كىتاپتىڭ قولجازباسى 1972 جىلى باياناۋىل كەنتىندە باسپا ماشينكاسىنا تۇسىرىلگەن ەكەن.
بۇل كىتاپتىڭ جازىلۋىنا اكادەميك قانىش يمانتاي ۇلى ساتباەۆ تۇرتكى بولعان. قولجازبا كۇيىندە قازكسر جازۋشىلار وداعىنىڭ كوركەمدىك كەڭەسىنە جىبەرىلىپ, بەلگىلى سەبەپتەرمەن كەيىن قايتارىلعان. پوۆەست اراعا جارتى عاسىردان استام ۋاقىت سالىپ وقىرمانعا العاش رەت جول تارتىپ وتىر.
تۋىندى پاۆلودار وبلىستىق بۇقار جىراۋ اتىنداعى ادەبيەت جانە ونەر مۋزەيىنىڭ ۇيىتقى بولۋىمەن قازاق جانە ورىس تىلدەرىندە جارىق كورىپ وتىر. رەداكتسيالىق القا مۇشەلەرى – ەربول قايىروۆ, مۇرات اياعانوۆ, جانبولات ابايحان.
قوسىم پىشەنباەۆ ءحىح عاسىردىڭ سوڭى مەن حح عاسىردىڭ باسىندا قازاق جەرىندەگى 20-دان استام كەن ورنىن العاش اشقان قازاق. ەكىباستۇز سەكىلدى الىپ وندىرىستىك اۋماقتىڭ نەگىزىن سالىپ بەرگەن كەنتانۋشىنىڭ قاي ەڭبەگى بولسىن اتاۋعا تۇرارلىق. ق.پىشەنباەۆ ىزدەپ تاپقان كەن ورىندارى ىشىندە «ەكىباستۇز», «الەكساندروۆكا», «بەرىكقارا», «قازاناۋىز», «مايكوبە», «مايقايىڭ», «جوسالى», «كوكتاس», «جەلتاۋ», «جارتاس», «ۇشقاتىن», «نايزاتاس», «ۇشقارا», «قاراقۇرا», «شوپتىكول», «التىندى» سياقتى نىساندار بار.
كىتاپ قوسىم پىشەنباەۆتىڭ كەن بارلاۋشىلىق ءومىرىنىڭ ماڭىزدى كەزەڭدەرىن سۋرەتتەيدى. قوسىمنىڭ بالالىق شاعى, اتا-اناسىنىڭ باي اۋىلىنان كورگەن قورلىعى, العاشقى تابىلعان كەن ورىندارى مەن ورىس كوپەستەرىنىڭ قازاق جەرىندەگى ونەركاسىپتەرى تۋرالى, ەكىباستۇز كومىرى مەن مايقايىڭ التىن كەنىشىندەگى العاشقى ونەركاسىپتەر, تاعىسىن-تاعى دەرەكتى ماعلۇماتتار كەڭىنەن قامتىلعان. «كەدەيدىڭ قولى قىسقا», «قوسىمنىڭ بالالىق شاعى», «العاشقى ولجا», «العاشقى ماحاببات», «العاشقى اقشا», «العاشقى ساۋدا», «قارسىلاس پايدا بولدى», «تاۋ بوكتەرىندەگى زاۋىت», «قوسىم بايدان كەك الدى», «قوسىم وندىرىستىك ارتەل ۇيىمداستىردى», «كۇتپەگەن قوناق», «ەكىباستۇز», «مايقايىڭ», «وتكەن كۇندەر مەن بۇگىنگى زاماننىڭ توعىسى» بولىمدەرىنەن تۇرادى.
پوۆەست تورايعىروۆ ۋنيۆەرسيتەتىنىڭ جانە باياناۋىلداعى «انەت» شارۋا قوجالىعىنىڭ دەمەۋشىلىگىمەن, قازاق جانە ورىس تىلدەرىندە «پاراسات» باسپاحاناسىندا باسىلىپ شىقتى.
تۇساۋكەسەر ءىس-شاراسىندا ق.پىشەنباەۆتىڭ اتالاس تۋىسى امانتاي ەسىمباەۆ پەن ولكەتانۋشى ا.چەركاشيننىڭ ۇرپاعى گالينا بايوك ەستەلىكتەر ايتتى. ا.چەركاشين «باياناۋل», «دوچ باياناۋلا», «قوسىمنىڭ تاعدىرى» كىتاپتارىن جازعان, باياناۋىل ءوڭىرىنىڭ ارعى-بەرگى تاريحى تۋرالى مول ماعلۇماتتار قالدىرعان.
ءىس-شارادا سونداي-اق جۇسىپبەك ايماۋىتوۆتىڭ 135, ءسابيت دونەنتاەۆتىڭ 130, قانىش ساتباەۆتىڭ 125, الكەي مارعۇلاننىڭ 120, شاكەن ايمانوۆتىڭ 110, رۇستەمبەك وماروۆتىڭ 105, مۇباراك جامانبالينوۆتىڭ 100, قيماديدەن نىعمانوۆتىڭ 100 جىلدىق مەرەيتويلارىنا ارنالعان كورمە ۇيىمداستىرىلدى.
پاۆلودار وبلىسى
ەكىباستۇز قالاسى
