇرەك تۇكپىرىندە جاسىرىپ تۇرا المادىق. سونىمەن... پەرزەنتحانا زالىنا بوسانعاندارىنا نەبارى ءبىر اپتانىڭ كولەمى بولعان, بۇگىن-ەرتەڭ وتباسىنا ءسابيلى بولىپ ورالۋعا دايىن وتىرعان 20 انا شاقىرىلىپتى. ءبارى دە ورىمدەي جاس. ءبارىنىڭ قولىندا قۇنداقتاۋلى سابيلەر. ال “قىزىل شاقالاردىڭ” وزدەرىنە ارنالعان ءسان-سالتاناتپەن “شارۋاسى” جوق, ءار قايسىسى ءوز مىنەزدەرىمەن, ءوز ۇندەرىمەن پەرزەنتحانانى “باستارىنا كوتەرىپ” جاتىر. بەينە بۇل دا “اشىق جۇرەك” اكتسياسىنىڭ “باس ءانى” سىندى قۇلاقققا وعاش ەستىلمەيدى. وبلىس اكىمى جانىنداعى ايەلدەر ىستەرى جانە وتباسىلىق دەموگرافيالىق ساياسات جونىندەگى كوميسسيانىڭ حاتشىسى ك.توعىزباەۆا, وبلىس ىسكەر ايەلدەرى قاۋىمداستىعى قوعامدىق بىرلەستىگىنىڭ ءتورايىمى گ.نۇرىموۆا انالاردى قۋانىشتارىمەن قۇتتىقتادى. شىنىندا, ايەل مەرەيى – ومىرگە ءسابي اكەلۋىمەن اسقاقتاي تۇسەدى. ناعىز باقىت دەگەن دە وسى. وسىعان وراي, بۇگىندە ەلىمىزدەگى حالىق سانىنىڭ ءوسىپ-ونۋىنە قال-قادەرىنشە ۇلەس قوسىپ وتىرعان انالار ءۇشىن جاسالىپ جاتقان قامقورلىق تا از ەمەس. سونىڭ ارقاسىندا “التىن القا” مەن “كۇمىس القاعا” جانە كوپتەگەن الەۋمەتتىك جەڭىلدىكتەرگە قول جەتكىزگەن كوپ بالالى انالاردىڭ قاتارى دا جىل ساناپ كوبەيە تۇسۋدە. وبلىستا وتكىزىلىپ وتىرعان وسى قايىرىمدىلىق ءىس-شارا دا سول قامقورلىقتاردىڭ ءبىرى بولىپ تابىلادى. گۇلدار نۇرىموۆا الىستاعى مويىنقۇم اۋدانىنان كەلگەن جاس انا ايسۇلۋ ءابدىراحمانوۆا دۇنيەگە اكەلگەن ميراس اتتى ۇلعا “ناعاشى اجە” اتانىپ, بەسىك سىيلادى. ايسۇلۋدىڭ كۇيەۋى مەلس ءابدىراحمانوۆ قاراپايىم جۇمىسشى. ءوزى ءۇي شارۋاسىنداعى ايەل. سوندىقتان جابدىقتارى جالت-جۇلت ەتكەن بۇل سىيلىق, شىنىندا وبلىستا بۇرىن-سوڭدى قولعا الىنباعان جانە الداعى ۋاقىتتا ەلىمىز بويىنشا يگى داستۇرگە اينالدىرۋعا بولاتىن جاقسى باستاما ەكەن دەپ تۇيدىك. ءسويتىپ, سالتاناتقا شاقىرىلعان باسقا انالارعا دا بارلىعى 200 مىڭ تەڭگە كولەمىندەگى باعالى سىيلىقتار تابىس ەتىلدى. حالقىمىزدا “قۋانىش بولىسسە كوبەيەدى, قايعى بولىسسە ازايادى” دەگەن قاناتتى ءسوز بار. ەلباسى دا, ەل دە اتا-بابالاردىڭ وسى وسيەتىنە ۇنەمى ادالدىق تانىتىپ كەلەدى. بۇعان مىسال رەتىندە, الماتى وبلىسى مەن شىعىس قازاقستان وبلىسىنداعى توپان سۋ العان اۋىلداردىڭ ورنىنان بوي كوتەرگەن جاڭا قونىستى ايتۋعا بولادى. ال پەرزەنتحانادان وتباسىنا ورالعالى وتىرعان وتباسىلاردىڭ قۋانىشىنا ورتاقتاسىپ, جاعدايى تومەن جاس وتباسىلارعا “ناعاشىلىق” جولمەن بەسىك سىيلاۋ – تەك قانا جاڭا تۇرپاتتى قازاقستاندىقتاردىڭ عانا قولىنان كەلەتىن ءىس. بەدەلدى, بەرەكەلى ەلدىڭ ءداستۇرى دە بەكزات! ەلدە “دوس ءسۇيىنىپ, دۇشپان كۇيىنەتىن” وسىنداي جاڭا دا, جاقسى باستامالار كوبەيە بەرسىن دەپ تىلەيىك, اعايىن! كوسەمالى ساتتىباي ۇلى. جامبىل وبلىسى.
