ەل نازارىن اۋدارعان ەرەكشە باسپانانى اسىلبەك العاشوۆ دەگەن ازامات سالعان ەكەن. بۇگىندە الماتى وبلىسىنىڭ تۇرعىنىنا اينالعان ول كىسىنىڭ اكە-شەشەسى وسى ءۇيدىڭ ورنىنداعى شاڭىراقتا تۇرىپتى. جىراققا قونىس اۋدارعان سوڭ, قاراۋسىز قالعان ءۇي ەسكىرسە كەرەك.
ءوزىنىڭ ايتۋىنشا, اتاسى قولى شەبەر ۇستا بولعان ەكەن. اۋلەتتەرىندە اتا جولىن ۇستاعاندار دا بولعان. وسىدان دا 2–3 جىل بۇرىن كونە باسپانا ورنىنا كيىز ءۇي فورماسىندا جاڭا باسپانا كوتەرۋگە بەل بۋعان. ىرگەتاس قۇيىپ, ءۇيدىڭ قابىرعاسىن تەمىرمەن كوتەردى. ەكى جىلعا سوزىلعان قۇرىلىستىڭ اياقتالۋى ا.العاشوۆتىڭ 70 جاسقا تولعان مەرەيتويىمەن تۇسپا-تۇس كەلىپ, جاڭا شاڭىراقتا اكە-شەشە ارۋاعىنا قۇران باعىشتاپتى.
ءۇي ديامەترى – 10 مەتر. باسپاناداعى شاڭىراق پەن قازاقى قالىپتاعى جيھاز, قابىرعاداعى كىلەمشەلەر كوزگە جىپ-جىلى كورىنەدى. ەتنوستيلدەگى ۇيدە اسحانا, جاتىن بولمەسى دە بار. ساندىق ۇستىنە جيىلعان جۇك, دومبىرا مەن قامشى دا كوزگە بىردەن تۇسەدى.
كيىز ءۇي پىشىندەس باسپاناعا جاستار جاعى قاتتى قىزىعاتىن كورىنەدى. ەرەكشە ءۇيدى كورۋگە وزگە وڭىرلەردەن ارنايى كەلەتىندەر دە كوپ ەكەن.
قىزىلوردا
