اۆتوردىڭ ايتۋىنشا, ءفيلمدى ءتۇسىرۋ 2021 جىلى, رەجيسسەردىڭ 70 جىلدىعىنا وراي جوسپارلانعان. تۋىندىنىڭ تۇسىرىلۋىنە تەلەجۋرناليست, ءماجىلىس دەپۋتاتى ماقسات تولىقبايدىڭ دانەكەر بولۋىمەن كاسىپكەر ماحات تورەالى دەمەۋشىلىك كورسەتكەن.
«2021 جىلى بولات اتاباەۆتىڭ 70 جىلدىعى ەدى. سوعان وراي تۇسىرسە دەگەن اۋەلدە وي بولعان. بىراق ونىڭ رەتى بيىل كەلدى. بولات اعامەن العاش تەلەۆيدەنيەنىڭ جاڭالىقتار قىزمەتىندە جۇرگەن كەزدە تانىسىپ ەدىم. «قازاق جۋرناليستەرى سيىر سياقتى شورىلداتىپ سيگەندەي عىپ جازۋدى قاشان قوياسىڭدار. پروبلەمانى بىردەن ناقتى جازبايسىڭدار ما» دەيتىن. «مىڭ جىلدىق ويىندى» ءبىتىرىپ الىپ, بىرنەشە رەت قاراپ شىقتىق. بولات اعا ءوزى كورسە, نە بولار ەدى دەپ ويلاپ كەتتىم دە شوشىپ كەتتىم», دەيدى قانات تىلەۋحان.
فيلم ساياسي ۇستانىمى ءۇشىن ەلدەن جىراق كەتكەن رەجيسسەردىڭ جان-دۇنيەسىن اشىپ, كورەرمەنگە جاقىننان تانىتتى. كوپ جەردە جاريالانباعان بولات اتاباەۆتىڭ بەينەجازبالارى, قانات تىلەۋحاننىڭ ودان العان سۇحباتتارى مەن «كورول لير» قويىلىمى استاسىپ تۇسىرىلگەن. ءفيلمنىڭ باستاپقى اتاۋى «ابايدىڭ دوسى» دەپ تاڭدالعان. الايدا تەاتر رەجيسسەرىنىڭ شاكىرتى ازامات شارعىننىڭ ۇسىنىسىمەن «مىڭ جىلدىق ويىن» بولىپ وزگەرتىلىپتى.
«تەاتردىڭ مىڭ جىلدىق ويىنى ءالى جالعاسىپ جاتىر. اۆتوريتارلىق جۇيەنىڭ, ديكتاتورلىق بيلىكتىڭ سوناۋ ريم يمپەرياسىنان بەرگى يمپەراتورلاردىڭ حالىقپەن ويناۋىنا دا مىڭ جىل. وسى مىڭ جىلدىق ويىنداردىڭ اراسىندا باسىن تاسقا دا, تاۋعا دا سوققان رەجيسسەردىڭ بەينەسىن جاساۋعا مۇمكىندىگىمىزشە تىرىستىق. ارينە, ەرمەك تۇرسىنوۆ ايتقانداي, بولات اعا – ەڭ ءبىرىنشى كەزەكتە سۋرەتكەر. بۇل – تەاتردىڭ قارسىلىعى, تەاتردىڭ كۇرەسى. ونەر ارقىلى ول كىسى ءوزىنىڭ ءسوزىن ايتقىسى كەلدى. ەركىندىك, دەموكراتيالىق قۇندىلىقتاردى دارىپتەگىسى كەلدى», دەيدى فيلم اۆتورى.
ءفيلمدى تاماشالاعان بەلگىلى جازۋشى-دراماتۋرگ, اباي اتىنداعى مەملەكەتتىك سىيلىقتىڭ لاۋرەاتى روزا مۇقانوۆا تۋىندى جانە ونىڭ كەيىپكەرى تۋرالى تەبىرەنە كەلە: «بولات اتاباەۆ شىن مانىندە تەاتردىڭ رەفورماتورى بولدى», دەپ اتاپ ءوتتى.
سونداي-اق ءبىرتۋار رەجيسسەردىڭ ونەردەگى تالابى ومىردە دە وزەكتى ەكەنى ايتىلدى.
«بولات اتاباەۆتىڭ مىقتى رەجيسسەرلىگى ءوز الدىنا, ول وسى كۇندەلىكتى ومىردە دە ادىلدىك ءۇشىن كۇرەسىپ وتكەن قايراتكەر جانە سول شىنايىلىقتى ساحنادان دا تالاپ ەتەتىن», دەدى ماقسات تولىقباي.
ايتا كەتەيىك, تۇساۋكەسەرگە زيالى قاۋىم مەن تەاتر جاستارى, ونەر سالاسىندا ءبىلىم الىپ جاتقان ستۋدەنتتەر, مارقۇمنىڭ تۋىستارى جينالدى.
تالانتتى رەجيسسەر, ازاماتتىق ۇستانىمى بەرىك ەر ەسىمى كەيىنگى ۇرپاق ساناسىندا وشپەسە كەرەك-ءتى. تۇلعا ومىرىنەن سىر شەرتەتىن وسىنداي تۋىندىلار دا اتاباەۆ ەسىمىنىڭ ەسكىرمەۋىنە ۇلەس قوسار.
